24-тӥ гурт тол шудонъёс: 2 олимпиада огазеяськиз Пичи Пургалан

Удмурт Дунне
By Удмурт Дунне Февраль 28, 2018 13:40

Кылем арня пумын Пичи Пурга черкогуртын 3 нунал ӵоже 25 ёросысь сюрслэсь ятыр спортсменъёс ӵошатскизы. 

Усьтон ужрадэ пыриськизы Правительстволэн Тӧроез Ярослав Семёнов, мугорез кыдатон культурая, спортъя но егитъёсын ужан политикая министрлэсь ужзэ быдэсъясь Наталья Гольцова, биатлонист, Олимпийской шудонъёслэн призёрзы Иван Черезов.

Окси, Аннок но Айно — шудонъёслэн пусъёссы.

 

Толон, туннэ но ӵуказе

Берло аръёссэ Гурт шудонъёслы ёрос командаос рос-прос дасясько. Арысь аре выльдӥське дӥськутсы. Таяз учыре но курткаосынызы синэз мальдытӥзы Пичи Пурга, Сюмси, Вавож но мукет ёрос командаос. Ёрос центръёс но куноосты пумитан азьын выльдӥсько, чеберско. 7 ар талэсь азьло Пичи Пурга черкогуртын ортчизы вал гужем шудонъёс. Соку ёрос центре выль стадион, спортивной комплекс кылдӥзы, таяз учыре ёрослы куас база пуктӥзы, хоккей коробказы но выльдӥськиз.

Пичи Пурга ёрослэсь бадӟым командазэ валтӥз алигес гинэ быръем йыр — Сергей Юрин. Люкаськемъёсты со ёрослэн азинскеменыз тодматӥз, спортсменъёслы выль вормонъёс сӥзиз, нош кивалтӥсьёслы тау кариз туала куас база пуктыны юрттэмзы понна. Россилэн, дуннелэн выль чемпионъёсыз Пичи Пургалан но вордскозы.

Усьтон ужрадэ пыриськизы Правительстволэн Тӧроез Ярослав Семёнов, мугорез кыдатон культурая, спортъя но егитъёсын ужан политикая министрлэсь ужзэ быдэсъясь Наталья Гольцова, биатлонист, Олимпийской шудонъёслэн призёрзы Иван Черезов.

Трос аръёс ӵоже таӵе шудонъёсты радъяны юрттэ режиссёр Павел Поздеев. Таяз учыре Гурт шудонъёслэн шорсюлэмзы герӟаськиз пурга нылъёсын: Оксиен, Аннокен но Айноэн. Вашкалазэ, туннэзэ но ӵуказезэ огазеяськод ке, шудон-шулдыръяськон пӧрме вылэм. Брангуртысь песянайёс вань ёрос командаосысь спортсменъёсты шудыны ӧтизы. Режиссёр вераз на: ӵапак та вакытэ, 10 ар талэсь азьло, Брангуртысь песянайёс нырысьсэ бадӟым сцена вылэ потӥзы вал.

Ужрадэз усьтонэ 360 адями пыриськиз: нылпиос, культура удысын ужасьёс, спортэз азинтыны юрттӥсьёс, волонтёръёс. Тол куазен урамын кема уд сылы ке но, тросэзлы ёрос командаослы усьтон ужрад туж кельшиз. Эшшо сылыны дасесь на, шуизы.

Куас сюрес но выль база

Выль куас базалэн кивалтӥсез Сергей Нилов шумпотэмын чебер юртлы. Пургаос малпасько ни ӵуказе нунал сярысь. Ӝоген отчы выль мебель, куасъёс ваёзы. Вань мылкыд карисьёс куасэн нискыланы быгатозы. Сюреслэн оглюкетэз югдытӥськоз, со понна юбоос пуктылэмын ни. Азьланяз татын луоз на асфальтэн шобыртэм сюрессы но, гужемзэ, пе, пинал спортсменъёс питрано куасъёс вылын ворттылозы.

Кылдӥз выль куас база.

