Быръён нунал: Ижын куара сётӥзы 60, 44 процентэз бырйисьёс

Удмурт Дунне
By Удмурт Дунне 19 марта, 2018 13:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шаерысьтымы городъёсын улӥсьёс, гуртоосын ӵошатыса, быръёнъёсы лябгес пыриськизы. Кылсярысь, Ижын мылкыдзэс веразы 60, 44 процентэз бырйисьёс. Озьы ке но быръён участокъёсын калык ӧз бырылы.

Ижысь 72-тӥ номеро школае интыяськем быръёнъя участоке 8 час котырын ик лыктӥ — котькинлэсь азьло куараме сёто, малпай. Но янгышаськем: 8 час 15 минутын мылкыдзэ вераз ни 5 мурт.

— Странамы пичи кунъёс азьын но ньыльпыдъяськон калэ вуэмын ни вал, нош табере асьмемыз быдэс дунне кылзэ, — вераз военной пенсионер Виктор.
— Россилэн дуннеын интыез уката юн мед луоз — та понна ик куараме сётӥ.

Шоркарысь ик 34-тӥ школа но 10 час котыр калыкен тымиськиз ни.
Кызьы вераз 512-тӥ участокен кивалтӥсь Екатерина Поликарпова, быръёнъёсты радъянэ со нырысьсэ уг пыриськы. Азьло аръёсы но чаклаз: нырысетӥосыз бырйисьёс вуо 10 часозь, собере вис луэм бере данакез лыкто 14-16 час котырын но участокъёс ворсаськон азьын.

— Вазь ик лыкто пенсионеръёс, — ватсаз Екатерина Поликарпова. — Но вуо шоро-куспо арлыдъемъёс но — уже потон азязы куара сёто.

Зэм, ог 10 час котыр адӟиськыны кутскизы ни егитъёс но. Кылсярысь, Альфиялы алигес гинэ 18 арес тырмем. Та быръёнъёс со понна — нырысетӥосыз.
— Куараме сётӥсько тупаса улон понна, — шуиз Альфия. — Урамъёсмы чылкытэсьгес мед луозы. Кондуктор луыса ужасько бере, шоркармес нуналлы быдэ котыръясько. Чебер, утялтэм интыосты адӟыса, мылкыды капчи луэ. Эшшо вылӥ кивалтӥсьёс медаз вунэтэ егитъёс сярысь.

Быръёнъёсы нырысьсэ пыриськисьёслы дасямын вал кузьымъёс — ручка но браслет. Альфиялы сое сӥё-дано кузьмазы.

Быръёнъя мукет участокъёсын сямен ик, 34-тӥ школае но куара сётыны лыктэм калык кошкыны ӧз дырты. Волонтёръёс соку ик калыкез лӧпкытъязы «Комфортная
среда» проектлэн списоказ шедем интыос понна куара сётыны. Но таяз школаын эшшо одӥг куара сётон радъямын вал — Устинов ёросысь кибашлыослэн ужъёссы понна. Мыным но сётӥзы 5 жетон — соосты «Мастеръёслэн городзы» адӟытонэ поттэм тужгес кельшымон киужъёс вадьсы пононо, пе. Таӵе дыръя синъёс уката палёмо — котькудзэ кибашлыез ушъям потэ!

Удмурт Дунне
By Удмурт Дунне 19 марта, 2018 13:03