Туэ элькунамы 20-лэсь трос выль модульной ФАП-ёс усьтӥськозы

Удмурт Дунне
By Удмурт Дунне Март 26, 2018 09:11

Выль ФАП-ёс усьтӥськозы 14 ёросъёсын. Озьы быдэсъяське Президентлэн гуртоосты ӟечгес йӧнатыны косэмез.

А. Поздеев

Якшур-Бӧдья ёросысь Чернушкаын усьтӥськиз выль ФАП.

 

Туэ понна нырысетӥез модульной ФАП усьтӥськиз Якшур-Бӧдья ёросысь Чернушка черкогуртын. Татын 800-лэсь трос улӥсьёсыз, 900-лэсь трос адями улэ на вӧзысьтыз Люкшудья гуртын. Та дырозь чернушкаос пу коркан интыяськем медпунктэ ветлӥзы. Со 50-тӥ аръёсы пуктэмын, туж уродмемын. Пушказ кезьыт, выжъёсыз кырыжамын. Туала куронлы тупась тӥрлыкез но ӧй вал.

Кызьы пусйиз черкогуртысь ветеранъёслэн кенешсылэн тӧроез Анна Сунцова, гуртын дасо аръёс возьмазы, ку выль медпункт лэсьтозы. Элькун кивалтӥсьёс доры но ветлӥзы. Миым соослэсь куронзэс кылӥзы. 92 квадрат метр быдӟа модульной ФАП пуктон кутскиз.

Туннэ со ӧсъёссэ усьтӥз ни. Озьы чернушкаослы 2 полэс удалтӥз, шуыны луоз. Нырысь шумпотӥзы вал черкогуртазы егит фельдшер лыктэмлы.

2016-тӥ арын татчы вуиз азьвыл военной фельдшер Анатолий Калугин. Кизнер ёросын вордскем воргорон йылпумъяз Томскысь военной мединститутэз. Моздокын эмъяз солдатъёсты. 7 ар военной медицинской службазэ нуэмез бере дор палъёсаз берытскиз. Чернушкаын фельдшер луыны ӵектӥзы, квартира висъязы, кузпалызлы школаын уж сюриз.

Анатолий Калугинлэн ожгар эмчилы дышетскемез гуртын но туж тупамон луиз. Уго военной фельдшерлы ож бусыын туж ӝог валаны кулэ, мар кароно сӧсырмем солдатэн. Озьы ик татын но. Котькытӥзы мед висёз, гуртоос нырысь ик лыкто медпунктазы, фельдшерзы доры.

Анатолий уен-нуналэн сямен эмъюрттэт сётэ. Ужзэ ӟеч тодэ, котьку учкыны, юрттыны дась, ушъяло гуртоос. Нош туала эмъян тӥрлык ӧвӧл ке, янгышаны но луэ. Табере та ужпум но тупатэмын. Выль ФАП-ын, кылсярысь, сыло вирысь холестеринэз лыдъясь аппарат, дефибриллятор, электрокардиограф, ингалятор. Ваньмыз со юрттэ вакчи дыр ӵоже диагноз пуктыны но адямилэсь улонзэ утьыны. Кылсярысь, фельдшер сюлмыз кутэм муртлэсь дыльдызэ нимысьтыз аппаратэныз чакла, лыдпусъёссэ 3G канал пыр элькун кардиоцентре келя но тодэ, ӧй вал-а солэн инфаркт.

Медпунктын пуктэм компьютер юрттэ ёрос больницаен кусып возьыны. Табере фельдшер арлыдоослы юрттоз пӧртэм врачъёс доры гожтӥськыны. Озьы черкогуртсылэсь 30 иськеме интыяськем ёрос центре ветлэмзы юнме уз луы, врач доры талонэн пырозы ни. Нимысьтыз тупатэм нуналъёсы эмчиос татчы асьсэос но вуылозы.

ФАП-ез пуктон федерал но элькун бюджетъёслы 5 миллион манет тыр усиз. Уксё висъямын гуртъёсты азинтонъя федерал программа чотын. Но ФАП-лэн кулэлыкез коньдонэн лыдъянтэм. Арлыдоослы сяна, со кулэ пиналъёслы но. 2 гуртъёсын соос 350-лэсь трос. Ваньзылэсь тазалыксэс чакласа улоно, прививкаос пуктылоно, висёнъёслэсь вӧлмемзэс алоно.

А. Поздеев

Гуртэ ужаны лыктӥз фельдшер А. Калугин.

* * *

2020-тӥ арозь шаерысьтымы 100-2000 улӥсен ваньмаз гуртъёсын медпунктъёс но амбулаториос кылдыны кулэ. Кытын 100-лэсь ӧжыт адямиез, отысь калык бадӟым гуртъёсы ветлоз. Со сяна, миым сӥзьылысен Удмуртиын ужаны кутскизы диагностикая мобильной центръёс. Гуртэ потыса, нунал ӵоже соос 150-300 адямиосты эскерыны, диагноз пуктыны быгато. Кызьы ивортӥз, Правительстволэн Тӧроезлэн воштӥсезлэсь ужзэ быдэсъясь Анастасия Муталенко, туэ сыӵе техника басьтон понна Удмуртилы Россиысь 41,5 миллион манет висъямын. Кыӵезэ мобильной центрез басьтоно, нырысь ик юалозы ёрос врачъёслэсь. Уго соос ӟечгес тодо, маин ӵемгес висё гуртоос, кыӵе эмчиос но аппаратура уг тырмо районъёсын.

Нош кин ужалоз выль техникаен, выль ФАП-ёсын? Мынозы-а егитъёс гуртъёсы? Таяз радэ Тазалыкез утёнъя министерство аспӧртэмлыко амал малпам. Чернушкаысь выль медпункт усьтонэ Ижысь медициная колледжын дышетскись егитъёсты быдэс автобусэн вайылӥзы. Соос ас синмынызы адӟизы, кыӵе луонлыкъёс кылдытӥсько гуртъёсы мынӥсьёслы. Тросэзлэн адӟемзы но ӧй вал ай ФАП-ёсты. Аспӧртэмлыко экскурсие вуылэмзы бере куд-огезлэн мылкыдзы ӝутскиз ни фельдшер луыса ужаны.

Егит фельдшер, гуртэ мыныса, кытын ке улыны кулэ. Та ласянь пӧртэм луонлыкъёс но амалъёс вань. Элькунмылы туэ 12 квотаос сётэмын «Гуртысь фельдшер» программая. Ёросъёсы мынэм егит эмчиос улон инты басьтыны быгато гуртэз азинтонъя программа чотын. Озьы ик тросаз районъёсын бюджет удысын тыршисьёслы корка пуктыны музъем висъяло.

Тазалыкез утёнъя министрлэсь ужзэ быдэсъясь Игорь Титов верамъя, гуртэ мынӥсь эмчиослы юрттон понна министерство ёрос администрациосын кенешыса ужалоз.

Эдуард Степанов

Удмурт Дунне
By Удмурт Дунне Март 26, 2018 09:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<