— Лэсьтӥськон ужъёс трос на, — шуэ нылпи спорт школаысь тренер Василий Трошкин. — Туж секытэн сётскиз куас сюрес лёгон. Быдэс Удмуртиетӥ ӵошатскыса ветлӥсько бере, эшъёсы азьын возьытэ усеме ӧз поты. Куазь гинэ но чиданлыкмес эскериз, лэся. Куас сюрес лэсьтон борды 21-тӥ январьысен басьтӥськимы. 3 нунал ӵоже 4 КамАЗ-эн лымы ворттӥмы. Ваем лымымес гусеничной тракторен лёгимы. Тау карисько калыклы, лымы пӧлысь сюй комокъёссэ бичанэ дэмен пыриськизы, котькуд шутэтскон нуналэ субботник ортчытъямы.

Нылпи тренер верамъя, та база черкогуртлэн палэназгес интыяськемын, бусыын тӧл шула. Куас сюрес нюк кузя лёгемын. Читыр-чутыр кыстӥськись сюресэтӥ ортчись спортсменъёсты вань калык адӟыны быгатэ. Соослэн 1, 2, 3 но 5 иськемъем куас сюресъёссы вань. Тужгес кузез, пе, Татарстанысь сикетӥ ортче. Табере агрызъёс но шумпотэмын пургаослэн куас сюрес лёгемзылы.

Чемпионъёсын артэ

Тросэз Гурт шудонъёсы пыриськись спортсменъёс Россилэн чемпионъёсыз луо. Валамон ни, огшоры гуртоослы соос сьӧры уйиськыны секытгес, но возьытэ усемзы уг поты. Ваньмыз бызё, берпуметӥ кужымзэс куас сюрес вылэ кельто. Шаркан команда данъяське Россилэн чемпионэныз Дина Некрасоваен. Соин но, вылды, ёрос кивалтӥсьёс асьсэ флагзэс киысьтызы ӧз куялэ. Зэмзэ но, нырысь нуналаз ик флагзы яраз. Командаен спринтын Ольга Батаногова но Дина Некрасова, вань эшъёссэс кыдёке кельтыса, финиш гожез ас ёроссылэн флагеныз выжизы.

Валентина Емельянова

Пичи Пурга ёросысь нылкышноослэн командазы вормиз эстафетаын.

Мукетыз тодмо спортсмен — паралимпиец Владислав Лекомцев. Таиз Алнаш команда понна бызьылӥз. Нырысетӥ стартэз комъяськиз. Стартэ потӥсьёс усемен, трос дырзэ ыштӥз. Бызьылӥз на эстафеталэн берпуметӥ этапаз, но командазэ вылӥе ӝутыны секыт вал.

— Россиысь куасэн бызьылӥсь паралимпиецъёслэсь быдэс командазэс Пхёнчханэ ӧз лэзе, нош милемлы стартъёсы пыриськоно, мугормес кыдатоно, соин ик Гурт шудонъёсын кужымме эскерыны малпай. Гурт спортсменъёсмы кужмо бызьыло вылэм, — шуэ Владислав Лекомцев.

Чемпионъёслэсь бызьылэмзэс учкыны школаын дышетскисьёс юри лыктӥллям. Спортсменъёс вӧзтӥзы ортчем бере гурт пиналъёс но, куасъёссэс кутчаса, соос сямен бызьыны выризы.

Ӵошатсконлэн берпуметӥ нуналаз вань спортсменъёс куас сюрес кузя люкаськемын вал. Ёрос командазы понна висьыны лыктӥллям пургаос. Пӧлазы вал Орлой, Вуж Мӧнья, Баграш-Бигра гуртъёсысь арлыдоос. Орлойысь спортсменка Светлана Филимонова та ӵошатсконлы рос-прос дасяськем. Дорысьтыз «Орлой» гожтэм флагзэ, скал гырлызэ ваем.

— Учкисьёс кесясько ке, спортсмен вань ӟигарзэ сётэ, дыр?

— Соос азьтӥ каллен бызьыны возьыт, берпуметӥ кужымме сётӥсько.

Светлана Филимонова Пурга командалэн эстафетаяз 2-тӥ этапез ортчиз. Финише вуиз гинэ, эшъёсыз понна висьыны кошкиз. Шолтрок ик кышномурт!

