Юрий Перевощиков — пужым кадь юн

Удмурт Дунне
By Удмурт Дунне 29 января, 2018 17:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Юрий Семёнович Перевощиков — экономика наукаосъя доктор, профессор.  Солэн удмурт калык но экономика понна лэсьтэм ужез мертантэм. Бадӟым букваен адями — сюрес усьтӥсь, югдытӥсь, валтӥсь. Та нуналъёсы профессорлы 90 арес тырмиз.

Кулэ интыяз — кулэ кыл

Арлыдыз вань ни бере, малпасько вал: профессор редакцие лыктыны шугъяськоз. Но Юрий Семёнович, ӟар-ӟар кезьыт шоры учкытэк, чаклам дырлы вуиз. Векчигес гинэ пальтоен, кепкаен, кияз дипломатэн, сьӧраз кӧня ке книгаосын. Соку ик пусйиз 2 бадӟым сюлмаськонэз сярысь. Мед, пе, вуттысал на экономика удысъя ужъёсме  люканы (13 томен), соосты шедьтыны капчи мед луоз шуыса, Интернетэ интыяны. Кыкетӥез, удмурт калыклэн кытысь мар луэмез сярысь эскеронъёсме  азинтыны юрттӥсь утчасько, пе…

Паймоно гинэ: кытысь сомында лулкужым но мылкыд?

Аслаз улонэз сярысь мадьыкуз, тодосчи  нимысьтыз пусъе «стрелочникъёс» но «путеводительёс» сярысь. Со, пе, улонэз чутрак воштыны юрттӥсь, кулэ интыяз кулэ кыл верась, визьмась адямиос. Дырыз дыръя соос ӧй ке шедьысалзы, мынэсьтым, пе, номыр ӧй пӧрмысал.

Нялтас вераса, Юрий Семёнович ачиз но уноез понна — сюрес возьматӥсь, югдытӥсь. Ог 2 час пала вераськон вискамы солэн телефонэз ӧз чалмылы: кин ке жингыртэ, тазалык сӥзьыса, кин ке — визь-кенеш юаса.

— Кызьы юбилейдэс пусйиды? — юасько.

— Нылпиосы, внукъёсы, правнукъёсы лыктӥзы, — пальпотэ тодосчи, — трос кузьымъёс вайиллям. Но мон шуисько: мыным тӥлесьтыд кузьымъёс кулэ ӧвӧл ни, ойдолэ пуксе но мынэсьтым дэмланъёсме, верамъёсме кылзэ. Котькудӥзлэн улоназ шедьыны кулэ визьмо адямиос, визь-кенеш сётӥсьёс…

Юрий Семёновичлэн 2 пиналыз, 4 внукъёсыз но 6 правнукъёсыз.

Юрий Перевощиков республикаысьтымы тросаз удысъёсын нырысетӥез вал.

Удмуртъёс пӧлын экономика наукаосъя нырысетӥ доктор, УдГУ-ысь нырысетӥ научно-исследовательской лабораториосты радъясь но трос мукет. Ижысь дружинникъёслэсь отрядзэс кылдытӥсь но солэн нырысетӥ командирез.

Пусъемын Ужысь Горд Знамя орденэн, ВДНХ-лэн азвесь медаленыз, Фёртлэн фондэзлэн (Сан-Франциско) Данъян грамотаеныз. Ужез печатламын М. Кеннедилэн «Процентъёстэк но инфляцитэк коньдон» книгаяз (1995).

СССР-ысь Кун премилэн но М. Калашников нимо премилэн лауреатсы.

Мыло-кыдо пияшез гуртоос Горд Юрка гинэ шуылӥзы.

Бордаз кыскись книга

Юрий Семёнович вордӥськиз 1928-тӥ арын Эгра ёросысь Вортча Сэпож гуртын. Семьяязы соос 2 пиос будӥзы, Юрий — бадӟымез. Выныз — Григорий — шаерамы тодмо эмъясь вал, но улонысь кошкиз ни. Атаез колхоз председатель луыса ужаз, калык сярысь туж сюлмаськиз.

