Одӥг гимназия — ӧжыт! Малы Кузебай Герд нимо гимназие кузь черод кылдэ

Удмурт Дунне
By Удмурт Дунне Февраль 9, 2018 15:08

Одӥг гимназия — ӧжыт! Малы Кузебай Герд нимо гимназие кузь черод кылдэ

Школаосын мынэ 1-тӥ классэ гожтӥськон.  Выль дышетскон арын Кузебай Герд нимо гимназиын возьмало 75 пиналэз, нош мылкыд карисьёс туж трос.

nazaccent.ru

Кузебай Герд нимо гимназие шедён понна анай-атайёс вож-масько.

 

Дасяськон

8 часын ӵукна ик гимназилэн фойеаз кызё пала анай-атайёс сыло ни вал.

— Тӥ гожтӥськыны лыктэмын-а? — юасько.

— Милям черодмы вань, номерокъёс люкылэмын ни, — вазе пумитам огез воргорон.

Пырон палась ӝӧк вылысь векчи вож тетрадез сётӥзы. Татын ог 4 бамын нимтулъёс гожъямын ни. 77 мурт люкаськем.

— Ку черод кылдӥз? — тунсыкъяськисько.

— Арня талэсь азьло, тани ук 25-тӥ январь пусъемын, — валэкто мыным.

Нырысь ик гожтӥськиллям Абросимовъёс. Кытысь сыӵе малпан йыразы лыктэм?

— Ми татчы школае дасян курсъёсы нылмес нуллӥськом, — шуо кузпалъёс. — Мылкыд карисьёс трос луозы шуыса, азьлапал ик шӧдӥмы, соин биньгозыез кырмоно кариським.

Озьы арня ӵоже тетраде выль но выль нимтулъёс пыризы. 31-тӥ январе анай-атайёс, огазе люкаськыса, черодзэс чаклазы — татчы 56 мурт вуиз, соослы пус люкылӥзы. 1-тӥ февраль уе но куд-огез доразы ӧз кӧлэ — вошъяськыса дежурство нуизы, уй ӵоже нокыӵе выль черодъёс медаз кылдэ шуыса.

Мумы-бубыос рос-прос дасяськиллям: котькудӥзлэн гожтэмын ни школае заявлениез — сое гимназилэн сайтысьтыз шедьтыны луэ. Малы, пе, комиссилэсь ужзэ токма ӝегатыса улод.

— Туннэ котькудӥз тулкымъяське, экзаменъёсын но тазьы ӧй сюлмаськылы кадь, — вера Ольга Кузьмина. — Туж куректӥсько: черодын ми 31-тӥ, нош инты 30 гинэ, шуо.

 

Милемлы матын…

Нялтас вераса, вань та кенешон ӟуч кылын мынэ. Гимназие куриськисьёс тросэз, пе, удмурт кылын «валамон» гинэ вераны быгато. Иське, малы одно удмурт дышетсконтӥе курисько?

— Гимназилы матын улӥськом, — шуо огъёсыз.

— Татын нырысетӥ сменаын гинэ дышетско. Та палась 34-тӥ но 76-тӥ школаос нылпиосын тымиськемын. Отчы так но сюрыны луоз, — ватсало мукетъёсыз.

— Продлёнка вань кадь, — шуо куинетӥосыз.

— Милям удмурт выжыосмы, асьмеос вераськыны ум быгатӥське, нылпиосмы коть мед дышетозы, — веразы куд-огез. Собере асьсэос ик юало: — Нош татын вераськыны гинэ дышето-а, яке лыдӟиськыны но, гожъяськыны но удмурт сямен косозы-а?

— Конечно, косозы, — меӵкытӥсько. — Тани пие 4-тӥ классын, соослэн арняяз 3 пол удмурт кыл.

— 11-тӥ классын но дышето-а? — уг оско верамелы.

— Ма, кызьы сотэк? Та удмурт гимназия ук, — шуисько.

— Кызьы ке дышетозы ни, гуртэ каникулэ келялом ай, дышозы… — верало мыным.

Та черодысь пумитай тодмоме но — Светлана Исаковаез. 4 ар талэсь азьло ми тазьы возьмаськыса пуким ни. Соку черод 4 часын ӵукна люкаськиз, гожтӥськон нуназе бере кутскиз, соин коридорын калык тымиськемын вал.

— Туэ интылы вожмаськон уката зол, — шуэ Светлана Валентиновна. — Огласянь умой, анай-атайёс асьсэос радъяськыны быгато, керетон-жугиськон уз луы. Мон тани черодын куинетӥ. Озьы ке но сюлмаськисько, ужысь но туннэ куриськи. Картэ компьютер азьын пуке — кун услугаос пыр гимназие гожтӥськыны чакла. Мукет  ласянь учконо ке, удмурт гимназие куриськыны быгатэ котькин — нылпи тодэ-а, вала-а анай кылзэ — юась ӧвӧл.

