Зинаида Рябинина: Тол келян но… возьман

Удмурт Дунне
By Удмурт Дунне 27 февраля, 2018 12:20

Кылем арняе ми Шарканысь Тол бабай дорын Вӧйдырез пусйимы Глазовысь но Глазов ёросысь Понино гуртысь нылпи юртъёсысь пиналъёсын ӵош.

Сыӵе малпан кылдӥз Выль ар азьын Глазовысь 11 аресъем Марина Климовалэсь ӟечкылан открытказэ басьтэммы бере — интернат «Ас киын лэсьтэм кузьым» проектэ пыриськиз. Таӵе акция праздник азьын ялӥз вал Элькун Тӧролэн но Правительстволэн администрацизы. Озьы магазинысь октэм сувениръёсты воштӥзы нылпиослэн киосыныныз лэсьтэм синпельёс. Одӥгез киуж вуиз ми доры. Улонады туж трос шуд мед витёз, шуэм Марина.

Нош Понино нылпи юртысь 13 аресъем Кирилл Северухин «Тол бабайлы гожтэт» конкурсамы сюлэмез вырӟытӥсь заметка ыстэм: мынам, пе, ноку Тол бабаен пумиськылэме ӧвӧл на. Мар бен — ми малпам нылпиосты Тол бабаен тодматыны! Туж бадӟым тау со понна Шарканысь «Тол бабайлэн усадьбаез» центрын но Быги гуртысь клубын ужасьёслы.

Пиналъёс удмурт кылын, конечно, уг верасько, соослэн кылылэмзы-адӟылэмзы но ӧвӧл удмурт книга-газет сярысь (ужъёссэс редакцие воспитательзы ыстэм), соин ӧжытак паймизы кадь, но Быги гуртысь клубын ужасьёс юрттӥзы кепыранлэсь мозмытскыны, соос тунсыко программа дасяллям, нырысь шудытӥзы, собере пӧсь табанен утялтӥзы, вашкала удмурт дӥсьёсын тодматӥзы, собере пиналъёс Шарканысь Тол бабайлэн усадьбаяз мынӥзы — отысь гурезьысь тюбинген нискылазы но Толкелян представлениез учкизы, выжыкыл песятаен туспуктэме пуксизы.

Ваньмыз умой кадь, но монэ паймытӥз — пиналъёс шулдыръяськонлэсь палэнско. Педагогъёссы верамъя, та пиналъёс огез но мумытэм-бубытэм ӧвӧл, но кудӥзлэн юо, кудӥзлэн пытсэт сьӧрын пуко…

— Кыӵе кузьым выльысь Тол бабайлэсь куроды? — юасько покчиосызлэсь.

— Ӧйтӧд, — вырето соос пельпумынызы. — Мар сётозы.

Сёт ай сыӵе юан семьяын улӥсьёслы, куронзылэн пумыз уз луы!

— Нош будӥды ке, мар карыны малпаськоды?

— Мон мамае доры берто, — шуэ муспотон Кирилл. — Со мыным 6 ар уг жингыръя ни ке но, мон сое сёровно яратко.

Пиналэз мултэс вӧсь каронтэм вылысь мон юанъёс сётыны ӧй дӥсьты ни. Жаль, выжыкыл ӧз пӧрмы…

Но тон одно луод зэмос пиосмурт но ӟеч атай, Кирилл!

Удмурт Дунне
By Удмурт Дунне 27 февраля, 2018 12:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<