— Пу яке куро ваёно ке, атай нырысь ик адямиослы ӟеч лэсьтыны тыршиз, аслыз берлозэ гинэ ворттылӥз на, — тодаз вае Юрий Семёнович. — Атае бадӟым семьяын будэмын. Песянаелэн 14 пиналъёсыз вал. Мон вордӥськем бере пичи коркан 18 кузя улӥмы. Пичиысен ик, кӧня асме тодӥсько, туж секыт вал. Бусые сюрлоен араны ветлылӥ, мугоры ке но пичи, пыдесъяськыса ужалляй. Суйёс но, пыдъёс но, быдэс мугор но висё.

Пияш туж вазь кыстӥськиз книгаос борды. Песятаезлэн кӧня ке книгаосыз вылӥллям, но пичи Юркалы соосты исаны ӧз лэзе. Огпол атайзы доры колхоз ужъёсты эскерись уполномоченной вуэм. Пияш соку ик синйылтэм сумкаысьтыз туж зӧк книгазэ. Ма сярысь меда? Уполномоченной берозь юыса пукем, отчы ик умме усем. Нош пичи Юра уйшор берозь ӧз кӧлы: кунозы умме усиз гинэ, солэсь книгазэ поттӥз. Озьы кияз шедиз гурт хозяйствоя зӧк кыллюкам-справочник (1934-тӥ арын поттэмын), сое тодосчи али но ужаз кутэ.

Школае пичи Юрка эшъёсызлэсь быдэс арлы вазьгес мынӥз, анай-атайзэ укыр ёртӥз уга. Зэм, кӧня ке улыса, гуртысьтызы школа ворсаськиз. Табере, пе, дышетскыны 10 километр кеме Чутыре ветлоно. Отын Юра, мурт адямиос дорын улыса, тодон-валан люказ. Чутырысь 7 классъем школаез йылпумъяса,  Эгралась шор ёзо школае мынӥз на.

— Дышетскыны гинэ кутски, вань калыкез войнае келяны ӧдъязы, нош егитъёсты — Ижевскысь ремесленной училищее. Мон но отчы мыныны кулэ вал, но… пегӟи, — тодаз вае Юрий Семёнович. — Гуртэ бертӥ но, анае ӧвӧл — Балезино сюресэз лэсьтонэ келяллям. Ми 6 ареслы пичи выныным кылим. Анае одӥг-ог гинэ бертылӥз, сюрес лэсьтон интыязы ик кӧлаз.  Огпол кылӥсько, Герман Миша анаелы шуэ: Юркаед, пе, пегӟем, лэся, ук, сое утчало, пытсэт сьӧры келялозы… Мон, медаз шедьтэ шуыса, анае интые лэсьтӥськонэ кошки. Ӝыны ар Ижевск — Балезино сюресэз лэсьтонын ужай, бертӥ. Анаелы нош ик шуо: Юркадэ, пе, сёравно утчало ук… Ма кароно? Эграысь МТС-э дышетскыны мынӥ. Нош документъёсы ӧвӧл. Кызьы ке басьтӥзы ик.

Но толэзь ортчыса, НКВД-е ӧтизы. Туж кышкаса мынӥ. Мар, пе, али ужаськод? Трактористэ дышетскисько, пӧй. МТС-э жингыртӥзы, эскеризы но… лэзизы, отчы-татчы ӧз ни кыскалэ.

 

 

Тышкаса визь тыризы

МТС-ын дышетсконзэ Юрий Семёнович нырысетӥ университетъёсын ӵошатэ. Кинэз но ӧй вал, пе, татын. Пӧртэм выжы калыкъёс, пӧртэм сямъёс, мылкыдъёс. Юрий Семёновичлэн али но син азяз кыӵе ке из вылын баланда сиыса пукемзы.

