Кыӵе вузъёсты шаерамы тросгес поттоно?

Удмурт Дунне
By Удмурт Дунне Апрель 17, 2018 11:15
udmurt.ru

«Аксион-холдинг» поттыны кутскиз автоматической наружной дефибриллятор. Сое келялозы туэ футболъя дуннелэсь чемпионатсэ ортчытӥсь 7 городъёсы.

Кыӵе вузъёсты тросгес поттоно? Кызьы ужез капчиятоно? Та но мукетыз сярысь кенешизы Промышленностья но вуз каронъя министерстволэн ортчем коллегияз.

Миым шаерамы промышленной вузъёс поттэмын 533,5 миллиард манет тыр. 2016-тӥ арен ӵошатыса, со 1 процентлы уногес. Тужгес трос вуз поттэмын но вузамын металлургия удысын. Кылсярысь, «Ижсталь» завод ӵыжатэм анданлэсь арбериосты, 2016-тӥ арын сярысь, 30,2 процентлы уногес вузаз.

Министрлэсь ужзэ быдэсъясь Виктор Лашкарёв верамъя, трос транспорт поттыны быгатэменыз Удмуртия Приволжск федерал округын 2-тӥ инты басьтэ. Кылем арын Ижысь автозаводын 119 сюрс автомобиль бичамын, валля арын сярысь, со одӥг ньыльмослы тросгес. Тае герӟало автозаводлэн азинскеменыз. Али бадӟым уж нуиське, транспорт газэн ворттылыны мед быгатоз шуыса. Туннэ 186 транспорт газэн ужа. Азьланяз та лыдпусэз ог 13 процентлы йылтыны чакламын. Соин ик заправкаосты выльдон золгес радъяськоз.

Обороналы ужась предприятиос Удмуртиын поттэм вань промышленной вузъёс пӧлысь 20 процентсэ лэсьто. Таос калыклы улон-вылонын кутӥськись арбериос лэсьтон борды но гижысь-пиньысь басьтӥськизы ни — 26 процентэз вуззы калыклы тупа.

— Эшшо но тросгес гражданской продукция лэсьтысалмы, но со понна ӵуказелы оскон кулэ, вузмес калык басьтыны быгатоз шуыса. Лэсьтод но складэ люкаса возёд шат? — шуэ «Аксион-холдинг» корпорациен кивалтӥсь Геннадий Кудрявцев. — Асьме заводъёслы дуннеысь рыноке сюрес усьтыны юрттоно. Али тани дефибриллятор лэсьтӥмы. Сюлэмыныз шуге-леке вуэм муртэ со аппаратэн котькуд адями врачтэк но улӟытыны быгатоз. Эсьма, «скорой» ӝегаз ке но, адями улэп кылёз. Быдэс Европа сыӵе аппаратъёсын улэ. Котькуд учреждениосысь борддоразы юнматэмын со. Ми асьмеос сыӵе дефибриллятор кылдытӥмы, сертификат басьтӥмы. Сое Россиын вӧлмытыны кутскысалмы ке, кыӵе бадӟым пайда луысал калыклы но, заводлы но.

Нялтас вераса, «Аксион-холдинг» эмъян удысын кутӥськись техника ӧжыт уг потты. Пӧртэм пумо аппаратъёсты келя Индие, Бразилие, Индонезие. Но Геннадий Кудрявцев пусъемъя, со ӧжыт. Рос-прос ужан понна кун кылдытыны кулэ аспӧртэм список, кыӵе но кӧня вуз кулэ луоз. Соя ик предприятиос но ужасалзы.

Виктор Лашкарёв ивортэмъя, калыклы улон-вылонын кулэ луись вуз поттон пала предприятиосты берыктон уж азинтэмын луоз. Та понна Воткаысь заводэз, Глазовысь Чепца механикая заводэз, «Аксион-холдингез» выльдонъя нимысьтыз планъёс лэсьтэмын луозы.

Ужрадэ пыриськиз Россиысь Промышленностья но вуз каронъя министерстволэн бурд улаз ужась Улосъёсысь промышленностез азинтон политикая но проектъёс лэсьтонъя департаментэн кивалтӥсь Сергей Безруков. Со пусъемъя, министерство ачиз ласянь предприятиосты азинтыны субсидиос висъя. Индустриальной паркъёс, кластеръёс кылдытыны юрттыны татын дасесь. Проектъёслэсь 50 процентозь дунзэс министерство субсидиен берыктэ, шуиз Сергей Безруков. Заводэн кивалтӥсьёсты куриськонъёссэс ыстыны косӥз, соосты нимысьтыз эскерозы. Куд-огезлы капчиятэм кредит сётыны юрттозы. Удмуртиысь Правительстволэн Тӧроезлэн воштӥсез Александр Свинин коллегие люкаськемъёсты оскытӥз: матысь нуналъёсы басьтӥськозы шаерысьтымы промышленностез азинтонъя 3-5 арлы азьпала чаклам стратегия кылдытон борды. Улон воштӥськемъя арлы быдэ сое выльдозы. Озьы ик рынокез паськытатонъя амалъёс утчалозы. Министерство 2018-тӥ арлы валтӥсь ужпум пуктэ: кунгож сьӧрысь вузъёсты ичигес вуттоно но Россилэн палэназ уногес асьме вузэз келяно.

Елена Сараматова

Туспуктэм: udmurt.ru

 

Удмурт Дунне
By Удмурт Дунне Апрель 17, 2018 11:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<