Беромисьёс но дыртӥсьёс

9 час бере лыктӥсьёс тросгес луизы. Куд-огез черод сярысь тодӥллямтэ. Соин, тамында калыкез адӟыса, синъёссы ик питырско. Но соосты нокин уг жаля: беромемъёс черодлэн мышказ — 80-тӥосыз — ини. Мыным таос уката жаль пото, малы ке шуоно ымныръёссы туж-туж удмуртэсь. Соос паймо, нош споръяськыны уг но малпало.

— Удмурт кылъя коть кыӵе ке эскерон мед луысал, — шуо беромемъёс, — кызьы-о удмурт гимназие олокинэ но басьтыны лэзё?

Нош черодэз радъясьёс туж шаплыесь: огез атай татысь охранникен ӵош 216-тӥ кабинет доры (ӵапак отын ортчоз гожтӥськон) тубаз. Кин тодэ, оло, кыӵе ке шӧртчиос отчы пырыны быгатӥллям ни. Вахтаысь возьмаськись туннэ «витьлы» ужа. Нылпиос турникет вамен карточкаен гинэ пырыны быгато, дышетӥсьёсты, валамон, тодмало, нош нырысьсэ лыктӥсьёсты соку ик синзы висъя. Туннэ татын шыр но ортчыны уз быгаты. Озьы кылдэм черодэз нокин зуркатӥсь, куашкатӥсь ӧз луы.

10 час котырын черодысь нырысетӥ 10 муртэ кыкетӥ этаже тубыны лэзизы. Ӵап соку ик югдурез  чакланы вуиз полицейской но.

216-тӥ кабинетын анай-атайёсты пумитаны дасесь ини. Татын гимназилэн директорезлэсь ужзэ быдэсъясь Владимир Волков, директорлэн воштӥсез Ольга Кузнецова, покчи классъёслэн завучсы Светлана Ильина, логопед Римма Овсянникова пуко. 1-тӥ феврале гожтӥськыны висъямын 2 час гинэ.  Кин ӧз вутты, со быгатоз на лыктыны мукет дыръя — гимназие гожтӥськон 5 ужан нунал ӵоже мыноз, та график поттэмын школалэн сайтаз. Но ужпум мукетыз бордын: инты ваньмызлы уз тырмы.

 

Кин понна удмурт гимназия?

— Ми ужаськомы быдэс Удмуртилы. Котькуд мылкыд карись быгатэ гимназие куриськыны. Озьы ке но троссэ интыосмес висъяськомы Кузебай Герд нимо нылпи садэ ветлӥсьёслы — сыӵеос туэ 46 кузя. 30 интымы туннэлы буш.   3-тӥ арзэ гимназие гожтӥськыны луэ 2 сямен: заявление вайыса но кун услугаосын сайт пыр куриськыса, — шуэ директорлэсь ужзэ быдэсъясь Владимир Волков.

Владимир Васильевич верамъя, 15 инты луоз «улэп» черодын сылӥсьёслы, сомындаез ик — Интернет  пыр куриськисьёслы.

— Портал пыр заявлениос сӥзьыл ик ысъяны кутскизы —  100 пала вуизы. Ваньмызлы отказ сётэмын. Малы ке шуоно туннэ 10 часысен гинэ гожтӥськон зэмлыко лыдъяське, — шуэ кивалтӥсь.

10 часын  216-тӥ кабинетэ пыризы Абросимовъёс. Арня ӵоже сюлмаськемзы юнме ӧз луы: Саша нылзы — гимназие списокын. Электрон амалэн гожтӥськон кӧня ке ӟудӥз: мылкыд карисьёс трос луэмен, сервер огдырлы «ошиськиз». Ярам, таӵе могӟон кемалы ӧй вал, озьы ке но ӟырдыт вакытэ котькуд секунд дуно.

Директорлэсь ужзэ быдэсъясь Владимир Волков верамъя, «улэп»  черодысь 117  муртэ гожтӥзы. Интернет пыр 190 куриськон вуиз. Кылем арын мылкыд карисьёс 250 котыр вал, туэ — 300-лэсь ятыр.

Огласянь, шумпотымон, удмурт гимназие сомында куриськись шуыса. Мукет ласянь, йыркур, кызьы  татын 11 ар дышетскыса, тросэз нылпиос уг быгато удмурт сямен вераськыны. Иське, быдэстэ-а гимназия аслэсьтыз мытэм ужзэ?

Елена Скворцова

Туспуктэм: Елена Скворцова, nazaccent.ru

Удмурт Дунне
By Удмурт Дунне Февраль 9, 2018 15:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<