Удмурт кылэз нылпи садысен дышетоно!

Удмурт Дунне
By Удмурт Дунне 26 февраля, 2018 15:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Туж потэ вылэм, тэшкылиосты нылпи садысен ик удмурт кыллы мед дышетозы шуыса. Сыӵе мылкыдын Дышетонэз азинтонъя институтын экспериментальной площадка усьтӥмы.

Нылпи садын удмурт кыллы дышетонъя семинар.

2013-тӥ-2016-тӥ аръёсы, 6 нылпи садысь быдэн одӥг группа бырйыса, покчиосты удмурт кыллы дышетӥмы. Та аръёсы ик пыриськимы «Фин-угор кылъёс но лулчеберетъёс школалэсь азьвыл дышетонын» фин-угор проектэ. Проект улсын лулысь-сюлмысь тыршизы Кузебай Герд нимо гимназиысь, Эгралась 8 номеро, Балезиноысь «Сказка», Вавожысь «Журавушка», Ува ёросысь Узей-Тукля, Дэри ёросысь Ягул нылпи садъёсын ужасьёс. Соос ог-огзы доры семинаръёсы поталлязы, озьы ик фин-угор проектлэн семинаръёсаз дышетскылӥзы. Арлы быдэ покчиосын ужан, кылзэс волятон амалъёссы сярысь видео пыр возьматъязы.

Озьы валаны луиз: нылпи садысен ик удмурт кыллы дышетонлэн пайдаез туж бадӟым. Кызьы пусйизы покчи классъёсын дышетӥсьёс, та амалэн удмурт кыллы дышетскем пиналъёс школаын котькуд предметъя капчиен дышетско, малы ке шуоно соос ог-огзылэсь но, дышетӥсьлэсь но верамзэ нылпи садысен ик сак кылзыны дышемын, сямзы но тыршись луэмын. Со сяна, куараосты ог-огзылэсь висъяны быгато, соин ик янгышъёстэк гожъясько. Удмурт кыллы дышетон пӧртэм шудонъёс, кырӟанъёс, эктонъёс, театр пыр мынэ бере, школаын ортчылӥсь пӧртэм ужрадъёсы но та пиналъёс чупрес пырисько.

Озьыен, ужмылэсь ӟеч емышъёссэ адӟыса, ми покчиосты удмурт кыллы дышетонъя учебно-методической комплекс дасян борды гижысь-пиньысь басьтӥським. Та вакытлы потӥз ини 2 ужмы: «Жильыртӥсь ошмес» дышетон программа но бордаз учебно-методической юрттэт. Матысь дыре потозы пӧртэм шудонъёсын (чиньыосын, крезьгуро, электрон, бызьылыса) бичетъёс. Азьланяз дасяны чакламын конспектъёсын бичет, кылбуръёсын но веросъёсын хрестоматия.

Та вакытлы потӥз ини 2 ужмы: «Жильыртӥсь ошмес» дышетон программа но бордаз учебно-методической юрттэт. Матысь дыре потозы пӧртэм шудонъёсын (чиньыосын, крезьгуро, электрон, бызьылыса) бичетъёс. Азьланяз дасяны чакламын конспектъёсын бичет, кылбуръёсын но веросъёсын хрестоматия.

Дышетон программа но пособиос поттыса гинэ, ужмы уз азинскы, ӧз юрттӥське ке дышетонъя управлениосысь специалистъёс но нылпи садъёсын кивалтӥсьёс. Тае чакласа, 14-тӥ тулыспалэ Дышетонэз азинтонъя институтын информационно-методической семинар ортчиз, со нимаськиз «Удмурт кыл — Удмурт шаерысь нылпи садъёсын: туннэ но ӵуказе». Отчы ӧтемын вал элькунысьтымы вань ёросъёсысь дышетонъя ёзъёсысь ӧнерчиос но нылпи садъёсын кивалтӥсьёс. Жаляса верано, 108 лыктэмъёс пӧлысь 4-ез гинэ дышетонъя управлениосысь вуиллям (Дэри, Алнаш, Ува, Эгра ёросъёсысь), кылемез — нылпи садъёсын кивалтӥсьёс (яке соослэн воштӥсьёссы) но визьнодасьёс. Визьнодасьёслы ми нимысьтыз дышетон курсъёс ортчытъяськом, нош та ужрадэ туж витиськом вал кузёосты! Ас синмыныд адӟытэк но пельыныд кылытэк, кызьы валалод та ӧрын ужанлэсь аспӧртэмлыксэ?

Покчиосты удмурт кыллы дышетон амалъёссы но анай-атайёсын валче тыршемзы сярысь семинарын рос-прос веразы эксперимент амалэн ужась визьнодасьёс но соослэн кивалтӥсьёссы: Балезиноысь С. Русских, Н. Ившина, Эгралась М. Шуклина, О. Иванова, Г. Минниахметова, К. Герд нимо гимназиысь А. Калашникова, С. Зинкова. Шумпотӥськомы, вӧзамы таӵе юрттӥсьёсмы вань шуыса.

Ӟеч кылъёс вераме потэ Дэри ёросысь дышетонъя управлениысь ужасьёс сярысь. Соос гижысь-пиньысь басьтӥськизы вань нылпи садъёсысь покчиосты удмурт кыллы дышетон борды. А. Иванова ваньмызлэсь азьло ёросысьтыз котькуд визьнодасьлэн ӝӧк вылаз вуттыны тыршиз поттэм книгаосмес. Азьланяз та книгаосмы потылозы на, юанэн вазиськыны курисько мыным электрон почта пыр: roz-kuznecova@yandex.ru.

«Жильыртӥсь ошмес» программая ужаны дышетон вылысь нылпи садъёсын ужасьёслы, визьнодасьёслы, крезьгуръя но суредаськонъя дышетӥсьёслы 12-тӥ-16-тӥ южтолэзе радъямын луоз дышетскон Дышетонэз азинтонъя институтын таӵе адресъя: Ижкар, Ухтомский ульча, 25.

Юанъёсын жингыртоно (3412) 37-99-76 телефон номеръя.

Роза Кузнецова,

педагогика наукаосъя кандидат,

доцент

Удмурт Дунне
By Удмурт Дунне 26 февраля, 2018 15:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<