Кун Кенешын: Пунэмъёсты берыктоно, ужбергатӥсьёслы юрттӥськоно

Удмурт Дунне
By Удмурт Дунне 29 марта, 2018 14:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

27-тӥ мартэ Кун Кенешысь депутатъёс люкаськылӥзы 4-тӥ сессиязы. Кенешонэ озьы ик пыриськизы Удмуртилэн Тӧроез А. Бречалов, Правительстволэн Тӧроез Я. Семёнов, валтӥсь федерал инспектор Д. Мусин.

Контрольной комитетлэн кивалтӥсез Б. Сарнаев: кылем арын бюджетысь лушкаськонъёс ӧй вал.

Уж борды

Сессия кутскиз 1 минут ӵоже шып улонэн — депутатъёс буре вайизы Кемеровоысь вуз каронъя «Зимняя вишня» центрын быремъёсты.

Повесткае пыртэм ужпумъёсты сэрттыны-пертчыны кутскемлэсь азьло вазиськонэн потӥз Удмуртилэн Тӧроез А. Бречалов. Нырысь со тау кариз 18-тӥ мартэ президент быръёнъёсты тыро-пыдо ортчытэммы, сюлмын гинэ ӧвӧл, йырвизьмын куара сётэммы понна. Отын ик косӥз: быръёнъёс ортчизы — гижысь-пиньысь кутсконо В. Путинлэсь матысь 6 арлы программазэ быдэстон борды, со чузъяськиз Россиысь Федеральной Собранилы вазиськоназ.

— Посланиын пуктэм ужпумъёсты быдэсъян борды шаермы басьтӥськиз ни, — шуиз Удмуртилэн Тӧроез. — Кылсярысь, промышленной предприятиосмы туала технологиосты кутыны кутско, уката но оборона удысын тыршисьёсыз. Элькунысьтымы вузэз поттыны кутским Россие но, кунгож сьӧры но. Инвестициосты кыскон бордын ужаськом — ваньмыз огкутскемен уг пӧрмы ке но, интыысьтымы вырӟим.

А. Бречалов нимысьтыз вераз пичи но шоро-куспо ужбергатонэз азинтон сярысь. Улон возьматӥз: экономикаын шуг-секытъёс кылдыку, ӵапак со возиськыны юрттэ. Та удысын али шаерысьтымы 22 процентсэ вузъёсты потто, матысь дыре та лыдпусэз ӧжытсэ 35 процентозь йылэтоно.

Удмуртилэн Тӧроез озьы ик дугдылӥз куд-ог сюлмаськытӥсь ужпумъёс вылэ, кылсярысь, тазалыкез утён удысын оптимизация умойтэм ортчытэмын вал. Элькунмылэн берло 9 ар ӵоже пунэмаськемъёсыз 49 миллиард манет пала люкаськизы — сое берыктон сярысь сюлмаськоно. Коньдонэз шыръян вылысь нош ик малпаськоно луоз, пе, чиновникъёслэсь лыдзэс кулэстон сярысь.

Вожвылъяськон иназ мыноз

Мар бордын элькунмылы уката ужано, умой адӟиськиз 2017-тӥ арлы йылпумъянъёс лэсьтонысь. Депутатъёс азе отчётэн потӥзы Удмуртиысь Контрольной комитетэн, Антимонопольной службаен кивалтӥсьёс но Ужбергатӥсьёслэсь правооссэс утёнъя уполномоченной.

Контрольной комитет нимысьтыз чакласа возе, элькун бюджетысь уксё интыяз но пайдаё кутӥське-а. Отысь специалистъёс ар куспын 264 эскеронъёс ортчытӥллям, 90 учреждениосы, организациосы вуылӥллям, соос пӧлын ик 19 министерствоос но мукет кивалтӥсь ёзъёс. Шараямын: элькун бюджетысь 1 миллиард 600 миллион манет умойтэм кутэмын. Лушкаськон учыръёс ӧй вал ке но, я отчётъёс мыдлань лэсьтэмын, я документъёс тырмыт ӧвӧл.

— Уката трос юанъёс кылдӥзы куашкан калэ вуэм юртъёсын улӥсьёсты выль интые выжтон программая, — шуиз контрольной комитетлэн кивалтӥсез Б. Сарнаев. — 2015-тӥ арын ӝутэм коркаос пӧлысь 64 процентаз тырмымтэос шараяськылӥзы, нош 2016-тӥ-2017-тӥ аръёсы — ог 80 процентаз. Пичи Пургалась но Эгралась куд-ог коркаос воксё улыны ярантэмесь вал.

