Бюджетлэсь доход люкетсэ йылэтыны луиз

Удмурт Дунне
By Удмурт Дунне Март 5, 2018 11:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

27-тӥ феврале Кун Кенешлэн 6-тӥ ӧтчамезлэн 3-тӥ сессиез ортчиз. Солэн ужаз пыриськизы Удмуртилэн Тӧроез Александр Бречалов, Кун Думаысь депутатъёс.

Бадӟым саклык висъямын бюджетэ воштонъёс пыртонлы.

16 ватсан

Сессия оглом 25 ужпум эскериз. Валтӥсез — республикалэн туэ арлы бюджетаз ватсанъёс пыртон. Удмурт Республикалэн 2018-тӥ арлы бюджетэз сярысь законэ воштонъёсын депутатъёсты тодматӥз коньдон ужпумъёсъя министр Станислав Евдокимов.

— Бюджетлэн доход люкетэз 3 миллиард 495 миллион 759 сюрс манетлы будӥз. Мар чотын? Бадӟым люкетэз — федерал бюджетысь ватсаса вуэм коньдон но 2017-тӥ арлэсь кылем целевой уксё. Со сяна — огазеяськонъёслэн прибыльзылы выт (1 миллиард 872 миллион манет), кудӟытӥсь суретъёслы акцизъёс (163 миллион манетлэсь трос), капчиятэм системая выт бичан (300 миллион манет). Федерал бюджетысь ватсаса 1 миллиард 159 миллион манетлэсь трос вуиз на.

Кытчы кошкоз коньдон? Нырысь ик, 590 миллион манет ватсалозы семьяослы но нылпиослы юрттон понна (164 миллионлэсь трос висъяськоз 8-тӥ классозь вань пиналъёслы учебникъёс басьтонлы, 50 миллионлэсь тросэз — нылпиосты школаын сюдонлы но мукет ужъёслы). Ватсаса коньдон висъяськоз тазалыкез утён удысэ — секыт висисьёслы эмъюмъёс басьтонлы (202 миллион манет), нырысетӥ пинал вордӥсь семьяослы пособиос тыронлы (167 миллион манет), сюрес лэсьтонэ но трос мукет.

Оглом учконо ке, бюджет сярысь законэз 2-тӥ лыдӟон азьын 16 пӧртэм ватсан пыртэмын вал. Доход люкетэз тросэтӥ герӟаськемын ке вал федерал бюджетысь ватсаса коньдон вуэмен, расход люкетэз трослы будӥз, чагыр эстӥськон кысконлы, сюрес лэсьтонлы коньдон чакласа. Нялтас вераса, туэ кутэм бюджетлэн расход люкетысьтыз 730 миллион манетэз мыноз «Кышкыт луисьтэм но ӟеч сюресъёс» проектэз пыӵатонлы.

Озьы, вань тупатонъёсты лыдэ басьтыса, республикалэн туэлы бюджетэзлэн доход люкетэз 68 миллиард 222 миллион манет луиз, расход люкетэз — 67 миллиард 940 миллион манет. Профицит — 282 миллион манет.

Глазов выльдӥськоз

Кылем арын уноез депутатъёс шугъяськизы: Удмуртия котыр ласянь шыръяно луэ. Но туэлы кисымес чаклано ке, кылем арен ӵошатыса, со зӧкгес но луиз ай. Мылкыдзы тужгес но бурдъяськыны кулэ Глазов городын улӥсьёслэн. Угось татысь сюресъёсты лэсьтонлы туэ тужгес бадӟым саклык висъяськоз, пусйиз коньдон ужпумъёсъя министр Станислав Евдокимов. Малы одно ик Глазов, мукет интыосын но сюресъёс уродэсь ук? Та юанлы сессиын Удмуртилэн Тӧроез Александр Бречалов валэктӥз.

— Туннэ нуналлы чаклано ке, Глазовын кадь урод сюресъёс одӥг городын но ӧвӧл. Ми кема кенешимы татысь ЧМЗ, «Росатом» предприятиосын — проектмы туж секыт. Но арлы быдэ 15-20 миллионэн висъяса сюресъёсты кышъямлэн толыкез ӧвӧл. Умойгес луоз, тросгес коньдон кыскыса, 3-5 ар ӵоже югдурез воштыны. Глазов — азинлыко город. Али ми тыршиськом сое республикаысьтымы тужгес ӝог азинскись инты карыны. Вуоно арысен Глазовын паймымон «Горсад» проект пыӵаны кутскоз на, — пусйиз Александр Бречалов но та городъя Удмуртилэн бюджетаз пыртэм ватсанъёслы дурбасьтыны куриз.

Озьы, А. Бречаловлэн верамезъя, Глазовысь 45 процентэз сюресъёс туэ тупатъямын луозы. Но мукет городъёслы но ёросъёслы ӝожомонэз ӧвӧл, пе. Ваньзэс азинтонъя нимысьтыз планъёс вань ини. Вуоно арняе Александр Владимирович оскытӥз Можга городэз азинтонъя планэн тодматыны. Сессиын кивалтӥсь ӟеч ужамзы понна тау кариз Правительстволы но, Кун Кенешлы но. Нырысьсэ ваньзы огъя кужымен ужазы, одӥг пыжын уязы, пусйиз со, соин ик трос сюлмаськытӥсь ужпумъёс интыысьтызы вырӟытэмын.

