Кемерово: Простить каре, нылпиос…

Удмурт Дунне
By Удмурт Дунне Март 29, 2018 13:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

25-тӥ мартэ Кемеровоысь «Зимняя вишня» вуз каронъя центрын тылпу потэмен, 64 адями быриз, пӧлысьтызы 41-ез — нылпиос. 76 адями эмъясьёс доры, юрттэт курыса, вазиськиз.

Ижысь Шор площаде калык лыктӥз, кемеровоосын огъя луэмзэ возьматыса.

Быремъёсты буре вайыса, 28-тӥ мартэ Россиын ялэмын вал кайгырон нунал. Пӧртэм городъёсын «Кемерово, ми тонэн» ужрад ортчиз. Бордазы итӥськиз Удмурт шаермы но. Удмуртилэн Тӧроез Александр Бречалов мур куректэмзэ вераз тылпу дыръя быремъёслэн ӵыжы-выжыоссылы. 27-тӥ мартэ Ижысь Шор площадьысь бадӟым экран дорын шаерысьтымы кивалтӥсьёс, городын улӥсьёс сяська керттэтъёс понӥзы, сюсьтылъёс ӝуатӥзы, нылпи шудонъёс вайизы. 28-тӥ мартэ, быремъёсты буре вайыса, инме тӧдьы шаръёс лэземын вал, нош водительёс 1 минут ӵоже сигнал сётӥзы.

Ужрад борды шаерысьтымы ёросъёс но итӥськизы. Кылсярысь, Якшур-Бӧдья черкогуртысь культурая юрт азьысь кызьпу выжые ёросын улӥсьёс сяська керттэтъёс но нылпи шудонъёс тыризы, ӝытазеяз тӧдьы шаръёсты инме лэзизы.

Кемеровоын выллем шимес учыръёс медаз луэ шуыса, шаерысьтымы Прокуратураын но тылпулэсь утиськон ёзъёсын ужасьёс вуз каронъя центръёсты но трос калык люкаськон интыосты 28-тӥ мартысен эскерон борды басьтӥськизы. Шаерысьтымы прокуратуралэн пресс-службаен кивалтӥсь Олеся Федчишина ивортэмъя, та ужез 16-тӥ апрелёзь йылпумъяны кулэ.

2 арня куспын 100-лэсь трос учреждениос эскеремын луозы. Со сярысь ивортӥз Россиысь МЧС-лэн Удмурт Республикая Валтӥсь управлениеныз кивалтӥсьлэн воштӥсезлэсь ужзэ огдырлы быдэсъясь Дмитрий Одегов.

— Ужбергатӥсьёсты соку ик алэме потэ, шаерысьтымы вуз каронъя центръёсын но трос калык люкаськон интыосын 2 арня ортчем бере но эскерон ужъёс азинтэмын луозы, — шуиз Дмитрий Александрович.

Берло дыре вуз каронъя центръёс быдэс Россиын губиос выллем ӝутскизы. Тросэз соос законэз но тылпу кысӥсьёслэсь куронъёссэс тӥяса пуктӥсько. Вазенгес выль пуктэм юртъёслы дунъет сётонэ Госпожнадзор но пыриськылӥз, но 2007-тӥ арысен со та ужлэсь палэнтэмын. Выль законъя Госпожнадзор соос доры эскеронъёсын вуыны быгатэ, 3 ар ортчыса гинэ. Ӵем дыръя 3 ар куспын юртлэн кузёез ик воштӥське, корка пуш но выльдӥське. Жаляса верано, ӵем дыръя сыӵе выльдонъёсты проектэ уг пырто.

 

Покчи ужбергатӥсьёслы ужаны люкетонтэм вылысь 2016-тӥ арын 1-тӥ январьысен улонэ пыӵаны кутскиз вал «надзорные каникулы» закон. Кызьы ивортӥз Дмитрий Одегов, куд-ог кескич ужбергатӥсьёс бадӟым вуз карон юртъёссэс пичи висъетъёслы люкизы. Вуз каронъя центръёсын арендаторъёс трос луэмын, ваньзы соос асьсэ вузаськон сэрегзы понна гинэ кыл куто, нош огъя юрт понна кыл кутӥсьёс уг шедё ни.

Юртъёс пуктӥсько, куронъёсты чаклатэк, борддоръёс, куд-ог дыръя быдэс юртъер лэсьтӥське ӝуаны сётӥськись материалъёслэсь. Вуз каронъя центръёсын ужась адямиосын нокыӵе валэктон уж уг ортчы. Шуг-секытъёс кылдон дыръя адямиослы нырысетӥ юрттэт сётыны быгатӥсьёс ӧвӧл.

Ижысь вуз каронъя центръёс пӧлын но котькыӵеез вань. Озьы 2015-тӥ арын «Италмас», 2016-тӥ арын «Три банана» ӝуазы. Умоен пусйыны луоз «Петровский» центрез. Вуз каронъя центрын котькуд этажысен кыре потыны луонлык вань, одӥгез но силёен тырмытэмын ӧвӧл, ӧсъёс ваньмыз усьясько.

Ужбергатӥсьёсты, пе, кужмысь итыны уг луы дежурной диспетчеръёслэн огъя службазы (ЕДДС) борды. Туннэ нуналлы та ёз борды меӵак герӟамын вань нылпи садъёс, школаос, больницаос. Тылпу потон, ӵындон учыръёсы ивор ӝегатскытэк вуэ та службае.

Адямиосты асьсэдыз сакгес кариськыны куро. Бадӟым центръёсы пырыса, запасной ӧсъёсты эскероно. Соос пытсамын ке, администрациын ужасьёслы, усьтыны курыса, вазиськоно, калыклэсь верамзэ кылэм-адӟем ке уг каро, надзорной органъёсы ӝожтӥськон гожтоно.

Валентина Емельянова

Туспуктэм: udmurt.ru

Удмурт Дунне
By Удмурт Дунне Март 29, 2018 13:40 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<