— Тужгес но секытэз вал  сютэм ужан, — тодаз вае тодосчи. — одӥг пияшен ӝытазе 9 часын, мырдэм-мырдэм вамышъяса, бертӥськом ни. Малпасько, всё, тазьы ик быром… Ог-огмес пыкъяса, кызьы ке вуимы ик. 3-тӥ нуналзэ сиськытэк ветлӥськом ни вал…

Огпол мамаелы кин ке верам: Юркаед, пе, кулэ ни ук, мырдэм ветлэ. Анае дорам мыныны потэм. Нош мон гуртэ бертӥсько, но мукет сюрестӥ. Мынонъям шур дуре потӥ. Нош со паськыт вӧлскемын, ярдуръёсысьтыз потэмын. Малпасько: берлань ке кошконо, Эграла уг ни вуы, кужыме уз тырмы. А, маке луоз лу ни — вуэтӥ пото. Шурлэн шораз вуи но шӧдӥсько: выйисько ни… Кин ке утиз-а, мар-а, вай борды кырмиськи но потӥ. Котмем дӥсеным ик 8 иськемез вамышъяй на. Гуртэ бертӥ но — анай но, сиён но ӧвӧл. Пичи выны огназ дыръя кинъёс ке пыраллям, ваньзэ нуиллям…

Кузпалыныз Лидия Николаевнаен пӧсез но, кезьытэз но ортчизы.

МТС-ын дышетсконзэ йылпумъямез бере пияшез келяло трактористлэн юрттӥсез луыса ужаны. Огпол эшез дораз бертоно кариськем, уйин, пе, мунчое пырыса, лыкто, нош тон ужа. Юралы соку 14 арес вал. Уйин гырыкуз умме усем. Шуак тракторез сэзъялскиз, пияш сайказ. Учке но, трактор пичигес канавае кугӟам. Нош со канава сьӧрын 2 метр но ӧвӧл — туж бадӟым но меӵ нюк. Трактор гопе ӧй кугӟасал ке, мур нюке питырасал ни.

— Тракторлэсь рычагзэ вань кужмыным кыскасько, потыны вырисько — номыр уг пӧрмы, — тодаз вае Юрий Семёнович. — кужмы тырмымтэен, бӧрдӥсько. Берен МТС-э мынӥ. Шуисько: уг ни ужа тракторен, кужыме ӧвӧл. Монэ пу дасяны келязы. Собере жалязы-а, мар-а, возьмаськись каризы, валъёсты, пе, чаклалод. Куштэм машина кабинаын аслым пичи корка — «офис» лэсьтӥ, туж умой, шуныт пӧрмиз. Уйин возьмаськыса пуконъям умме усиськем. Со вискын МТС-лэн директорез валэн бертэм, монэ утчаса, кесяськем. Мар-о, пе, кӧлӥд-а, мар-а? О-о, шуисько. Кызьы озьы, война мынэ, нош тон кӧлӥськод! Мар вераны паймыса, азяз сылӥсько: векчи, пичи мугоро, дӥсе быдэсак кесяськемын, кельыт йырсие кузь, баблес, ымнырам но, киосам но пужыос. Мар, пе, тусыд сыӵе утялтымтэ? Доре бертыны уг лэзё, шуисько, отын анае но пичи выны, нош атай — фронтын.

 

Аслаз пиналъёсыз ӧй вал бере, кивалтӥсь монэ жаляз, лэся. Уже куриськисько шуыса заявление гожтыны косӥз. Гожтӥ. Паймиз: одӥг янгышез но ӧвӧл ук! Озьы монэ МТС-лэн директорез аслыз секретаре пуктӥз. 5 ар со дорын ужай, ма но янгышъёсы ӧй вал, кӧня со монэ тышказ, вань приказъёсты валаса, шонер гожъяны кулэ вал ук. Но со аръёс зэмос бадӟым школа луизы: бумага гожъяны но дыши, политикаез шӧдонэ но кылдӥз.

Зэм, МТС-ын ужамез Юрий Семёновичлэн киосаз (70-лэсь трос ар ортчиз!) али но кылемын: мур яраос, вандӥськем бервылъёс пытьы кельтӥзы.

