Бугыртӥз! Кызьы ортчиз «Россия — луонлыкъёслэн кунзы» форум

Удмурт Дунне
By Удмурт Дунне 26 марта, 2018 13:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиысь Президентлэн грантъёсызъя фондлэн кивалтӥсез И. Чукалин дышетэ мерлыко проектъёсын ужаны.

13-тӥ-15-тӥ южтолэзе Удмуртиысь бадӟым делегация Москваын ортчись форуме пыриськиз. Соос пӧлын мон но «Шунды» огазеяськонлэн тӧроез Алина Чернова вал. Оглом форум 6 сюрс 500 адямиез люказ.

Котькуд нунал 80-лэсь трос площадкаос ужазы, котькудаз пыриськыны ӧм быгатылэ. Тужгес но тунсыкозэ бырйыны туж секыт вал. Валтӥсь ужрадъёс ми понна Россиысь Президентлэн грантъёсызъя фонд дасяз. Солэн кивалтӥсеныз Илья Чукалинэн пумиськимы. Социальной проектъёсын ужаны дышетскимы. Ваньмы ӵош кенешимы, кыӵе проектъёслы бадӟымгес саклык висъяське.

Озьы ик шедимы туала брендъёс сярысь кенешонэ. Пуконъёсамы интыяськимы но, шӧдӥсько, кызьы бускельёсы чидатэк витё спикеръёслэсь сцена вылэ потэмзэс. Тунсыко, кинъёсты меда? Усьтӥ программкаме: Михаил Куснирович — «Воsco» компанилэн кивалтӥсез. Кыкетӥ нимез адӟеме бере гинэ валай, кинэ вите калык. Куснировичлы юанъёс Николай Соболев, тодмо видеоблогер, сётъялоз, пе. Нокин ӧз кылзӥськы ни кадь, мар сярысь вераськон мынэ, школаын дышетскисьёс пумиськонлэсь пумзэ гинэ витизы Соболевен селфи лэсьтон понна. Адӟе вал, кӧня адями дораз бызиз ужрад бере. Абдраса ик кыли, сыӵе пайдаё вераськон соос понна токма луиз шуыса, нош блогерлэн тусыз сюрслэсь ятыр телефонъёсы кылиз.

Ярам, матэктэ олимпийской чемпионэн Александр Карелинэн но «Матч ТВ» каналлэн редактореныз Тина Канделакиен пумиськон. Кылзӥськыса, кызьы адямиос, асьсэдыз жалятэк, кыстӥськемын вормонъёссы доры, аслыд ик золгес оскыны кутскиськод. Александр Карелинлэн огшоры луэмез ик монэ бордаз кыскиз, дыр. Мугоры юзыр-кезьыр луылӥз. Мар вал вераськон бере? Бен, быдэс зал — отын сюрс но ӝыны пала адями пуке вал — мынӥз спикеръёсын туспуктэмъёс лэсьтыны. Сюлэмы буйгаз, дано спортсменъёсмес видеоблогеръёслэсь золгес ик гажало вылэм.

Пайдаё нунал пумын «Моя Мишель», Pizza, «Сплин» но «Мот» группаослэн крезьгур тулкымъёссы вылын лэйкамы.

Форумлэсь 2-тӥ нуналзэ мон тужгес но зол вити. Вазьгес лыктыса, заллэн азяз инты шедьтӥ. Час пала вити ужрадлэсь кутскемзэ. Собере потӥзы радъясьёс но шуизы: «Пумиськон уз луы». Дорамы кулэ вал лыктыны Пхёнчханын Олимпиадаын вормисьёс: Алина Загитова, Евгения Медведева, Кирилл Капризов, Илья Ковальчук но мукетъёсыз.

Куашкам мылкыдын кошки бускель залэ. Отын Андрей Кончаловский, режиссёр но «Ника» кинофондлэн кивалтӥсез, ӟуч кыл но ӟуч калык сярысь малпанъёссэ мадиз. Нунал талэсь азьло Никита Михалков режиссёрен со выллем ик пумиськон вал.

Берло тодмо луиз: форумлэн пумаз Россилэн Азьмуртэз, Владимир Владимирович Путин, дорамы лыктоз шуыса. Соин ик ми кузь черодъёсын сылылӥмы: залысь залэ потакумы, котырмес эскерылӥзы. Ваньмы бадӟым залэ люкаськеммы бере кутскиз концерт. Ӵапак соку Владимир Путин ми доры потӥз.

— Кунмы котькуддылы оске, — шуиз Президент, — тӥ кылдытоды кунмылэсь ӵуказе нуналзэ. Ваньмыз, мар борды тӥ кутскиськоды, мед пӧрмоз!

Радъясьёс паймытыны быгатӥзы. Трос тодмо кырӟасьёсты адӟимы: «Градусы», «Бандэрос», MBand группаос, Бьянка, Егор Крид, Полина Гагарина… Но мон тодам возё чемпионъёсын пумиськонэз, соос форум пумын вуизы ик! Евгения Медведева, Кирилл Капризов, Иван Телегин… Дан но гажан!

Огъя учкыса, мон уг быгатӥськы вераны, форум кыӵе ке выль тодон-валан, быгатонлыкъёс сётӥз шуыса. Солэн нимыз «Россия — луонлыкъёслэн кунзы» вал бере, та сярысьгес ик тросгес вераськонъёс но вал. Бизнесменъёсын, ужбергатӥсьёсын, ки-валтӥсьёсын, министръ-ёсын, тодмо адямиосын пумиськонъёс бурдъязы. Форум пӧртэм мылкыдъёсме бугыртӥз, йырам выль малпанъёс кылдӥзы.

Мария Емельянова

Удмурт Дунне
By Удмурт Дунне 26 марта, 2018 13:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<