Егитъёс пудо эмъязы, геры тупатъязы

Удмурт Дунне
By Удмурт Дунне Март 7, 2018 12:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиын ортчиз Егит профессионалъёслэн чемпионатсылэн элькун этапез. Ссузъёсысь егитъёс 4 нунал ӵоже, 1-тӥ-4-тӥ мартэ, ужаны быгатэмзэс возьматӥзы. Асьме дорын таӵе вожвылъяськон 3-тӥ арзэ радъяськиз ни.

Егит профессионалъёслэн чемпионатазы пыриськизы Можгаысь ветколледжысь студентъёс но.

25 удыс

Арысь аре Егит профессионалъёслэн ӵошатсконзы бордаз тросгес но тросгес студентъёсты кыске. Туэ ужаны быгатэмзэ возьматӥз 234 студент, соосты эскеризы Россиысь но Удмуртиысь ог 300 дунъясьёс. Егитъёс 25 удысъёсъя — машина лэсьтон, дышетон, пудо эмъян, нянь пыжон, ужбергатон, йырси ӵышкон, сваркаен ужан но трос мукет — вожвылъяськизы. Ӵошатсконъёс ортчизы Ижын, Глазовын, Можгаын, Сарапулын, Уваын, оглом вераса, 15 ссузъёсын. Туэ нырысьсэ ӵошатскон мынӥз эскурсиос радъясьёс пӧлын но. Со туала улонлэн куронэз, угось ошмесо шаерамы туризмез азинтыны выриськомы, валэктӥзы чемпионатэз радъясьёс. Удмуртиын ортчем вожвылъяськонын асьме егитъёсын артэ быгатонлыкъёссэс возьматӥзы Санкт-Петербургысь, Омскысь, Томскысь, Челябинскысь вуэмъёс но.

— Чемпионатлэн валтӥсь ужпумез — ужась адямилэсь данзэ будэтон, егитъёсмылэсь быгатонлыкъёссэс дуннеын пуктэм куронъёслы тупамон карон, — шуиз дышетонъя но наукая министр Светлана Болотникова.

Конкурслэн пайдаез син азьын: егитъёсмылэн нимъёссы Россиын чемпионатъёсын гинэ ӧвӧл, дуннеын но тодмо ини. Кылсярысь, кылем арын Абу-Дабиын ортчем вожвылъяськонын системной администрирование удысъя ваньмызлэсь устоез луиз Ижысь студент Леонид Шмаков. Та сяна, чемпионатэ пыриськись егитъёслэсь быгатонлыкъёссэс дунъяло Удмуртиысь но Россиысь предприятиосысь адямиос. Со луонлык сётэ ӟеч ужан инты шедьтыны.

Устоосыз быръемын

Сваркаен ужаны быгатэмзэс егитъёс возьматӥзы Глазовысь аграрно-промышленной техникумын. Россилэсь флагзэ кирпичлэсь ӝутӥзы Ижысь лэсьтӥськонъя техникумын. Нянь пыжизы Ижысь вуз каронъя но экономикая техникумын. Висись адямилы юрттэт сётӥзы Ф. Пушина нимо медицинской колледжын.

Ижысь машиностроительной техникумын чемпионат 3-тӥ арзэ ортчылэ ни. Нырысь татын 1 амалъя вожвылъяськон радъяськылӥз, табере — 3.

Туэ нырысьсэ егитъёс быгатонлыксэс эскерыны быгатӥзы ювелирной ужъёсъя. Азвесьлэсь пӧртэм арбериос быдэстэмзэ возьматӥз 6 мурт. Вераны кулэ, быдэс Приволжск федерал округын, асьме дорын сяна, ювелирлы нокытын уг дышето. Ижысь машиностроительной техникумысь егитъёс ювелир, гравёр луыса пото.

Можгаысь ветеринарной колледжын чемпионат 2-тӥ арзэ ортче ни. Туэ пудо эмъяны быгатэмзэс возьматӥзы колледжысь 5 студент но Татарстанысь лыктэм 1 мурт.

— Конкурсэз ортчытэмлэсь азьло трос ужано луиз. Олимпиада ортчытӥм, чемпионатлы дасяськыны юрттӥзы дышетӥсьёс, студентъёс асьсэ коже но трос ужазы — со понна классъёсамы нимысьтыз тӥрлык дасямын вал, озьы вожвылъяськонэ устоосыз гинэ сюризы, — вера Можгаысь ветеринарной колледжлэн кивалтӥсезлэн воштӥсез Наталья Обухова.

Вожвылъяськонэ пыриськизы бадӟым курсъёсысь студентъёс, угось чемпионат трос тодэмез, быгатэмез кулэ каре. Кылсярысь, егитъёс кунянлэсь, пунылэсь, кроликлэсь, куреглэсь висёнъёссэс эскеризы, УЗИ лэсьтӥзы, котькудӥзлы, адямилы сямен, висёнъёссыя карта дасязы но мукет. Та удысъя тужгеч ӟеч тодон-валанзэ возьматӥз Можгаысь пудо эмъянъя колледжысь 3-тӥ курсысь Анна Стерхова.

Ува колледжысь студент Д. Хоробров тракторен ужаны умой быгатэ

Удмуртиысь гурт удыслы специалистъёсты дасясь колледжъёсысь студентъёс тракторен ужаны быгатэмзэс возьматӥзы Уваысь колледжын. Отчы люкаськизы Асанысь, Сюмсиысь, Глазовысь, Сарапулысь, Можгаысь но Ижысь ссузъёсысь 12 егитъёс.

— Ӵошатсконэз дорамы 3-тӥ арзэ ортчытӥськом ни, — вераз колледжлэн кивалтӥсезлэн воштӥсез Анастасия Чайникова. — Адӟиськомы, студентъёс арысь аре кужмогес луо. Чемпионатэ пыриськем егитъёслы капчи ӧй вал: соос тракторен кизьыны герыез дасязы, жаткаез тупатъязы, тракторлэсь топливной системазэ эскеризы.

Жаткаез юромо чемпионатлы шуыса висъяз «Интерпартнёр» предприятие. Со вормисьлы 5 сюрс манет премия но сӥзиз. Та амалъя кужмоез луиз но кузьым утӥз Уваысь профессиональной колледжысь Денис Хоробров.

Чемпионат улсын колледжын радъямын вал гурт удысъя профессиосын тодматскон, пќртэм мастер-классъёс. Отчы вуылӥзы артысь ёросъёсысь — Вавожысь, Сьӧлталась, Сюмсиысь — ог 400 пиналъёс.

Август толэзе Сахалин улосын ортчоз WorldSkills чемпионатлэн финалэз, со азьын егитъёсты эшшо сӥс пыр поттозы на — нимысьтыз отборочной этапъёс радъяськозы.

Ангелина Снигирёва

 

Удмурт Дунне
By Удмурт Дунне Март 7, 2018 12:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<