Гын сапеген хоккей шудонын вормиз «Татарбазар-Торпеда»

Ангелина Снигирева
By Ангелина Снигирева 19 марта, 2018 10:17

Шудо «Автик» («Нефтяник») но «Микрорайон Столичный» командаос

Толон Ижын гын сапеген хоккей шудонъя чемпионат йылпумъяськиз.

Отын вормиз Ленин ёросысь «Татарбазар-Торпеда» команда. Озьыен, та ёросын пуктэмын луоз хоккеен шудонъя коробка, нош май толэзе команда мыноз Даниын ортчоно хоккеен шудонъя дуннеысь чемпионатэз учкыны.

Вераны кулэ, финалэ сюрон понна ӵошатсконъёс ортчизы городысь котькуд ёросын. Отчы пыриськиз 18 команда. Вормон понна нюръяськизы асьсэ ёросазы кужмо луэм 5 командаос. Соос асьсэлы ёросысьтызы тодмо интыя ним бырйизы. Озьы финалын шудӥзы Первомай ёросысь «Социк», Октябрь ёросысь «Холмы-Бугры», Ленин ёросысь «Татарбазар-Торпеда», Устинов ёросысь «Автик» («Нефтяник»), Индустриальной ёросысь «Микрорайон Столичный» командаос. Котькудӥз команда чемпионатлэн финалаз быдэн 4 матч шудӥз.
Шудонъёс ортчизы
Шор площадьын. Командаос понна висьыны вуизы соослэн эшъёссы, ӵыжы-выжыоссы. Тужгес пӧсь висисьёссы вал «Микрорайон Столичныйлэн». Соос плакатъёс ваизы, мылкыдэз бурдъясь кылъёс кесяськизы, дымбыртонэн шудӥзы. Учкисьёс пӧлын данак вал пичи нылпиос, соос атайёссы понна туж зол висизы. Угось бубыоссылэн вормонзы бордысь потӥз: кылдоз-а ёросазы хоккеен шудонъя туала коробка.

Тужгес зол висизы «Микрорайон Столичный» команда понна

Ӵошатскон пӧсь вал

Ӟечкылало командаослэсь капитанъёссэс

— Татын шудӥзы милям кузпалъёсмы, атайёсмы. Соос пиналъёссылэн ӵуказе нуналзы понна туннэ вань кужмысьтызы шудӥзы, — веразы Индустриальной ёросысь командалэн висисьёсыз.
Ӵапак соос данъямын вал «Тужгес устоосыз висисьёс» нимын. Та сяна, нимысьтыз пусъемын вал устоез капка возьмась, тужгес трос гол пыртӥсь но тунсыко нимын команда.

Ангелина Снигирёва

Ангелина Снигирева
By Ангелина Снигирева 19 марта, 2018 10:17