Григорий Головкин. Шундыен кыкнамы. Верос

Удмурт Дунне
By Удмурт Дунне 28 марта, 2018 17:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Григорий Головкин Алнаш ёросысь Усо гуртысь Г. Головкин фэнтези гожъя. Солэсь мукет ужъёссэ лыдӟыны луэ ficbook.net бамын.

Шундыен кыкнамы

Нырысетӥ люкет

Ӵукна вазь ик мон потӥ чорыганы, кема возьмай та нуналэз, малы ке шуоно арлы одӥг пол гинэ дыры вань, визнан кутыса, шур дурын гань-гань пукыны. Шур дуре мон уг лыктӥськы трос чорыг кутыны, ял кареме потэ. Утчасько шыпыт инты, кытын вунэтӥсько уже сярысь, ас малпанъёсы пӧлы выйисько — тани мар кулэ мыным шутэтскон нуналъёсы. Тодӥськоды ук, тросэз, кема но трос ужаса, ял карытэк алама малпанъёсын улыны кутско. Мон тани «кулӥ ке, мар луоз?» юанъёсын йырме поромытӥсько.

4 часэ ӵукна ик султӥ, быдэс нуналлы сиён пӧзьтӥ, визнанъёсме дасяй, нумыр бичай. Фух. Потоно. Куазь туж пӧсь кариськиз, 28-29 градус, шундыӝужан палась пичияк тӧл пельтэ. Шур дурын шыпыт, ву вылэ учкыны ик уг луы — син мальдэ. Шумпотымон, вӧзам нокин но ӧвќл. Визнанме дасяй, вуэ куштӥ но, музъем вылэ ик пуксьыса, возьмасько… 5 минут…10 минут…15 минут… Пичи дырысеным чорыганы ветлӥсько ини, дышетэмын, чидасько. Пал синмыным кыдёкысь пилемъёс шоры учкыса, мукетэныз пукыме возьмаса, выйи малпанъёсам.

Пукисько-пукисько… Бац!.. Йыр вылтӥм ик фея лобӟыса ортчиз. Паймыса ангэсы пыдесам ик шуккиськиз, оло. Кема малпаськытэк, кезьыт вуэ тэтчи, оло, сайкисько. Уйвӧт та яке пӧртмаськон. Фея вӧзысьтым ог 15 метр кемын, бадӟым-бадӟым из сьӧры ышиз. Мон — фея сьӧры. Вуи из доры но каллен гинэ учкисько. Номыр уг адӟиськы. Нош бурдъёслэн лопыръямзы кылӥське. Изъёс сьӧрысь золгес мичкиськыса, адӟисько таӵе суредэз: меӵ гурезь выжыысь кык изъёс асьсэ понназы вырӟизы, озьы гурезь пушкы пырон усьтӥськиз. Тае адӟыса, кутски ук асме чепылляны. Толыкез ӧй вал. Фея усьтӥськем ӧсэтӥ лобӟыса пыриз гинэ но, изъёс ӵоктаськыны кутскизы. Мон бызьыса фея сьӧры. Фух… Берпалме пичи гинэ ӧй пачкаты! Пырыса мырдэм вуи!

Гурезь гырк быдэсак люгыт (югыт), борддоръёс кузя теннисэн шудон туп быдӟаесь пичи шундыос тыремын. Визьтэм кадь, огез доры матэктӥ но бордаз йӧтски — уг суты, небыт. Нош кык киыным ӵоктай но, быдэс мугоры яркыт пиштыны кутскиз. Тазьы шудонъям фея тю-тю-па ышиз.

Суредаз Анна Бурдина.

Бызьыса гурезь гырк кузя кошки, пумаз мар ке пиштэ. Кӧнятӥзэ туннэ абдрасько ини? Син азям усьтӥськиз бадӟым тудвозь но йыр поромымон чебер гурт. Нялыш (нялмыт) гурезь — ӝужыт ик ӧвӧл — коркаос со кузя пырак улӥысен выллань одӥг урамен тубо. Вань коркаос яркыт буямын, котькудӥз — аслаз буёлэныз, чеберъямын пӧртэм чильтэръёсын. Кӧшкемыт. Феяос лобало. Кызьы соос монэ ӧз на адӟе? Сылӥсько долкаса, нош йырам малпан: кызьы мон татысь потыны быгато? Тодмай адӟем феяме. Яркыт вож дэремен со. Бызисько дораз, кызэмъяськисько, шултыны но тыршисько — мед гинэ монэ кылоз. Тани-тани суто ини… Йырберам мар ке но сачак вуиз, мон уси.

