К. Герд нимо музейын куэм шобретъёсын адӟытон усьтӥськоз

Туннэ, 1-тӥ оштолэзе, К. Герд нимо музейын усьтӥськоз куэм шобретъёсын адӟытон. Отын возьматэмын луозы Киужъёсъя элькун центрлэн «Куиськон крезь» проектэзлэн емышъёсыз. Ужрад кутскоз 14.00 часын.

— Та проектлэн таӵе малпанэз: улӟытыны вашкала ковёръёсты. Малы ке шуоно Киужъёсъя центрамы берло дыре тросгес лэсьтыло вал ни панноос, соос квартираосысь борддоръёсы мед тупалозы но калыклы басьтыны туж ик дуно медаз усьы шуыса. Ӵемысь панноысь панное одӥг пужы выжени вал — со легезьпу сяська, — вера Киужъёсъя элькун центрысь куиськись Татьяна Тихонова.

Озьы ёросъёсысь кибашлыос экспедициосы потазы, выль пужыос утчазы но шобретъёс куизы. Оглом кылдытэмын 30 ковёр. Ваньзэ адӟыны луоз К. Герд нимо музейысь, адӟытон кыстӥськоз 25-тӥ южтолэзёзь. 0+

Мария Векшина