Янгыш кӧс йӧл. Ма юрттоз хозяйствоослы тулыс бусы ужъёсты ортчытыны?

Удмурт Дунне
By Удмурт Дунне Март 13, 2018 09:03

Тулыс матэктэмъя хозяйствоосын улон уката огыр-бугыр луэ. Угось котькуд ёросысь ичизэ 3-5 хозяйство кизьыны воксё дась ӧвӧл.

Юрттэт вань — басьтыны уг луы

Гурт удысъя но сиён-юонъя министерствоысь музъем кусыпъёсъя но будосъёсъя ёзэн кивалтӥсь Алевтина Бурдина верамъя, туннэ шаерысьтымы хозяйствоосын котькуд гектарлы 6,1 килограмм сяна удобрение басьтэмын ӧвӧл. Миым та вакытэ 9 килограммлэсь ортчемын ни вал. Гуртоослы республикалэн палэназ удобренилы потано медаз луы шуыса, туэ Балезиноын но Можгаын склад но усьтӥзы. Но йӧллы дунъёс усемен, гуртоослэн ныр улысьтызы но удобрениез басьтыны луонлыксы ӧвӧл. Зэм, вань ёросъёсын югдур лэчыт уд шуы. Кылсярысь, Вавож ёросын котькуд гектаре 35 килограмм удобрение понымон вань ни. Татын ик техниказы но ог 90 процентлы дась, топливо но люкало.

— Вавож ёросын трос коллективной хозяйствоос — СПК-ос. Быдэс коллективен умой ужаны тыршо. Частной огазеяськонъёсын со ласянь югдур начаргес. Соин но вавожъёс музъем борды кырмиськыны тыршо: татын но йӧллы дун усе ке но, ужаны пӧртэм амалъёс утчало, — шуэ Алевтина Бурдина.

Грак ёросын гектарлы быдэ 14,3 килограмм удобрение люказы ни, Дэри палан — 12,7, Можга но Сарапул ёросъёсын — быдэн 10 килограмм. Мукет ёросъёсын лыдпусъёс воксё пичиесь. Министерствоын феврале несвязанной поддержкалы субсидия но висъяны кутскизы. Солэн быдӟалаез 21 миллион манет. Но сое басьтон вылысь 65 хозяйство гинэ вазиськиз. Мукетъёсыз субсидия басьтыны уз быгатэ. Угось сое басьтон понна нырысь ик кулэ возьматыны топливолы, удобренилы, кидыслы уксё висъям сярысь документъёс-чекъёс. Нош хозяйствоослэн ваньзэ сое октыны кисызы буш.

Пунэмъёс улэ пачкамын

udmurt.ru

Кысконо скалъёс 2 сюрс 754 йырлы йылӥзы.

2016-тӥ арен ӵошатыса, миым шаерамы 30 сюрс тонналы уногес йӧл поттэмын. Йӧл кыскыны трос кужымзэс понӥзы Вавож, Можга, Шаркан, Балезино, Алнаш, Ува, Глазов но Пичи Пурга ёросъёс. Кысконо скалъёс 2 сюрс 754 йырлы йылӥзы. Нош мар луоз туэ?

— Арня вискын шаерысьтымы кужмо хозяйствоосты министерствое люкаллязы, — вера Эгра ёросысь «Зура» агрокомплексэн кивалтӥсь Елена Чиркова. — Ужрадэ пыриськизы Россиысь «Союзмолоко» огазеяськонэн кивалтӥсьёс. Соос верамъя, Россиын туннэ 1 литр йӧлэз заводъёс шорлыдын 25 манетэн басьто. Приволжск федерал округын — 19 манетэн. Дунъёслэсь усемзэс дугдытон вылысь Россие кунгож сьӧрысь кӧс (сухое) йӧлэз пыртэмысь дугдоно, со ласянь вамышъёс лэсьтӥсько ни. Но кылем арысь май толэзьысен сомында кӧс йӧл Россие вуэмын ни, туннэ заводъёс, хозяйствоослэсь чылкыт йӧлзэс воксё басьтытэк но, кӧсэз вылын сентябрёзь гань-гань улыны быгатозы. Мар соос закупочной дунъёсты ӝутон сярысь сюлмаськозы? Уз!

