Элькунысьтымы калык люкаськылон 13 интыос выльдӥськозы

Удмурт Дунне
By Удмурт Дунне 28 апреля, 2018 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Туэ элькунысьтымы трос калык люкаськылон 13 интыос выльдэмын луозы «Формирование комфортной городской среды» кун программа чотын. Макем соос воштӥськозы — тодмо ни, проектъёс дасесь.

Глазовысь «Горсадлэн» проектэз.

Устооссэ — Москвае

7-ез проектъёс та нуналъёсы келямын Москвае — тужгес чебер интыосты быръёнъя Россиысь конкурсэ пыриськон вылысь. Ваньмыз соос — элькунысьтымы пичи городъёсысь: Сарапулысь Кам шурлэн ярдурез но Советской урам, Воткаысь 95-тӥ иськем микрорайон но П. Чайковскийлэн «Арлэн вакытъёсыз» паркез, Глазовысь Город сад, Можгалась Чебершурской микрорайон, Камбаркаысь Капани нимаськись инты.

Конкурсэ ыстэмлэсь азьло соосты эшшо одӥг пол пыр-поч эскеризы Удмуртилэн Тӧроез бордын ужась межведомственной комиссиын. Ужрадэ пыриськизы Правительстволэн Тӧроез Ярослав Семёнов, Лэсьтӥськонъя, ЖКХ-я но энергетикая министрлэсь ужзэ быдэсъясь Иван Ястреб. Проектъёсын тодматӥзы муниципал кылдытэтъёслэн йыръёссы, воштӥсьёссы.

Пыласькозы нимаз шормуӵын

Кам шурлэсь ярдуръёссэ Сарапулын кылем арын тупатъяны кутскизы ни. Но туэ сое эшшо ог 5 иськемлы нуйтыны чаклазы.

— Жаляса верано, шур кузя али пуктылэмын промышленной предприятиос, — вераз городлэн йырызлэн воштӥсез Алексей Зуев. — Соин ик оглюкетсэ выжтыны малпам.

Соос интые усьтӥськозы спортплощадкаос, пыдын ветлон, велосипедэн ворттылон сюресъёс но трос мукет. Эшшо Кам шурын вань Безымянной шормуӵ. Отчыозь пыдын ветлон выж, пе, кысконо. Нош шормуӵын радъяно пыласькон, шутэтскон инты. Шормуӵ но ярдур вискын вуэз мур ӧвӧл, отӥ судноос уг ветло — кышкытлык уг кылды.

Сарапуллэн кыкетӥез проектэз — Советской урамез туала шӧмъем карон. Со борды итыны луоз на, пе, Красноармейской урамез. Кыказ но ӧжыт ӧвӧл историен но культураен герӟаськем синпелетъёс.

— Проектэз пыӵатонэ пыриськыны мылкыд каризы ни Сарапулысь куд-ог ужбергатӥсьёс но, — ватсаз Алексей Зуев.

Толалтэысь — гужеме

Вотка озьы ик 2 кечез кутыны дасяське. Нырысетӥез проект герӟаны кулэ городысь тужгес дуно интыосты — ӵыпетэз, П. Чайковскийлэсь музей-юртсэ. Паркез 4-лы люкыны учкемын — арлэн вакытъёсызъя.

— Толлы сӥзем люкетаз гужем но тол шӧмъем луыны кулэ, та понна отчы тросгес кызъёс мерттом, — шуиз Воткалэн йырызлэсь ужзэ быдэсъясь Ольга Сорокина. — Нош гужем люкетын ӟырк кезьыт толэн но шуныт кадь потыны мед кутскоз. Котькуд зонаын чакламын спортплощадкаос, поръян интыос, кафеос…

Кыкетӥез проект городлэсь одӥгзэ сюлмаськытӥсь «пӧськызэ» йӧнатыны кулэ, пе. 95-тӥ иськем микрорайон интыяськемын отын, кытӥ Воткае Иж палась поездъёс пыро. Та районын 15 сюрс пала улӥсез, 1 гинэ школа, 3 нылпи сад, благоустройство понна берло аръёсы номыр карымтэ. Эшшо ӵапак отын ӵемысь шараясько нылпиос пӧлын йыртэман учыръёс. «95-тӥ иськем» проект та районын улон-вылонэз воштыны кулэ. Усьтӥськозы шутэтскон интыос, культурая, спортъя центръёс…

Шутэтскозы уртче

Глазовъёс шуо: Горсадмы вань уйпал ёросъёсын улӥсьёслэн шутэтскон интызы луоз. Отчы ӧжытгес кельтом вуз каронъя но офисъёсъя центръёсты, тросгес лэсьтом пыдын ветлон, великен ворттылон интыос, татын трос историен но культураен герӟаськем синпелетъёс, юнматом Чупчи шурлэсь паллян пал ярдурзэ…

Можгаос ватсало: милям но Чебершурской районмы выльдӥськиз ке, вань лымшор ёросъёсын улӥсьёс вуылыны кулэ. Уката трос саклык висъялом спортэз азинтонлы — элькунысьтымы вань ёросъёслэн флагъёссы татын тӧласькозы, гурт спортсменъёслэн шудонъёссы дыръя музэн. Спортплощадкаос, культурая центръёс — ваньмыз чакламын.

Камбаркалэн проектэз лябен лыдъямын. Комиссия куриз: сое йылаз-пумаз вуттоно на — талы 1 нунал сётӥськиз. Но проектлэн тырмымтэосыз шоры учкытэк, камбаркаослэн осконзэс ыштэмзы уг поты, Москва соосты но синйылтоз шуыса. Камбарка кема аръёс ӵоже пытсамын вал — Кам шурлэн ярдуръёсыз но, культурая юртсы но берлозэ 1980-тӥ аръёсы тупатъямын. Ӧвӧл отын шутэтскон интыос. «Капани» проект городлэсь улон-вылонзэ чутрак умой пала воштыны кулэ.

Пусъёно на: Россиысь конкурсэ ыстэм вань проектъёс дасямын Удмуртиысь архитекторъёсын ӵош. Вожвылъяськонын устоосызлы проектъёслы кун казнаысь ватсаса коньдон висъяськоз. 2018-тӥ арын бюджетын талы 5 миллиард манет учкемын.

Элина Кумачёва

Удмурт Дунне
By Удмурт Дунне 28 апреля, 2018 14:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<