Антимонопольной управление 2017-тӥ ар куспын 440 ӝожтӥськон вуэм, валля арынлэсь со кӧнялы ке тросгес. Ӝутэмын 175 уголовной уж, со пӧлысь 14-ез герӟаськемын кивалтӥсь ёзъёсын, озьы ик лэсьтӥськон, вуз карон, транспорт удысъёсын. Я торгъёс умойтэм ортчытӥсько, я рекламалэн куронъёсыз уг чакласько.

Ведомстволэн кивалтӥсез Михаил Маренников тодэ вайытӥз:

— Россилэн Президентэз 2018-тӥ-2020-тӥ аръёсы конкуренциез азинтонъя план юнматӥз. Вожвылъяськон уката иназ луыны кулэ улон-вылонын юрттэт сётон, гурт удысъёсын, ЖКХ-ын, промышленностьын. Озьы гинэ продукцилэн ӟечлыкез йылыны, дуныз кулэсмыны кутскоз.

Ужбергатӥсьёслэсь правооссэс утёнъя уполномоченнойлэн Александр Прасоловлэн но отчётэзъя валаськиз: быдэстон ужпумъёс трос на. Шуиз: 2017-тӥ арын уполномоченнойлы ужбергатӥсьёслэсь 156 ӝожтӥськон вуиз, правооссэс тӥяло шуыса. Котькуд 4-тӥяз зэмлыкез вылэм. Кылемъёсызлы визь-кенеш сётэмын, документъёссэс шонер лэсьтыны юрттэмын.

— Ужбергатӥсьёслэн тросэз сюлмаськонъёссы пото Россиысь законъёслэн тырмымтэоссы бордысь, — вераз А. Прасолов. — Кылсярысь, али бизнесэн вырисьёсты онлайн-кассаос пуктылыны косэмын. Уката но гуртъёсысь ужбергатӥсьёс ӟудэмын — туж дуно усе со. Нош аппаратсы тӥяськиз ке, сое тупатъятозь, выльзэ басьтоно луоз-а? Эшшо ке онлайн-кассаосты тупатъясь специалистъёс но туж ӧжыт. Вылаз ик, тросаз гуртъёсын Интернет тыро-пыдо ӧвӧл.

Ужбергатӥсьёсты мукет но ужпумъёс сюлмаськыто. Кылсярысь, музъемез арендае басьтон дунъёс 3-4 поллы йылэмын, вытъёс пачкато. 42 процентэз ужбергатӥсьёс шуо: ужзы сылэ.

Депутатъёс отчётъёсты бадӟым тунсыкен кылзӥзы, юанъёссы но кылдӥзы. Кылсярысь, депутатэз Ф. Юнусовез сюлмаськытэ эмъяськонлэн дунын луэмез.

— Эскеронъёс возьматӥзы, дунын эмъюрттэт, зэмзэ но, араз 3-4 процентлы йылэ, — пусйиз Контрольной комитетлэн кивалтӥсез Б. Сарнаев.

Депутат В. Бодров вазиськиз Антимонопольной управленилэн кивалтӥсезлы:

— Йӧл дунъёс туж зол усемын. Оло, переработчикъёс куспазы вераськизы дунзэ кулэстон вылысь?

М. Маренников верамъя, солэн управленияз та пумысен нокин ӧз ӝожтӥськы бере, эскеронъёс ортчытымтэ.

Дунтэм музъем но субсидиос

Сессиын эскерем 10 ужпум пӧлысь 5-ез герӟаськемын вал законъёслэн проектъёсынызы. Кылсярысь, 1-тӥ лыдӟемен депутатъёс ватсанъёс пыртӥзы адямиослы дунтэк музъемъёс люкылонэн герӟаськем законэ. Законлэн проектаз пусъемын, кинъёсты лыдъяны луоз музъемлы кулэяськисен, кыӵе документъёс та понна дасяно но мукет.

Но али вераны туж шуг, пе, луозы-а со музъемъёсын коммуникациос. Гурт удыс понна кыл кутӥсь ялан ужась комиссилэн кивалтӥсез В. Варламов верамъя, та ужпумез азьланьын эскероно луоз.

2-тӥ лыдӟемен воштонъёс пыртэмын «Удмурт Элькунысь гурт удысэз азинтон сярысь» законэ. Табере субсидия басьтон понна элькунысьтымы гурт предприятиослэн регистрацизы Удмуртилэн палэназ но луыны быгатоз.

Элина Кумачёва

Удмурт Дунне
By Удмурт Дунне 29 марта, 2018 14:00 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<