Кун Кенешлэн сессиез: Уждунэз йылтыны коньдон вань

Удмурт Дунне
By Удмурт Дунне Апрель 26, 2018 11:01

24-тӥ апреле ортчиз Кун Кенешлэн 5-тӥ сессиез. Солэн ужаз пыриськизы Удмуртилэн Тӧроез Александр Бречалов, Правительстволэн Тӧроез Ярослав Семёнов, валтӥсь федерал инспектор Дмитрий Мусин. Эскеремын 20-лэсь уно ужпумъёс.

udmurt.ru

Коньдон ужпумъёсъя министр С. Евдокимов: шаермылэн доходъёсыз но расходъёсыз йылтэмын 1 миллиард манетлы.

Уксё ватсаськиз

Котькудаз сессиын воштонъёс-ватсанъёс пыртӥсько бюджет сярысь законэ. Таиз кенешон но пӧртэм ӧз луы. Воштонъёс герӟаськемын казналэсь доход но расход люкетсэ йылэтонэн. Та рад казнае ватсаса 541 миллион манетлэсь ятыргес вуэмын. Бадӟым люкетэз — Россиысь: 23 миллионэз — моногородъёслы юрттэт сётон программая, 200 миллионэз — Россиысь Правительстволэн резерв фондысьтыз Чупчи вамен выж лэсьтонэз йылаз-пумаз вуттонлы, 317 миллион 694 сюрс манетлэсь ятырез — 1-тӥ майысен пичизэ уждунэз (МРОТ) йылтон понна.

— Кызьы тодӥськоды, туэ 1-тӥ январьысен МРОТ 10 сюрс 912 манетозь будэтэмын вал, нош 1-тӥ майысен со 12 сюрс 837 манет луоз, — пусйиз коньдон ужпумъёсъя министр Станислав Евдокимов. — Таин валче уждунъёсты йылэтонлы 1 миллиард 762 миллион манет чакламын вал элькун бюджетын но. Озьы асьме резервез но, Москваысь вуэм коньдонэз огазеям ке, бюджет удысын тыршисьёслэсь уждунзэс йылэтонлы со тырмоз. Россилэн Президентэзлэн май указъёсаз пусъем бюджетникъёслэн сяна, уждунзы 4 процентлы тросгес луоз та категориосы шедьымтэослэн но, кылсярысь, тылпу кысон, инкуазез утён, почта, ивор вӧлмытон ёзъёсын ужасьёслэн.

Ватсаса вуэм коньдонэз интыям сяна, депутатъёс министерствоос но ведомствоос куспын уксё люкылӥзы на. Кылсярысь, 100 миллион манетлы йылтэмын Гурт хозяйствоя но сиён-юонъя министерстволы йӧл кысконэз радъянлы, вазен та коньдон учкемын вал техника басьтонлы. Озьы ик 83 миллион манет йылтэмын Лэсьтӥськонъя, ЖКХ-я но энергетикая министерстволы — уксёез кутозы толлы дасяськыны.

Законопроектэз кыкетӥ лыдӟемен юнматон азьын 8 поправкаос вуизы на Удмуртилэн Тӧроезлэсь. Соос озьы ик герӟаськемын федерал бюджетысь юрттэтэн. Тодмо луиз: Москваысь 2018-тӥ арын 632 миллион манет, 2019-тӥ арын 469 миллион манет вуоз яслиос пуктонлы. Со борды эшшо 148 миллион манет ватсаськоз элькун казнаысь. Та сяна, 52,8 миллион манет федерал казнаысь лыктоз Глазовысь вокзалэз выльдонлы.

Выль воштонъёсты-выльдонъёсты лыдэ басьтыса, элькун казналэн доход люкетэз 69 миллиард 396 миллион манет луиз, расход люкетэз — 69 миллиард 113,4 миллион манет. Профицитэз ӧз воштӥськы — 283 миллион манет.

Сюрес фонд уз буша

Воштонъёс пыртэмын «Сюрес фонд сярысь» законэ. Кызьы валэктӥз транспортъя но сюрес хозяйствоя министр Алексей Горбачёв, татчыозь, сюрес вылын куронъёсты тӥян учыръёс фото я видео вылэ шедё ке, штрафъёслэн оглюкетсы элькун бюджетэ, мукетыз Сюрес фондэ кошке вал. Табере со Сюрес фондэ лыктэмысь дугдоз.

— 2015-тӥ арын фондэ та чотын 667 миллион манет люкаськиз вал, 2016-тӥын — 581 миллион манет, нош 2017-тӥын — 552 миллион манет, — ватсаз Алексей Горбачёв. — Али, 20 нунал куспын пытсаку, штрафлэсь ӝынызэ гинэ тырыны луэ — таин валче ик берло аръёсы казнае ӧжытгес коньдон люкаськыны кутскиз.

Но Сюрес фонд буш уз кыльы, пе. Кылсярысь, уксё люкаськыны быгатоз сюресъёсты умойтэм тупатъям понна тыриськонъёс чотын. Матысь дыре ик 175 миллион манет вуыны кулэ ни. Озьы ик Кам но Буй вамен выжъёс вылтӥ ортчем понна тырем коньдон кошке концессионерлы, но весяк озьы уз луы.

Буш 2 инты

Сессиын эскерем мукет ужпумъёс герӟаськемын вал Кун Кенешлэсь, кун, муниципал служащийёслэсь ужзэс радъянэн. Татчыозь калык дружинникъёсты страховать карылӥзы, полицейскойёсын ӵош ужакузы гинэ, табере лэземын трос калык люкаськылон интыосын ас кожазы югдурез утьыкузы но.

Депутат мандатлэсь ачиз куриськемъя мозмытэмын Андрей Лямин, со быръемын вал 12 номеро Молодёжной округъя. Озьы Кун Кенешын та вакытлы 2 мандат буш — кылем арын интызэ кельтӥз вал Юрий Фёдоров Федерацияя Кенеше кошкеменыз валче. Чакламъя туэ сентябре 2 участокъёсын ортчозы Кун Кенеше ватсаса депутат быръёнъёс.

Элина Кумачёва
Туспуктэм: udmurt.ru

Удмурт Дунне
By Удмурт Дунне Апрель 26, 2018 11:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<