Башкириысь фин-угор калыкъёс сярысь книга поттӥз удмурт тодосчи Ранус Садиков

Удмурт Дунне
By Удмурт Дунне 29 марта, 2018 16:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Фин-угор калыкъёслэн ортчем сюресъёссы, сямъёссы, вӧсьёссы сярысь ужъёсты, аслэсьтыз кылэм-адӟемъёссэ огазе люкаса, Башкортостанысь Ранус Садиков «Финно-угорские народы Республики Башкортостан» книга поттӥз.

Ранус Рафикович Садиков — история наукаосъя доктор. Удмурт тодосчи вордӥськемын Башкириысь Бурай ёросысь Касиярово (Кисса) гуртын. Уфаысь университетэз йылпумъяз, аспирантураын дышетскиз. Камсьӧр удмуртъёслэн улон интыоссы, коркаоссы сярысь бадӟым уж гожтыса, Ранус Садиков наукаосъя кандидат луиз. Собере эскериз на вӧсяськон сям-йылолъёсты, «Традиционные религиозные верования и обрядность закамских удмуртов» доктор диссертацизэ гожтӥз.

Берло аръёссэ Ранус Садиков трос саклык висъяз Башкириысь фин-угор калыкъёс сярысь материал люканлы. Архивъёсын бугыръяськиз, экспедициосы потаз. Кылэм-адӟемзэ книгае люказ, этнологъёслы, историкъёслы, шаерчиослы но ас вордӥськем палъёссэс тодыны мылкыд карисьёслы та книга усто кузьым луиз.

Книгаын пусъемын Башкириысь фин-угор калыкъёслэн пӧртэм вакытъёсысь лыдзы, азинскемзы, кылзылэн но дӥськутсылэн аспӧртэмлыкъёссы. Та вие Россиын 547 сюрслэсь уно поръёс уло, со пӧлысь ог 19 процентэз (103 сюрс 658 мурт) — Башкортостанын. Калтасы но Мишкино ёросъёсын пор кылын газетсы но потэ. 25 ар талэсь азьло Нефтекамск городын поръёслэн элькун газетсы но печатласькыны кутскиз. Башкир музъем вылын поръёс 15-тӥ дауре ик вылӥллям. Пусйыны кулэ: вань поръёслэн 1-тӥ съездзы Башкир шаерысь Бирск городын 1917-тӥ арын ортчемын.

Башкириысь поръёс ӟеч кусып возё удмуртъёсын. 1919-тӥ арын Уфаын мари-вотской съезд ортчиз. Отын бадӟым саклык висъямын вал анай кылэз дышетонлы. Со вакытэ 117 пор школаос пӧлысь 27-ез, нош 52 удмурт школаос пӧлысь 21-ез пытсаськемын вылэм. Съезд решение кутэ со школаосыз выльысь усьтон сярысь. Башкир музъем вылын вордӥськем мари адями Исламгарей Яковлевич Миндияров (чукынэмез бере Павел Петрович Глезденёв) Вяткаын пор, бигер но удмурт кылъёсын газет поттыны кутске. Ваньзэ ик та кылъёсты со умой тодэ вал. Озьы «Войнаысь ивор» нырысетӥ удмурт газетлэн редакторез пор пи вал.

Пор но удмурт калыкъёслэн ортчем сюресъёсазы огвыллемез ӧжыт ӧвӧл. Тани Удмурт шаерын СОФИН (Союз освобождения финских народностей) ужъя трос визьмо удмурт адямиосты быдтӥзы. Со вакытэгес ик шундыӝужан палась поръёслы (Башкириысь поръёсты озьы нимало) пумит «Мари уж» ӝутэмын вал. Пор калык пӧлысь но тужгес визьмо адямиосты, контрреволюционеръёс шуыса, судъёсы вуттӥзы.

Ватытэк вераны кулэ: поръёслэн калык культураез, кылэз азинтонэ шаплы пыриськемзы удмуртъёсты но ӝутӥз. 1991-тӥ арын Татышлы ёросын кылдэ «Дэмен» огазеяськонлэн ёзэз, нош 1996-тӥ арын Башкортостанысь удмуртъёслэн национально-культурной центрзы ужаны кутске. 1999-тӥ арын инвожо толэзе «Ошмес» элькун газетлэн нырысетӥ номерез потэ. Та газет элькунысь удмуртъёсты огазеян ласянь туж бадӟым уж лэсьтӥз. Али но со калыклэн юрттӥсез, визь-кенеш сётӥсез луэ.

Поръёс но удмуртъёс сяна, книгаын мордваос сярысь но уно материал люкамын. Куке но соку Башкортостанын вылӥллям эстон посёлокъёс но. Эстонъёс 19-тӥ, 20-тӥ дауръёсы башкиръёс доры буш музъем басьтыны лыктӥллям вылэм. Озьы 1939-тӥ арын Башкириын 1 сюрс 302 эстонъёс улӥллям. Туала вакытэ соослэн лыдзы 219 гинэ кылемын.

Огъя вераса, Башкортостанысь фин-угор калыкъёс сярысь узыр, мур пуштросо книга поттэмын. Солэн кулэлыкез аръёс ортчемъя уката будоз.

Ульфат Бадретдинов

Удмурт Дунне
By Удмурт Дунне 29 марта, 2018 16:50 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<