Валентина Емельянова

Гурт шудонъёсы пыриськиз дано паралимпиец В. Лекомцев.

Удмурт Олимпиада эстафетаосын йылпумъяськиз. Куас сюрес кузя висьыса сылӥсьёс 2 Олимпиадаез учкизы. Пхёнчханын со нуналэ 50 иськеме бызизы воргоронъёс. Куке Россиысь спортсменъёс 2-тӥ но 3-тӥ интыос басьтӥзы, Пичи Пургалась вань висисьёс шумпотэменызы кесяськизы.

Пусйыны кулэ созэ но, та нуналэ висисьёс пӧлын артистъёс но вал. Шаркан ёрос администрация культура удысын ужасьёссылы нимысьтыз автобус висъям. Озьы асьсэ спортсменъёссы понна висьыны артистъёссы но вуылӥзы.

Ӟырдыт йӧ, шыпыт класс

Хоккеистъёслэн нюръяськоназы арысь аре одӥг ёросъёс пырисько шуи ке, уг янгыша, дыр. Таяз учыре но кужмо нюръяськон пуромиз Дэри но Эгра ёросъёс куспын. Шудон 4:2 лыдын йылпумъяськиз — вормизы дэриос. Дэри командалэн капитанэз Александр Широбоков верамъя, йӧ ӟеч дасямын ӧй вал, котырак пеймыт. Ярам, нокин суй-пыдзэ ӧз тӥя.

Йӧ вылын котьку омыр ӟырда ке, шахматэн но шашкиен шудӥсьёс дорын шыпыт луэ. Эгра ёросысь шашкиен шудӥсь Олег Чураков капчиен вормиз. Быдэс шудонлы 20 минут дыр сётӥське ке, Ува ёросысь «тушмонэз» кечато пул сьӧры таки ӧз вуы. Гурт шудонъёсын таӵе учыр нырысетӥез вал.

Валентина Емельянова

Тросэз спортсменъёс улонын эшъёс ке, ӵошатсконъёс дыръя тушмонъёс луо. Пичи Пурга ёросысь Настя Фофанова но Красногорск ёросысь Аня Шутова ог-огзэс кемалась тодо ни. Арлы быдэ шахмат пул сьӧрын пумиськыло. Удалтыкуз вормисьёс пӧлы но шедё. Таяз учыре нылъёс ог-огзэс жалязы, лэся, шудонзы, нокин вормытэк, йылпумъяськиз. Паймытӥзы дэбесъёс. Шахматэн шудӥсьёс пӧлын соос 2-тӥ инты басьтӥзы.

Вуоно пумиськытозь

Ужрадэз сӥё-дано ворсан дыръя вань люкаськемъёслы нырысь ик возьматэмын вал Алина Загитовалэн выступлениез, Олимпиадаын со Россилэн командаезлы нырысетӥ зарни медаль вайиз.

Нош асьме вормись командаосты ӟечкыланы вуиз Удмурт Республикалэн Тӧроез Александр Бречалов.

Удмуртиын ортчись Гурт шудонъёс — шаермылэн данъяськонэз. Гуртъёс азинско, таза улонэн эшъяськисьёс тросгес луо, — шуиз со.

Вормисьёс

1-тӥ подгруппаын — Эгра, Дэри но Пичи Пурга ёросъёсысь командаос.

2-тӥ подгруппаын — Вавож, Шаркан но Кизнер ёросъёсысь командаос.

3-тӥ подгруппаын — Юкаменск, Сьӧлта но Кияса командаос.

Вуоно тол ӵошатсконъёс Алнаш ёросын ортчозы, нош та вакытэ гурт спортсменъёс гужемлы дасясько. Соку Гурт шудонъёс ортчозы Кияса черкогуртын. Александр Бречалов вань спортсменъёслы азинсконъёс сӥзиз но шаерамы 2-тӥ — 4-тӥ мартэ ортчоно спортэз яратӥсьёслэн тол шудонъёсазы пыриськыны ӧтиз.

 

24-тӥ гурт шудонъёс: Инты но дыр. Йылпумъянъёс

Валентина Емельянова

Удмурт Дунне
By Удмурт Дунне Февраль 28, 2018 13:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<