Эгра ёросысь Тышур: 5 коркан 25 мурт

Удмурт Дунне
By Удмурт Дунне Апрель 17, 2018 13:30

Эгра ёросысь Зура муниципал кылдытэтэ документъёсъя 13 гурт пыре ке но, Выльгурт, Кук-Шамардан но Седойлуд ньӧмыз понна гинэ лыдъясько на, улӥсьёсыз ӧвӧл. Соин ик тужгес пичи гурт кыле Тышур.

Тышурысь ульча.

Тыэз но, шурез но ӧвӧл

Гуртын 25 адями улэ. Зура муниципал кылдытэтысь валтӥсь специалист Надежда Лекомцева верамъя, берло 3 ар ӵоже выль корка пуктӥсьёс но шедизы. Озьы Сергей Поликарпович Агафоновлэн Александр пиез яна потӥз. Та вакытлы гуртын 5 корка. 25 мурт пӧлысь 5-ез пенсионеръёс, 15 аресозь нылпиоссы 8 кузя. Нылпиос вордско бере, матысь дыре гурт уз быры на.

1931-тӥ арын вордскем кышномурт Капиталина Ивановна Невоструева гуртысь тужгес арлыдоез луэ. Со доры ик юалляськыны пыри.

— Тышурын мон вордски, татын ик будӥ, — вера арлыдо кышномурт. — Анаелэн семьяез кылем даурлэн 20-тӥ аръёсаз татчы вуэм. Глазов палан улӥсьёс, пе, соку тросэз Чупчи шур кузя тубиллям. Нырысь Бадӟым Пургае нуись сюрес вылэ Луговая гурт кылдытӥллям. Вашкала дыръя бадӟым сюрес кузя интыяськем гуртъёстӥ олокыӵе но бандитъёс ортчылӥллям, вораськылӥллям, гурт калыкез вӧсь карылӥллям. Сыӵе улонлэсь акыльтыса, Луговая гуртын улӥсьёс нюлэскы кошкиллям. Нош малы гуртсэс Тышур нималлям, абдрано. Тызэ но, шурзэ но тапалась уд пумита.

Капиталина Ивановналэн анай-атаез вань улонзэс гуртын ортчытэмын. Иван Егорович колхозъёс кылдон вакытэ счетоводын я бригадирын ужам. Быдӟым оже тазалыкез лябен басьтӥллямтэ, Ижысь военной заводэ келяллям. Озьы со быдэс войнаез трудармиын ортчытэмын.

Автолавка вуылэ

Ас вакытаз, пе, Тышурын школа но вылэм. Кызьы вераз Капиталина Ивановна, сое кемалы усьяллямтэ, Оник-Ирыме выжтӥллям.

К. Невоструева Тышурысь ӧз кошкылы.

— 5-тӥ классысен Зурае мыноно луиз. Эшъёсы ӧй вал, тыпак огнам ветлӥ. Соку кионъёс но трос вал, тӧдьыесь эшшо. Со вакытэ школаын дунын дышетскимы, 20 манет тыроно луиз. Туж бадӟым дун вал милям семьямы понна. Школа бере колхозэ ужаны кариськи, котькыӵе ужез быдэсъяй. Гуртамы ыж гидъёсмы 2 вал. Соосты но бӧрысь быдтӥзы, гидъёсты Оник-Ирыме выжтӥзы. Сокугес ик гуртысьтымы тросэз калык отчы кошкиз.

Шуг-секытъёссы кыл-дылӥзы сюрес ласянь: машинаос я нӧдылӥзы, я букосъёсы тайылӥзы. Берло аръёссэ югдурзы тупатскиз. Ог 2 ар талэсь азьло Тышуре сюресэз ӝутӥзы-тупатъязы, нош толалтэзэ, пе, сое «Зуринский агрокомплекс» синучкон кадь сузяса возе.

— Куке-соку гуртамы клуб нергемы но вал, — веранзэ азьланьтэ Капиталина Невоструева. — Тырттэм корка люкаськылӥмы. Матысь гуртъёсысь но егитъёс ветлӥзы. Шулдыр ортчиз егит дырмы: арган шудэмъя такмакъёс, «Барыня», «Коробочка» кырӟанъёс быдэстылӥмы, парен экты-лӥмы.

Гуртазы магазинзы ӧвӧл бере, арнялы 2 пол Тышуре автолавка ветлэ. Пызь но, тысь но отысь басьто. Мар куро, соку ик гуртоослы ваё.

Трактор-комбайнэн ужаз

Гуртысь ужаны быга-тӥсь калык сьӧрло ветлэ. Кин ужбергатӥсьёс дӥне куриське, кин ёрос центре ветлэ. «Зуринский агрокомплексын» ужасез одӥг гинэ — тракторист Валерий Агафонов. Ас вакытаз уно аръёс тракторен ужамын Юлия Невоструева но.

Ю. Невоструева тракторезлэсь мӧзме.

— Вордскемын мон Дэбес ёросысь Такагуртын, 18 аресам трактор нуллыны дышетски Омск кемын, — веранзэ мытӥз Юлия Петровна. — Профессиослы дышетскон интыос ӧжыт вал. 16 аресам ёросысь 3 нылъёсын сюрес вылэ потӥмы. Строитель луыны ӧз кылды, дышетскыны мылкыд карисьёс укыр трос вал. Дэмлазы трактористъёсты дышетӥсьёслэн группаязы выжыны. Сокеме мыныса, берен уд берты ук, соглаш кариськи. Коньдон ласянь но таяз группаын тросгес стипендия (20 манет) сётъязы, нош лэсьтӥськисьёслы — 10 манет гинэ. Дышетскеме бере 1 арзэ Омск палан отработать кари на.

Отӥяз егит нылаш вордскем гуртаз бертӥз, «Звезда» эштосын ужаз. Нырысь-валысь МТЗ-50 тракторен ужаз: йӧл нуллӥз, торф ворттӥз, кыед поттӥз но гурт котырысь мукет ужъёсты быдэсъяз. Уг яра вылэм ферма котырын берган, соин ик гужемзэ комбайнэ пуксьылӥз. 19 ар трактор-комбайнэн ужаз. Сюлмо тыршемез 1976-тӥ арын «Знак Почёта» орденэн пусъемын, бӧрысьгес — «Ветеран труда» медален. Азьвыл колхозын умой ужамзы понна шутэтскыны дунтэк яке пичиятэм дунын путёвкаос сётылӥзы. Озьы Ю. Невоструева Сочие но Узбекистанэ вуылӥз.

Тышур гуртэ бызьыса но, тракторен ужаз на. Отӥяз тазалыкез лябӟыны ӧдъяз. Но выль техника шоры учкыса, туннэ но вожъяське. Азьло, пе, пыль пӧлысь ум адӟиськиське вал, нош туала вакытэ тӧдьы дэремъёсын ужало, уг но зуркаты. Соин но, дыр, куд-ог дыръя кышномурт мӧзмем сюлэмзэ буйгатэ, яратоно тракторез сьӧры пуксьыса. Азбаразы сылӥсь трактореныз ворттылэ, тани али но кузпалыныз пу дасяны ветлӥллям.

Газ сярысь та гуртын уг ик малпасько, вузы но кыскемын ӧвӧл. Котькуд коркалэн аслаз колодчаез.

Надежда Данилова

Туспуктӥз Александр Караваев

Удмурт Дунне
By Удмурт Дунне Апрель 17, 2018 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<