Александр Бречалов выжы калыкъёслэсь сюлмаськонъёсынызы тодматскиз

Удмурт Дунне
By Удмурт Дунне Апрель 19, 2018 10:16

18-тӥ оштолэзе Удмуртилэн Тӧроез Александр Бречалов ужан нуналзэ сӥзиз шаерысьтымы выжы калыкъёслэсь сюлмаськытӥсь юанъёссэс сэрттонлы-пертчонлы.

А. Бречалов тодматскиз К. Герд нимо гимназилэн ужаменыз.

Эшъяськон юртын со пумиськылӥз Ӟуч культурая огазеяськонэн но вань мукет национально-культурной огазеяськонъёсысь азьветлӥсьёсын, собере нимысьтыз саклык висъяз «Удмурт Кенешлы» — пумиськон радъяськиз К. Герд нимо гимназиын. Александр Бречалов тодматскиз дышетскон условиосын, котырскиз школаетӥ но, нылпи садэтӥ но. Пиналъёс бадӟым кивалтӥсьлы анай кылын вераськыны быгатэмзэс но историез тодэмзэс возьматӥзы, эктыса паймытӥзы. Но дышетонэз ӟеч радъян сяна, выль директорлэн Татьяна Волковалэн туж трос мукет но сюлмаськонъёсыз: липет вия, актовой залысь пуконъёс ӟукырто, тани-тани куашкалозы, компьютеръёс уг тырмо… Тӧро югдурен тодматскемез бере шуиз: тыршом луонлыкъёс утчаны, К. Гердлэн 120 аръем юбилей араз солэсь нимзэ нуллӥсь школа таӵе югдурын ужаны кулэ ӧвӧл.

Актовой залын вылӥ кивалтӥсез возьмало ни вал «кенешчиос». Юанъёс, котьку сямен ик, удмуртлыкез утёнэн но азинтонэн герӟаськемын вал. Кызьы тодӥськоды, «Удмурт Кенешен» нырысетӥзэ пумиськылыкуз, А. Бречалов сӥзиз Ижкарын В. Короленко нимо Ӟуч драмая театрлэн вуж юртаз Удмурт культурая центр усьтыны. Чакламъя со вуыны кулэ удмурт кунлыклы 100 ар тырмонлы — 2020-тӥ арын. Ӝегатскытэк кылдытэмын вал ужась группа, ортчытэмын общественной кылзонъёс, уже кыскемын архитекторъёс, проектировщикъёс. Но экспертъёс вуж юртэз пыр-поч эскеремзы бере шуизы: та юртэз сэзъяны уксё куштэм интые, эсьма, выльзэ пуктон дунтэмгес усёз… Соин ик решение кутэмын вал, вужзэ куашкатыса, выль юрт ӝутыны. Дыр трос ӧз кыльы ни, матысь дыре вуж театрез утялтон борды кутском, шуиз Тӧро.

udmurt.ru

Элькун Тӧроен пумиськонэ вуизы гажамон удмуртъёс.

Дырын-дырын ӝутскыло Кызьпу арама котыр споръяськонъёс: одӥгез куре тазьы, мукетыз — озьы… Кыӵеен сое адӟиськоды — нырысь ик асьтэлы огкылэ вуыны кулэ, шуиз А. Бречалов, тырмоз ни гозы пуныны. Шумпотымон, «Комфортная городская среда» проектлэн юалляськонэзъя Кызьпу арама 6-тӥ интые потӥз, озьыен, луонлык кылдӥз сое тупатъяны матысь дыре ик.

Туж бугырес вераськон радъяськиз «Мынам Удмуртие» телекомпания котыр. Угось калык ӝожтӥське, анай кылын программаос кулэсмо яке, выльёссэ кылдытэм интые, ялан вужъёссэ бергато шуыса. Телекомпанилэн кивалтӥсьёсыз верамъя, ваньмыз умой, мар токма пӧсекъяськоды? — соку ик ӧз оскы А. Бречалов. Но калык юнме уг вераськы ук, куд-ог ёросъёсын «Мынам Удмуртие» телеканалэз, учкемзы потыса но, учкыны уг быгато! Нош учкисьёсызлы акыльто вуж программаос, огпӧртэм бергась кырӟанъёс но мукет.

— Малы калык та пумысен уг вазиськы? — паймиз Тӧро.

Телекомпаниын кылдэм югдурез рос-прос сэрттон-пертчон вылысь Тӧро матысь дыре ик нимысьтыз кенеш ортчытыны косӥз, угось элькун кивалтӥсьёс котьку дурбасьто анай кылын программаос поттонлы. Александр Бречалов верамъя, солы уксё но висъяло, журналистъёс сюлмаськыны кулэ передачаослэн ӟечлыксы сярысь гинэ, арлыдоос сяна, соосты яратыса мед учкозы егитъёс но. Нош калыкез шаплыгес кариськыны куриз ивортонъёссэс кивалтӥсьёс дорозь вуттон пумысен.

Пумиськон кыстӥськиз 3 час пала! Юан-веранъёс трос вал, куд-огезъя югдур сайкиськиз, нош куд-огезъя валамтэос кылизы…

Зинаида Рябинина

Туспуктэм: udmurt.ru

Удмурт Дунне
By Удмурт Дунне Апрель 19, 2018 10:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<