Сайкай: мон пукон бӧрды думылэмын. Котырак феяос асьсэ сямен верасько.

— Эшъёс, лэзе, мынам доре бертоно, — шуисько.

Ваньзы шугмизы, ваче вераськытозязы, мынэсьтым сайкамме валатэк кылиллям.

— Мар понна думылӥды? Лэзе, — мозмытскыны турт-тӥсько.

— Тон кин сыӵе? Кытысь вуид?

Тодмо кылын вераськемзэс кылыса, мон пумитазы номыр вераны но ӧй быгаты ини….

2-тӥ люкет

Камераын дуркак пеймыт луиз.

— Нош ик юасько, кин тон сыӵе? — юа огез фея.

— Адями, — гуньдыса вази мон.

Тае кылыса, бурдопиос ваче керетыны кутскизы. «Всё! Баста!» — малпай мон.

— Кызьы татчы вуид? — нош юало.

— Ачим но ӧй вала… Адӟи лобась нылашез но сьӧраз мынӥ.

— Мар? — валатскизы соосыз.

Ваньзы интыысьтызы тэтчыса вырӟизы, монэ комнатае огнаме кельтӥзы. Бӧрдыса пукисько. Мар меда карозы? Быриськиз та! Син азьтӥм быдэс улонэ ортчиз кадь.

Кӧня ке улыса, бурдопи дорам пыртӥз кык феяосты. Огез лыз дэремен, нош мукетыз — вож — ӵапак таиз сьӧры мон лыктӥ вал татчы. Бурдопи юа:

— Кудзэс ке тодмаськод-а?

— Вож дэремензэ.

Со феялэсь ымнырзэ кулытозям табере уг вунэты ни. Синъёсыз кышкатскизы. Бамыз кузя бадӟым синкылиосыз вияны кутскизы. Сыӵе чебер пӧрмослэн улонэз чигиськиз. Лыз дэремен феяез лэзизы, камерае кылимы 3 кузя. Бурдопи монэ пертчылӥз но вераны кутскиз:

— Милям дуннеямы асьмелэн катъёсмы, ми улӥськом адямиослэсь палэнын, соослэсь пегӟыса. Гурезьгыркысь милемлы потыны яра куд-ог ужъёс понна гинэ. Соку но адямиосын пумиськылыны, вераськыны но соослы адӟытскыны уг яра. Кин та куронъёсты сӧриз — со виемын яке изгыркысь уллямын луоз. Тӥ кыкнады ик ӵуказе виемын луоды.

Со кисыысьтыз пулэсь лэсьтэм кык зундэс поттӥз. Одӥгзэ вож феялэн чиньыяз понӥз. Нылашлэн мугорыз соку ик зубектыса кошкиз. Тани бурдопи лыктӥз мон доры но мыным но зундэс понӥз. Соку ик чиньыям котырак веньёс бышкалтӥськизы. Зундэсэз куштыны уз луы ини. Улэм потэмысьтым, мон ӝот-ӝот вази:

— Нош мон соглаш ӧвӧл тӥляд вераменыды!

— Уске ортчод пӧртэм шуг-секытъёс пыр, улэмед потэ ке. вормид ке, ми тонэ милям дуннеямы улыны кельтом.

— Мон но соглаш ӧвӧл, — кеськиз фея.

— Тон но со сюресэз ортчод! Возьмалэ, ваньмыз дась луиз ке, мон лыкто тӥ дуре, дасяське.

Бурдопи кошкиз но, вуизы солэн юрттӥськисьёсыз, вайизы кык валес. Уй вуэ ни. Фея мон пала тыбырыныз берыктӥськиз. Возьытме кутыны быгатытэк, дунне пыдсы пегӟеме потэ. Дыр ортчемъя борддорысь югыт пиштӥсь тупъёс бездӥзы но толэзь сямен пиштыны кутскизы. Пыд улам учкыса, возьытме вормытэк, вази:

— Курисько: вождэ эн вай!

Мар луоз ӵуказе?

3-тӥ люкет

— Кызьы тынад нимыд? — юай мон феялэсь.

— Малы со тыныд кулэ?

— Нууу… йырдэ кур эн кары, мон уг малпаськы вал, тазьы пӧрмоз шуыса.

Фея сылэ, борддорысь толэзь кадь пиштӥсь тупъёс шоры учкыса. Дэремез солэн каллен гинэ пиштэ, феяослэн дэремъёссы мылкыдзыя я яркыт, я бездыт луо.

— Милемлы уг яра вераськыны адямиосын, — шуиз бурдоныл.

