Кыӵе визькылъёсты но лэчыт кылъёсты бичаз Кузебай Герд?

Удмурт Дунне
By Удмурт Дунне Март 28, 2018 16:30

Кузебай Гердлэн тросэз учконъёсыз но ӵектонъёсыз, 100 ар ортчемын ни ке но, али но вужмемын ӧвӧл шуыса.

Кузебай Гердлэсь ужъёссэ эскерыку, шер чаклало солэсь пословицаосты но поговоркаосты бичамзэ. Нош та удыс туж тунсыко.

Ачиз К. Герд «Пословицы и поговорки вотяков» ужаз гожтэ, калык вераськонъёсъя люкам бичетъёсаз огазеямын «вотякъёслэн мадиськонъёссы, чакланъёссы (приметы), выжыкылъёссы, вӧськылъёссы но легендаоссы, тужгес бадӟым инты висъямын вотяк кырӟанъёслы. Палэнэ кельтэмын пословицаос но поговоркаос». Солэсь мугзэ автор тазьы валэктэ: палэнысь вуылэм удмурт фольклорез бичасьёслы туж секыт пословицаосты но поговоркаосты огшоры вераськон кылысь висъяны.

Статьяезлэн кутсконаз К. Герд валэктэ, кызьы ӟечгес люкано пословицаосты но поговоркаосты. Со пусъе, «пословицаос но поговоркаос улэп вераськонэн юн герӟаськемын, соосты огвакытэ ваньзы тодо но, уг но тодо, малы ке шуоно соос кылдо но куло вераськон но ужан куспын».

Автор пусъе, тросэз материал Вала но отчы усись Ува но Нылга шуръёс дуртӥ улӥсь Дӧкъя, Уча, Тукля, Жикъя но Ӟумъя выжыосысь вотякъёслэсь бичамын шуыса. Ачиз К. Герд Дӧкъя выжыысь.

Ваньзэ-ӧвӧлзэ со гожтэм 170-лэсь трос пословицаосты. Соос темаосъя люкылэмын: уж, бускельёс, ӵыжы-выжы кусыпъёс, семья, лушкаськон, адями, солэн сямъёсыз но мукет. Ӵапак темаосъя люкылон висъя К. Гердлэсь ужзэ удмурт кылын фразеологизмъёсын вань словарьёслэсь. Озьы ик автор тыршем кельтыны диалектъёсты но.

Тодматом кӧня ке примеръёсыныз:

1. Уж: Ужатэк кӧт уг тыр; Вераны каньыл — ужаны шуг.

2. Бускельёсын но ӵыжы-выжыосын кусыпъёс: Одӥг йырлэн одӥг визьмыз, кык йырлэн кык визьмыз, иськавын-бӧляклэн визьмыз — вань визьлы визь.

3. Семья: Кышнодэ жугиськод — астэ жугиськод.

4. Лушкаськон: Лушкаськись муртлэн киыз кузь; Муртлэнэн кӧтыд уз тыр.

5. Адями, солэн сямъёсыз:

а) Визь: Адямилэн визьмыз — сизьым пӧртэм.

б) Эшъяськон: Азь питран кыти — берыз но оти.

в) Ог-огдэ адӟемпотостэм карон: Коӵышен пуныен кадь уло.

6. Оскон умоезлы, эзельлы, кулонлы: Губрес беризез шонертыны уг лу.

7. Дышетскон шоры учкон: Дышеткем нянь уг куры; Дышеткем мурт — синмо мурт.

8. Пӧртэм: Тӧлтэк писпу куар но уг выры.

Удмурт фразеологизмъёсты утёнын тунсыко луэ Кузебай Гердлэн лыдӟиськон понна «Выль сюрес» хрестоматиез. Отысь куд-ог упражнениос борды ватсамын визькылъёс но мадькылъёс. Кылсярысь:

Оген ужаны шуг. Син кышка, ки ужа. Оген венез но ӝутыны секыт.

Учебнике оглом 30 пала пословицаос пыртэмын. Ӟуч кылэ соос берыктэмын ӧвӧл.

Александр Егоров

 

Удмурт Дунне
By Удмурт Дунне Март 28, 2018 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<