Кун Кенешлэн Тӧроез Алексей Прасолов но выльдэм бюджетэз умоен пусйиз:

— Асьмелэн али феврале ик ини бюджетлэн доход люкетэз быдэс 2017-тӥ арлэн кадь. Со сяна но шаерамы коньдон вуыны кулэ на. Туннэ нуналлы Правительство но Кун Кенеш чаклам ужзэс, обязательствооссэс быдэсак быдэстӥзы.

Малы асьмелы кулэ дефибриллятор?

Депутатъёс Россиысь Кун Думае 3 вазиськон кутӥзы. Тужгес тунсыкоез но кулэез — дефибрилляция сярысь федерал закон кутонъя. Та кичӧлтонэн сессиын тодматӥз Правительстволэн Тӧроезлэн нырысетӥ воштӥсез Александр Свинин. Солэн верамезъя, арлы быдэ Россиын 300 сюрс пала адями кулэ, сюлэмыз шуак дугдыса. Та закон юрттысал шуге-леке вуэм адямиослы юрттыны. Угось туннэ нуналлы вань ини пичи гинэ аппарат, кудзэ адямилэн гадьыз борды понӥськод но, нимысьтыз электрической зарядъёс дугдэм сюлэмез нош ик ужато. Сыӵе приборъёс — дефибрилляторъёс — калыко интыосын луысалзы ке, уно муртэ утьыны луысал. Соосты уже кутыны быгатэ котькуд адями, со понна нимысьтыз дышетскем кулэ но ӧвӧл. Озьы дэмламын 50-200 адями люкаськоно интыын 1 дефибриллятор возьыны, 200-1 сюрс адями ке — ӧжытсэ 2 прибор кулэ, 1 сюрслэсь трос ке — ӧжытсэ 3 прибор. Дефибрилляция сярысь федерал законлэн проектаз ваньмыз пыр-поч лыдъяса-чотаса сётэмын.

Туннэ нуналлы та аппаратэз поттэ Ижысь «Аксион-холдинг» предприятие. Дуныз — 150 сюрс манет. Кун Думаын закон кутӥськысал ке, со 2 полэс пайда вайысал. Одӥг ласянь, Россиын сюлэмзы шуак дугдыса кулӥсьёслэн лыдзы кулэсмысал, кыкетӥез — асьмелэн медоборудование поттон производствомы азинскысал. Со сяна — Удмуртилэн бюджетаз та приборъёсты поттэмлэсь гинэ 12 миллиард манет вытъёс вуысалзы, нош Россилэн бюджетаз — 18 миллиард пала.

— Россиысь Кун Думае таӵе закон кутыны курыса вазиськонэз ми туж ӟечен пусйиськом, — шуиз Кун Кенешысь Тазалыкез утёнъя, демографияя но семья политикая ялан ужась комиссилэн кивалтӥсез Надежда Михайлова. — Ватсасал на: туннэ нуналлы Россиын улонысь кошкон мугъёс пӧлын сюлэмен герӟаськемъёсыз нырысетӥ интыын. Тужгес но трос сыӵе учыръёс ужась воргоронъёс пӧлын. Сыӵе дыръя нырысетӥ минутъёсы та аппаратэз кутӥськод ке, 40 процентаз учыръёсы адямиез улӟытыны луэ на.

Кун Думаысь депутат Андрей Исаев дэмланэз озьы ик умоен лыдъя:

— Закон зэмзэ но ку-тӥськысал ке, арлы быдэ 80 сюрс пала адямиез утьыны луысал. Собере тӥляд та дэмланды туж тупа В. Путинлэн ожгар предприятиосын нуналмысь кулэ луись вуз поттонэз паськытатон сярысь малпанэныз. Кастрюльёс поттон интые тӥ туж кулэ луись медоборудование борды басьтӥськиды.

Но Андрей Исаев ӧз ваты: законопроектэз кутон, пе, секытэн мыноз, угось со трос коньдонэз кулэ каре. Озьы ке но Кун Кенешысь 49 депутатъёс дефибрилляция сярысь федерал законопроектэз Кун Думалы эскерыны дэмлазы, 1-ез гинэ пумит луиз.

* * *

Кун Кенешлэн сессияз дышетонъя, сирота нылпиослы юрттонъя, гурт хозяйствоез азинтонъя но мукет законъёсы воштонъёс пыртэмын на вал, нимысьтыз бадӟым докладъёс лэсьтӥзы югдурез утёнъя министр Александр Первухин но Адямилэн правоосызъя оскем мурт Вениамин Соломенников.

Елена МИННИГАРАЕВА

Удмурт Дунне
By Удмурт Дунне Март 5, 2018 11:30 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<