2 арня куспын Удмуртиын 100-лэсь трос вузкаронниос эскериськозы

Удмурт Дунне
By Удмурт Дунне 5 апреля, 2018 14:34

Якшур-Бӧдьяысь магазинъёсты эскерон.

Кемеровоысь «Зимняя вишня» вуз каронъя центр ӝуам бере Россиысь вань улосъёсын шутэтскон, вуз карон центръёсты эскерон борды басьтӥськизы. 2 арня куспын Удмуртиын 100-лэсь трос юртъёс эскеремын луыны кулэ.

Та вакытэ шаерамы вуз каронъя 86 бадӟым центръёс лыдъясько. Куд-огаз лэсьтэмын на кинотеатръёс, нылпиослы шутэтскон комнатаос. Прокуратураын но тылпулэсь утиськон ёзъёсын ужасьёс центръёсты эскерон борды 28-тӥ мартысен басьтӥськизы. Кылем арня ӵоже соос 18 интые вуылӥзы но 300-лэсь трос тырмымтэосты шараязы. Пусъемын вал: тужгес секыт югдуре шедемын азьвыл предприятиослэсь юртъёссэс вуз карон центръёслы пӧрмытэм интыос — коридоръёссы сюбегесь, тросэз ӧсъёссы уг усьясько. Тужгес трос шекъёс шараямын Ижысь «Вар-Мит», «Парма», «Хозяйственная база», «Алые паруса», «Три банана», Воткаысь «Север», Эграысь «Фотон» центръёсын. Таосын артэ пуктыны луоз Ижысь Йӧ дворецез но. Ӵемысь отын вуз карон ортче, ӧсъёс дорын бадӟым коробъёс, мешокъёс сыло.

3-тӥ апреле Иж город администрацие ужбергатӥсьёс люкаськылӥзы. Ужрадэз нуиз городлэн йырыз Юрий Тюрин. Вуизы на тылпу кысӥсьёс, «Ижводоканал», «Ижевские электрические сети» огазеяськонъёсын ужасьёс. Котькудӥз ужбергатӥсь коньдон поттон сярысь сюлмаське, озьы ке но шутэтскыны, басьяськыны лыктэм муртъёслэсь улонзэс утён сярысь но малпаськоно. Та вакытэ радъям эскеронъёс ньӧмыз понна гинэ уг ортчо. Тылпулэсь утиськон ёзъёсын ужасьёс дышетон ортчытыны котьку дась.

Кылем суббота нуналэ вуз каронъя «Сигма» центрын эскерон ортчытэмын вал. Малпамтэ шорысь сигнализация шудӥз. Сыӵе дыръя 4 этажъем юртысь вань адямиос ульчае потыны кулэ. Жаляса верано, куд-ог адямиос интыысьтызы но ӧз вырӟе. 1-тӥ апрель со нуналэ ӧй вал ке но, тросэз малпазы, лэся, кин ке шудэ, пӧяське шуыса.

Нош Якшур-Бӧдья ёросысь Прокуратураын, тылпу кысон удысын ужасьёс «Радамир» но «Вятский» центръёсы вуылӥзы. Нырысетӥяз трос шекъёс шараямын, нош 2-тӥез туала манеръя лэсьтэмын ни, тылпу кысӥсьёслэсь куронъёссэс лыдэ басьтыса. Озьы ке но одӥг кышкытлык кылдэ ик: «Вятский» центрлэн гулбечаз (0 этажаз) нылпиос понна шудон павильон кылдытӥллям, отын лэсьтэмын натяжной потолок, со, пе, ӝуанлы капчиен сётӥське.

Шаерысьтымы Прокуратураын 12-тӥ апрелёзь «пӧсь» телефон ужа. Вуз карон, шутэтскон центръёсысь кышкыт интыосты адӟисьёсты 78-45-78 номеро телефонъя жингыртыны куро. Туннэ нуналлы 12 вазиськон лыдэ басьтэмын ни, ваньмызъя нимысьтыз эскеронъёс ортчытэмын луозы.

Валентина Емельянова

Туспуктӥз Вера Вахрушева

Удмурт Дунне
By Удмурт Дунне 5 апреля, 2018 14:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<