Ми, хозяйствоосын кивалтӥсьёс, огезлы паймемысь ум дугдӥське: кӧс йӧлэз вуэн сураса, кунянъёсмес люктаськомы, нош заводъёс солэсь сиён-юон лэсьто, наплыксэ будэтон понна пальма вӧй поно. Со зэмос яд, упаковка вылаз гинэ озьы гожтэмын ӧвӧл. Зэм, дуныз 2-3 манетлы ичигес, зэмос йӧллэсь лэсьтэм сиёнэн ӵошатыса. Но калык дунтэмзэ ик басьтэ ук. Бадӟымесь вуз каронъя федерал сетьёс вӧлмыны кутскем бере ӝажыос урод вузъёсын тымиськизы. Туннэ заводъёсты котькӧня кур — магазинъёсын эскеронъёс ӧд ортчыты ке, пальма вӧйлэсь но кӧс йӧллэсь лэсьтэм сиёнъёсты ӧд улля ке, югдур уз воштӥськы.

Милям хозяйствомы гинэ берло 3 толэзь ӵоже 4,5 миллион манет ыштӥз ни. Таӵе югдурен валче кылем ар понна люкаськем пунэмъёсмес туэ но пытсаны ум быгатӥське ай. Кылсярысь, топливолы гинэ но 400 сюрс манетмы ворсамтэ. Пунэмъёс лымы люк кадь будо. Хозяйствоослы ватсаса уксёен юрттэт кулэ. Сотэк быромы. Туэ удобрение 60 тонна сяна ӧм басьтэ на. Эшшо 20 тонналы коньдон висъяломы на. Миым ваньзэ 160 тонна понӥмы вал.

Асдунзэс кулэстоно

Берло дыре Правительствоын но, Гурт удысъя но сиён-юонъя министерствоын но йӧл дун усемен валче ялан ортчыло кенешъёс. Берло 3 толэзь ӵоже хозяйствоос 2 миллиард манет тыр ыштонъёс адӟизы ни ук. Нош йӧл дун ялан синэ. Хозяйствоослы юрттон вылысь 200 миллион манет висъяны чакламын. Мартэ субсидия гуртоос дорозь вуыны кутскоз.

Министрлэсь ужзэ быдэсъясь Ольга Абрамова пусъемъя, берло 2 арня ӵоже йӧллы дун 14 копейкалы йылӥз. Но со дыре ик, кылем арысь та вакытэн ӵошатыса, со 5 манетлы ичигес. Туннэ ужпум пуктэмын: закупочной дунъёсты 21 манетозь вуттоно. «Союзмолоко» огазеяськонысь специалистъёс пусъемъя, йӧллы дунъёсты ӝутыны луоз 2018-тӥ арлэн 2-тӥ палараз. Ольга Абрамова верамъя, заводъёсын гинэ ужано ӧвӧл — хозяйствоослы сюлмаськоно йӧллэсь асдунзэ уськытыны. Йӧллэн асдуныз закупочной дунэн огмында луыны кулэ ӧвӧл, шуэ со. Таин валче азьланяз чакламын уногес юрттыны сыӵе хозяйствоослы, кытын быгатозы йӧллэсь асдунзэ уськытыны. 2019-тӥ арын трос йӧл кыскемез гинэ санэ уз басьтэ, сое кысконлы ӧжыт уксё кисьтыны быгатэмез но учкозы. Субсидилэн быдӟалаез потоз скал уллё бордысь но, шуэ Ольга Абрамова. Туннэ министрлэсь ужзэ быдэсъясь ёросъёстӥ котыръяське, лэчыт ужпумъёсын тодматске. Соос эскеремын луозы 2-тӥ мартэ кылем арлы пудо вордон удысын йылпумъянъёс лэсьтонъя ужрадын.

Елена Сараматова

Туспуктэм: udmurt.ru

Удмурт Дунне
By Удмурт Дунне Март 13, 2018 09:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<