— Малы?

— Тӥ, адямиос, туж уродэсь, тӥ быдтӥськоды та музъемез. Кӧня ар ӵоже тӥ сое кырсёмытыса улӥськоды ини, тӥ узырлыкез кыскыны гинэ быгатӥськоды, нош сётыны — уд.

Мон ӧй тоды мар вераны та кылъёслы пумит. Со шонер вера ук. Нырме ошыса сылӥсько.

— Мар карозы милемын? — юай.

— Оскыты калыкез, тон ми дорын улыны кулэ шуыса. Сотэк тонэ виёзы. Монэ но.

Та кылъёсты кылыса, мон дыльдыеным воньдӥ. Озьы уг яра, мынам улэме потэ на…

— Ойдо ӵошен, озьы милемлы капчигес луоз та югдурысь потыны, — верай мон сюлэмшуген.

— Ойдо, — соглаш кариськиз со.

— Озьыен, кызьы тынад нимыд?

— Шунды, нош тынад?

— Инбам.

— Тыныд кизилилэсь нимзэ понӥллям, кудӥз инбамын пиштэ?

Вуиз ӵукна. Камерае пыризы бурдопиос, думылӥзы милемыз но нуизы гуртазы.

— Тон, адями, пырид милям улон интыямы, катэз тӥяса, тон ӧд пумиськы милям утисенымы, кудӥз лэзе пырыны эксэй музъемамы. Нош тон, Шунды, ӧд адӟы, сьӧрад кин ке мынэ шуыса. Соин ик тӥ кулэ музъеммес утисенымы пумиськыны, со ик вералоз, яра-а тӥледлы та югыт интыямы улыны, — шуиз фея-прокурор.

Ми сылӥськом сюбег площадьын, кык палтӥз сое котырто ӝужыт коркаос, нош мукет кык палтӥз — сюресъёс. Бур палась, ӝужыт корка сьӧрысь, шуак лобӟыса потӥз адӟылымтэ пӧйшур. Маиныз ке но со кельше азьдагалы, маиныз ке но — ӟозлы.

Тӥни кыӵе со, утись!

4-тӥ люкет

Вань кылъёс верамын, вань кырӟанъёс кырӟамын. Мон бызисько шонерак азьдага шоры, пель сьӧрам Шунды мар ке черекъя, но мон сое уг кылӥськы, малы ке шуоно син азьтӥм али улонэ ортче, кӧняетӥзэ меда ини.

— Мон лыктӥ аламазэ малпатэк-тодытэк, лэзь милемыз. Тон визьмо ук, Шундыез коть лэзь, со янгыш ӧвӧл, — верай мон бурдоослэсь музъемзэс утисьлы, нош ачим курдаса куалекъясько.

— Тон, уд кышкаськы-а, мар-а? — черекъяны кутскиз вал азьдага, но малпаськонэ усиз… — Хм… Яралоз, тон астэ умой паласен возьматӥд, со понна мон оско тыныд но лэзё Шундыез, нош тон али ик дорад вуод, — озьы азьдага усьтӥз бадӟым-бадӟым ымзэ, мон шокчыса ик ӧй вуы, со пушкын вал ини.

Чик но ӧй малпа вал, улонэ тазьы быроз шуыса, мон малпасько вал улэп кыльыны.

Сайкай шур дурын, оло изиськем, оло шунды йырам шуккем. Нош со куспын гадь вылысьтым таӵе суредэз адӟисько: богомол кутэм туж чебер вож дэремо вукарнанэз но сое сиыны малпа. Мон богомолэз кышкатӥ, нош вукарнанэз лэзи, со тау кариз, потӥз мыным.

Тэтчыса султӥ, бызьыса мынӥ гурезьгырк доры — номыриз ӧвӧл, одӥг пытьы но. Вӧт адӟиськем, лэся.

Бичай визнанъёсме, бер-тӥ дорам. Ӝыт пал вал ини, ярдурын быдэс нунал ортчиз, сое ортчытӥм кыкнамы — мон но шунды. Конечно, одӥг чорыг но мон ӧй куты, но со понна чебер вӧт адӟи, сое мон ноку но уг вунэты.

Дорам дӥсьме воштэме бере мон шӧдӥ: чиньые висе. Учки но — зундэс! Сое мыным уйвӧтам дӥсязы камераын, со али но чиньыме бышке. Мон соку ик интыысьтым тэтчи но бызьыса шур дуре кошки….

 

Удмурт Дунне
By Удмурт Дунне 28 марта, 2018 17:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<