Ачиз ассэ узатӥз

Юрка котьку тодылӥз: азьланяз эшшо дышетскоз, МТС-ын сое серем карылӥзы ке но. Пияш Ижевскысь индустриальной техникуме пыриз, «витьёслы» гинэ дышетскиз. Но студент вакытаз нош ик сютэм улӥз, дышетскон висказ пӧртэм интыосын ужаны тыршиз. Сютэм улэменыз, висьыны кутскиз. Ярам, кураторзы Александра Шорина юрттӥз, пияшлы санаторие путёвка сётӥзы. Озьы Перевощиков нырысьсэ кӧттырмоназ сиськиз. 

— Огпол Ижевскысь Советской ульчаетӥ мынӥсько. Азям туж интеллигентной адямиос — пиосмурт но кышномурт — вамышъяло, удмурт сямен верасько, — тодаз вае Юрий Семёнович. —  Кыкназы но чебересь, ӝужытэсь, воргоронлэн ныр вылаз — пенсне… Кызьы озьы, малпасько, Ижевскын но удмуртъёс вань вылэм. Бӧрысь тодӥ ни: тодмо тодосчиос Александра Ивановна но Пётр Николаевич Перевощиковъёс вылӥллям. Ас поннам малпай: удмуртъёс пӧлын но сыӵе йӧно адямиос вань бере, маин мон пӧртэм? Озьы ачим асме узатӥ.

Студент дыръяз ай Юрий Перевощиков одӥг тодосчилэсь верамзэ кылӥз: наука, пе, кутске мертан (измерение) бордысь. Со дырысен наукаысь котькыӵе ужез мед басьтоз, нырысь ик утчаз мертан амалъёсты. Солэн нырысетӥ ужез нимаськиз «Инженерно-экономический поиск меры труда». Кандидат но доктор диссертациоссэ но тодосчи сӥзиз ужась муртлэсь ужзэ мертанлы, та ласянь выль амалъёслы.

1966-тӥ арысен Юрий Семёнович ужаз Ижевскысь научно-исследовательской технологической институтын, нимысьтыз лушкем лабораториен кивалтӥз.

— Обороная министерстволы 5 аръем план дасямы. Собере 15 аръем планлы программаез кылдытонэн кивалтӥ. Лэсьтэм ужмес 23 томен поттӥм. Но ваньмыз со — «секретно» пус улын. Выльдӥськон кутскем бере мон со лабораторие вазиськи, ужъёсме курыса. Бадӟым сьӧд ящик поттӥзы. Вылаз «Ю. С. Перевощиков» гожтэмын, пушкыз буш. Ваньмыз архивын, пе. Бӧрысь Юрий Маслюковен — 1995-тӥ-1997-тӥ аръёсы Россиысь Кун Думаысь экономикаын политикая комитетлэн кивалтӥсеныз — та пумысь кенеши. Со шуиз: тӥ, пе, табере со эскеронъёсты ик, граждан производстволы чакласа, лэсьтэ. Озьы ик кари.

Пусйыны кулэ, Юрий Семёнович кылдытӥз экономикаын метрологияя но ужлэн квалиметриезъя (продукцилэсь ӟечлыксэ эскерон амалъёс) наукая школа. Экономикаез но метрологиез огазеяса, кылдытӥз наукаын выль ӧр. Эскеронъёссэ уже кутӥзы шаерысьтымы гинэ 20-лэсь трос предприятиос.  Со сяна — Москваысь, Ленинградысь, Тулаысь, Ковровысь промышленной предприятиос. Методикаоссэ кутэмлэн пайдаез (экономический эффект) 5 миллион манетлэсь трос луиз. Та сярысь верась нимысьтыз документъёсыз но вань.

Научно-технологической институтын ужан висказ ик тодосчи Удмурт кун университетысь политэкономияя кафедраын тыршиз, студентъёсты дышетӥз.

Трос аръёс ӵоже со Россиысь наукая пӧртэм центръёслэн диссертациосъя кенешъёсазы пыриськиз: Совето Союзысь Стандартизацияя научно-исследовательской институт (Москва), Казаньысь финансово-экономической институт, Улонлэн ӟечлыкезъя Россиысь центрлэн кенешез но мукет.

