Югдурез эскерозы волонтёръёс

Удмурт Дунне
By Удмурт Дунне 16 марта, 2018 16:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Быръёнъёс дыръя Удмуртиын ужалоз Общественной палаталэн нимысьтыз ситуационной центрез. Кызьы но мае со эскероз?

Тодады вайытом, быръёнъёс азьын нимысьтыз саклык висъямын вал калык пӧлысь наблюдательёсты дасянлы. Та бордын рос-прос ужаз шаерысьтымы Общественной палата. Солэн кивалтӥсез Павел Вершинин пусйиз:

— Нырысьсэ Россиын быръёнъёсты чакланы оскемын вал общественной огазеяськонлы. Валамон, ӵуш-паш карисьёс шедёзы, воксё малпамтэ азьысь но мае ке поттозы. Но республикаысьтымы ваньмаз 1 сюрс 204 участокъёсы ми наблюдательёсмес ыстомы. Соос пӧртэм огазеяськонъёслэн ёзчиоссы, пӧлазы шаерысьтымы ваньмысьтыз сямен вузъёсысь студентъёс, егит активистъёс. Мылкыд карисьёс туж трос вал. Со сяна, ог 100 наблюдателез резервамы кутӥм на,  кин ке шуак висьыны усиз ке, ог-огзэс воштыны мед быгатозы. Озьы городэ-а интыяськемын участок, гуртэ-а, отысь югдурез общественникъёс но син азязы возьыны кулэ.

— Общественной наблюдательёслэн гадязы нимысьтыз бейджзы луоз. Соос участокысь югдурез чакласа улозы, мар ке умойтэмзэ адӟизы-шараязы ке, соку ик ситуационной центре жингыртозы, — валэктэ Общественной палатаысь бырйисьёслэсь правооссэс чакланъя комиссилэн кивалтӥсез Рашид Хуснутдинов. — Нош центрын пукисьёс умойтэм югдур сярысь ивортозы югдурез утисьёслы. Общественной наблюдательёс асьсэ чакламъёссэс Интернет вотэсъёсы но пуктылозы, озьы быръёнъёс шара ортчозы.

Ситуационной центр интыяськоз Удмурт кун университетысь библиотекалэн юртаз. Отын тыршоз 50 пала адями — пӧртэм общественной огазеяськонъёсысь волонтёръёс но юристъёс.

Центр ужаны кутскоз 17-тӥ мартысен. Солэн «пӧсь» телефонэз: 8-800-350-18-03.

Елена Васильева

 

Удмурт Дунне
By Удмурт Дунне 16 марта, 2018 16:42 Updated