Ӵошатско 234 егит профессионалъёс

Удмуртиын сӥё-дано усьтӥськиз WorldSkills чемпионатлэн элькун этапез. Ссузъёсысь егитъёс 4 нунал куспын, 1-тӥ-4-тӥ мартэ, ужаны быгатэмзэс возьмато. Асьме дорын таӵе вожвылъяськон 3-тӥ арзэ ортче ни.

Туэ ссузъёсысь студентъёс 26 удысъёсъя быгатонлыксэс возьмато

Туэ ссузъёсысь студентъёс 26 удысъёсъя быгатонлыксэс возьмато. Ӵошатсконъёс ортчо Ижысь, Глазовысь, Воткинскысь, Можагаысь, Уваысь техникумъёсын. Соослэсь ужаны быгатэмзэс эскеро Россиысь но Удмуртиысь 300 пала экспертъёс. Тужгес трос куриськонъёс вуэмын гурт удысъя машинаосты тупатъян, кирпичлэсь лэсьтӥськон, сваркаен ужан удысъёсъя. Нырысьсэ вожвылъяськон ортче экскурсиос радъясьёс пӧлын.

— Туэ чемпионатэ, кылем арын сярысь, тросгес егитъёс пырисько — 234 мурт. Кылдӥз выль удыс — экскурсиос ортчытон. Малпасько, со туала улонлэн кулэлыкез. Угось Удмуртиын туризмез азинтыны выриськом. Чемпионатлэн валтӥсь ужпумез — ужась адямисолэсь данзэ будэтыны, асьме егитъёслэсь быгатонлыксэс дуннеын пуктэм куронъёслы тупамон карыны, — вераз дышетонъя но наукая министр Светлана Болотникова.

Ангелина Снигирёва

Туспуктэм: udmedu.ru