Аслэсьтыз куасалтӥз

Юрий Семёнович аслыз кузпал одӥг пол но пыраклы бырйиз. Лидиязэ со студент дыръяз ик, картошка октыкузы, синйылтӥз. Дышетсконзэ йылпумъямез бере нылашез Новосибирск областе фельдшер-акушер луыса ужаны ыстӥзы. Нош  Перевощиков Ижысь механикая заводэ ужаны кутскиз, мастер луиз. Но ӝоген солы комсомол ужен вырыны дэмлазы, пияш комсомоллэн Ижевскысь горкомаз вуиз.

Лидияен ог-огзылы гожтэтъёс гожъязы.

— Кышно кураны огнам мынӥ, — тодаз вае Юрий Семёнович. — Анай-атайёсыз Воткинск городын уло вал, ӟучъёс. Учкисько но… Корказы бадӟым, 2 этажо, туж чебер. Эх, шуисько, Юрка, кин тыныд нылзэ сётоз? Тынад номырид но ӧвӧл ук… 3 нунал ӵоже доразы улӥ, 3 нунал ӵоже ик бӧрдӥзы. Ярам, атайзы туж умой вал. Лидиялэн мылкыдызлы пумит мыныны ум быгатӥське, шуиз. Но кылдэ, Юра, сёт: бускельёсты доры сьӧд нянь юдэс кураны уд поталэ.

Семьяен улыны кутскыса но, Юрий Семёнович тодон-валан борды кыстӥськиз,  Механикая институтэ дышетскыны пыриз на. Вутскиз Вылӥ партийной школаын но дышетскыны. К. Маркслэсь но Ф. Энгельслэсь ужъёссэс пыр-поч лыдӟылӥз, ваньзэ ас визьмыныз тодыны-валаны тыршиз. Совето вакытъёсы марксизмъя теоретикъёс пӧлын туж дунъяськиз Энгельслэн «Анти-Дюринг» книгаез, отын, пе, Энгельс ваче вуэ Е. Дюринген (19-тӥ даурысь туж тодмо немец философ). Партиын ужась мурт, Юрий Перевощиков озьы ик «Анти-Дюрингъя» улыны кулэ вал. Но котькыӵе ужез пумозяз тодыны-валаны тыршись мурт аслэсьтыз Дюринглэсь но гожъямъёссэ лыдӟоно кариське. Зэм, философлэн книгаез, пе, нокытын ӧвӧл! Кытысь ке тодӥз, 1 экземплярез, пе, вань, но сое лыдӟыны нокинлы уг сётъяло. Озьы ке но Перевощиков кие та книга вуэ. Сое лыдӟемез бере Юрий Семёнович вала: нокыӵе «анти-дюринг» ӧвӧл! Та книга Дюринглы пумит уг луы. Совето Союзын пыӵась идеология быдэсак коммунистической ӧвӧл. Соин ик коммунизм кема уз улы, куашкалоз. Тае шӧдэмез бере пияш валаз мукетсэ но: партийной ужен со уз ни выры. Озьы КПСС-лэн Ижысь Октябрь ёрос комитетэзлэн кыкетӥ секретарез «умойтэм» коммунизм пумысен мылкыдзэ шара вера, сое «диссидент» шуо. Трос кыл кылэ удмуртъёс понна дурбасьтыса шара вераськемез понна но. Озьы но Юрий Семёнович аслэсьтыз куасалтэ. Тӥни соку сое научно-исследовательской технологической институтэ ужаны ысто. Азьланяз наука ик солэн улонэз, шумпотонэз но йыр висёнэз луиз.

