Кун Кенеш: Депутатъёс шып улӥзы

Туннэ Кун Кенешысь депутатъёс люкаськылӥзы 4-тӥ сессиязы. Кенешонзэс соос мытӥзы 1 минут ӵоже шып улонэн.

Удмуртилэн Тӧроез Александр Бречалов вераз: элькунысьтымы вань вуз каронъя центръёсын но мукет трос калык люкаськылон интыосын эскеронъёс ортчозы.

Сессие люкаськем депутатъёс буре вайизы Кемеровоысь вуз каронъя «Зимняя вишня» центрын быремъёсты. Кун Кенешлэн Тӧроез Алексей Прасолов вуз каронъя центръёсты эскеронэз уката юнматон понна дурбасьтэмзэ вераз.

— Малпасько, трос калык люкаськылон интыосты пуктыку ик, эскеронъёс луыны кулэ ни: умой-а быдэсъясько лэсьтӥськонъя куронъёс, кыӵе материалъёс уже кутӥсько, — шуиз Алексей Михайлович. — Жаляса верано, юртъёслы проект дасяку но, сое ӝутыку но, МЧС-ысь специалистъёслэсь мылкыдзэс-дунъетсэс уг юало. Соин ик юртэз пуктэм бере гинэ тодмо луэ ни: марысь мар ке, отысь потыны но уг луы, ӧсъёс но уг усьтӥсько. Та тырмымтэос медаз луэ шуыса, ваньзэ чаклано ни, проект дасяку ик.

Нунал талэсь азьло Удмуртилэн Тӧроез Александр Бречалов вераз: элькунысьтымы вань вуз каронъя центръёсын но мукет трос калык люкаськылон интыосын эскеронъёс ортчозы.

Элина Кумачёва

Туспуктэм: udmgossovet.ru