Сьӧлта ёросысь Куашур: Йыбыртты музъемлы. Удмурт классикае сюрем колхоз оске выльысь улӟонлы

Удмурт Дунне
By Удмурт Дунне Январь 19, 2018 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сьӧлта ёросысь Куашур (Квашур) гуртэз озьы гинэ уд шедьты, уго гуртлэсь интыяськемзэ возьматӥсь пулъёс ӧвӧл. Но милемлы удалтӥз: тол куазен гуртазы тэк пукыны чидасьтэм кышномуртъёс суй-пыдъёссэс посыны сюрес вылэ потӥллям. Соос индылӥзы, кызьы Куашуре вуоно.

Ангелина Снигирёва

Куашур ульча.

17 корка — 40 улӥсь

Нина Крестьянинова но Нина Столбова кыкназы ик Куашурысь вылӥллям. Кышномуртъёс пенсиын ини, ялан телевизор сьӧрын уд пукы шуыса, сюрес кузя поръяны потало. Мугормес но выретӥськом, тазалыкмес но юнматӥськом, шуо.

Куашурлэн мукет пичи гуртъёслэн выллем адӟонэз. Куке-соку бадӟым гуртын ужгур дурыныз пӧзе вал. Ленин нимо колхоз ёросын одӥгез кужмоез вал. Колхозлэн пыд йылаз султэмез, азинскемез сярысь, Николай Соловьёв председательлы сӥзьыса, ас вакытаз «Йыбыртты музъемлы» тетралогизэ гожтӥз удмурт писатель Генрих Перевощиков.

Куке-соку гуртын покчи классъёслы школазы, медпунктсы, клубзы вал, нош пекарнязы артысь гуртъёсысь вань калыкез нянен сюдылӥз. Палэнэ ужаны ветлӥсь ӧй вал, чисто колхозын тыршизы. Огвакытэ гуртысь кышномуртъёсты мукет ёросэ скал кыскыны ӧтисьёс вал. Колхозын уждун умой басьтылӥзы соку, нокинлэн кошкемез ӧз поты. Но югдур воштӥськиз быдэс кунын но, пичи гуртъёсын но. 2000-тӥ аръёсы хозяйство лябӟиз, берло воксё банкрот луиз. Гуртоос пумен кин ёрос центре, кин городэ кошкылӥзы. Куашурын 17 коркан ог 40 улӥсьёсыз вань на, тросэз арлыдоос ни. Ог 10 мурт Сьӧлтала ужаны ветлэ, 2 егит семьяос вань на, но соос но улонзэс гуртын уг адӟо ни. Одӥгъёсыз Сьӧлтала пуктӥськыны дасясько, кыкетӥосыз городэ кошкыны малпало.

Ангелина Снигирёва

Азьвыл клублэн юртэз.

Кильмезь муниципал кылдытэтлэн йырыз Олег Пчельников верамъя, Куашурлы выль шокчон сётысал гурт котырын кыӵе ке предприятилэн усьтӥськемез. Та понна ик кӧня ке арзэ сюлмаське ини Олег Викторович. Азьвыл Ленин нимо колхозлэн бусыосыз выльысь ю-нянен мед шепаськозы шуыса, кужмо колхозъёслэн кивалтӥсьёссылы вазиськылӥз ни. Но уробо интыяз сылэ на.

— Лудъёс паськытэсь, бадӟымесь, медаз пашме вал, — шуэ О. Пчельников. — Тани Кильмезь Бияын скал гид, гараж умоесь на, Зямайын ю тысь куасьтон вань, кутскисез гинэ мед сюрысал. Гуртын уж кылдысал ке, оло, адямиос ӧй кошкысалзы. Куашуре чагыр эстӥськонэн гумыос но кыскемын ни, коркаосы гинэ пыртыны кылемын на. Вуж клублэн юртэз но ярантэм ӧвӧл на, липетсэ кышъяса, укноос пуктыса, пукон корка лэсьтыны луысал. Сюрес гурт дорозь кӧльыен шобыртэмын, Куашураз щебень кисьтэмын, зор-кот дыръя но пырыны шугъяськоно ӧвӧл. Учконо ке, гуртын улыны луонлыкъёс вань — мылкыд гинэ кулэ.

Ангелина Снигирёва

В. Столбов колхозын 30 ар ужаз.

Гуртоослэн эшшо одӥг сюлмаськонзы — тэльёс. Ёрос нюлэсъёсын котыртэмын ке но, адямиос шугъясько пуктӥськыны, пу дасяны. Сентябрь толэзьысен калык уг быгаты ни тэль поттыны лэзись документъёс басьтыны. Та югдур вылӥ кивалтӥсьёс дорын эскериське. Соин валче но тэльлэн дуныз пичи ӧвӧл, машина пу ог 10 сюрс манет сылэ. Валамон, пенсионеръёслы со дуногес йӧтэ.

Утись-вордӥсьёссы тодын

Гуртлэн историеныз трос тунсыкъяське татын вордӥськем кышномурт Галина Веселкова. Со егит дырысеныз арлыдо нылкышноос бордын колхозын ужамын. Соослэсь кылэм удмурт кырӟанъёсты, веранъёсты гожтыса кельтэм. Берлогес кутскем гуртлэн улэм-вылэмез сярысь пересьёслэсь юалляськыны.

— Шур дурамы куаос (куалаос) 300 арлэсь кемаласьгес кылдӥллям ни, — шуэ Г. Веселкова.

Ангелина Снигирёва

Батуевъёслэн семьязы.

Куашуръёс ёросын нырысь кутскизы Гуртлэсь нуналзэ пусйыны. 1987-тӥ арын, пумиськон ортчытыкузы, быдӟым оже бырем солдатъёслы синпелет пуктӥзы. Куашурысь 31 мурт кияз ож пыӵал кутэм, 9-эз гинэ берыктӥськем. Гуртоос утись-вордӥсьёссэс тодазы возё, кӧня ке ар талэсь азьло ас кужыменызы синпелетсэс выльдӥзы. Арлы быдэ Вормон Нуналэ отчы люкаськыло. Туэ нырысьсэ ӧдъяло «Вунонтэм полк» ортчытыны.

Гуртэз али возё на гурт удыслы трос кужымзэс сётэмъёс. Тани Владимир Столбов колхоз бусыосты 30 ар ӵоже гыриз-кизиз. Секыт ужын тыршемез трос таукаронъёсын пусъемын. Но воргорон ужысь ветеран ним гинэ но басьтыны уг быгаты.

Таисия но Иван Батуевъёс но ас вакытазы гурт удысын тыршизы. Кузпалъёслэн йӧн-йӧн, шуныт корказы, бадӟым хозяйствозы. Гуртын, соос сяна, пудо вордӥсьёс но ӧвӧл ни. Нош Батуевъёслэн скаллэсь куштӥськемзы уг поты ай. 4 пиналъёссы бурд улысьтызы потӥзы ини ке но, анай-атайёссы соослы юрттӥськыны тыршо. Собере, котьку ӝӧк вылын аслад сӥльыд, йӧлыд, вӧед вань ке, кыӵе усто, шуо Батуевъёс.

Ангелина Снигирёва
Туспуктӥз автор

Удмурт Дунне
By Удмурт Дунне Январь 19, 2018 16:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<