Кыкы пужымъёс…

Ӝутскыны юрттӥз

1980-тӥ-1990-тӥ аръёсы производствоын наукалэсь палэнскизы. Но тодосчилэн йыраз бугыръяськись малпанъёсыз, экономика сяна но, мукет тунсыко ӧръёс шедьтӥзы. Ваньзэ лыдъяса-мертаса улыны дышем мурт витёнтэм шорысь кошке философие, 2 томен «Философия будничной жизни» книга поттэ. Собере кӧня ке тодосчиос огазеяськыса «Концепции современного естествознания» ужзэс поттӥзы.  Берлозэ дэмламын кунысьтымы вузъёсын дышетскон пособиез сямен кутыны. Тодосчилэн куд-ог книгаосыз Ю. Пер псевдонимен потазы на. Удмурт калыклэн кылдэмез сярысь малпанъёс но тодосчилы маза уг сёто. Уно аръёс ӵоже ни Юрий Семёнович удмурт но грек кылъёслэсь тупамзэс эскере, вашкала грек летописьёсысь, пӧртэм вакытъёсысь историкъёслэсь гожъямъёссэс чакласа, вера удмуртъёслэн Вашкала Грециен кусыпъёссы сярысь.

Но тужгес но пусйымон Юрий Семёновичлэн удмурт кадръёсты будэтон бордын ужамез. 1990-тӥ аръёсы гуртысь потэм егитъёслы туж секыт вал городъёсын вожвылъяськыны, экономистъёсты, юристъёсты дасясь факультетъёсы пырыны. Юрий Семёнович Удмурт кун университет бордын кылдытӥз экономистъёсты дасянъя нимысьтыз ёз, отын, 2-тӥ вылӥ образование басьтыса, нырысь дышетскыны быгатӥзы удмурт нылъёс-пиос гинэ. Бӧрысь та ёз пыр тодон-валан басьтӥзы вуоно удмурт юристъёс но.

Удмурт кун университетлэсь ёззэ Юрий Семёнович усьтӥз Дэбес черкогуртын но Коми-Пермяк автономной округысь Кудымкар городын. Тодосчи сокем сюлмаськиз егитъёсмылэсь тодон-валанзэс будэтыны, Дэбесысь филиалэз усьтонлы аслэсьтыз но 120 сюрс манетсэ понӥз. Вуоно студентъёс понна Дэбесысь аналтэм огъяулонниез тупатъяз, дышетӥсьёслы патер басьтӥз… Жаль, пыд пуктӥсьёс шедизы, филиал кема ик ужаса ӧз вутты. Али со юртын редакциос интыяськемын. Со понна Кудымкарысь ёз али но ужа, со нимаз вуз луиз. Огъя учконо ке, УдГУ-лэн Юрий Семёновичен кылдытэм ёзъёсыз пыр 1990-тӥ аръёсы 900 пала егитъёс потӥзы, 2-тӥ вылӥ образование басьтӥзы.

Туала улон шоры учкыса, Юрий Семёнович ӧпкеле:

— Совето вакытъёсы кылдытэм эскеронъёсмес али кунгож сьӧрын куто, со амалъёсты ик, англи кылэ берыктыса, милемлы сёто.  Нош асьмелэн сое ӟуч кылэ мукет сяменгес берыкто ни, пуштросэз воштӥське. Егит экономистъёсмы пӧртэм кунсьӧр конференциосы пырисько, соослэсь дышетско.  Англи кылэз кулэ но кулэтэм интые донгыны кутскизы, куддыръя шонертэм берыктыса, пуштроссэ сураса.

Озьы ке но Юрий Семёнович оске: куке-соку кунамы асьме историез, наукаез гажаны, ӝутыны кутскозы ай. Тае малпаса ик, со даур ӵоже (озьы шуыны луэ ни!) люкам 800 пала книгаоссэ республикаысьтымы Национальной библиотекалы кузьмаз…

— Ноку ӧй малпалля, такема уло шуыса, — шуэ Юрий Семёнович. — Вордӥськем гуртэ кемалась ӧвӧл ни, интыяз — пужым гинэ. Ог 10 ар талэсь азьло одӥгез командировкае дыръя бусы шорысь маке зӧкта пужымез адӟи. Гуртам кадь ик. Сое ӟыгыртӥ но маяллясько, соку шӧдӥ: бырем гуртме маяллясько кадь…

Елена Миннигараева

Туспуктэмъёс — Юрий Перевощиковлэн архивысьтыз

Удмурт Дунне
By Удмурт Дунне 29 января, 2018 17:00 Updated