«Россиысь азьветлӥсьёс» вожвылъяськонэ пыриськизы 199 сюрс 76 кивалтӥсьёс

Удмурт Дунне
By Удмурт Дунне Январь 22, 2018 10:43

БИТ «Мастер» IT компаниысь продуктъёсъя ёзэн кивалтӥсь Максим Галимов.

«Россиысь азьветлӥсьёс» вожвылъяськонлэн берпуметӥ люкетаз потӥзы 300 адӟем карымон кивалтӥсьёс. 2-ез соос пӧлысь — Удмуртиысь. Нош кин луоз устоосыз пӧлысь устоез, тодомы 10-тӥ тулыспалэ.

«Россиысь азьветлӥсьёс» вожвылъяськонэз кылем арын ялӥз Россилэн Президентэз Владимир Путин. Отчы пыриськыны быгатӥзы 50 арескозь кивалтӥсьёс. Кызьы верало радъясьёс, конкурсэ ог 20 сюрс адями гинэ вазиськоз шуыса, малпазы вал, нош вожвылъяськыны мылкыд кариз 199 сюрс 76 мурт! Финалэ 300-эз гинэ шедиз. Валаськоды, дыр, кыӵе сӥс пыр соослы потоно луиз. Выль ар азьын тужгес устооссэ бырйизы Приволжск федерал округын. Табере Удмуртиысь, Башкириысь, Чувашиысь, Татарстанысь, Пермь, Нижний Новгород, Самара улосвылъёсысь 30 азьветлӥсьёс мынозы Сочие, 7-тӥ-10-тӥ тулыспалэ отын ортчоз вожвылъяськонлэн берпуметӥ этапез.

— Оскытэме потэ, округысьтымы вань 14 улосвылъёслэн кивалтӥсьёссы шорады учко уже кутон вылысь, — конкурсэ пыриськисьёслы вазиськиз Президентлэн Приволжск федерал округъя оскем муртэз Михаил Бабич. — Эскерисько тӥляд анкетаосты, улон-вылонды, конкурс пыр ортчемды. Кин финалэ ӧз поты, соос но кивалтӥсьёслэн син азязы улозы, азьланяз ми соосын ужалом, кусып возём. Уго та азьветлӥсьёс возьматӥзы ни, одӥг интыын вормонъёс басьтыса, соос дась мукетаз но тыршыны.

Тае пусйиз Удмуртилэн Тӧроез Александр Бречалов но. Элькунысьтымы конкурсэ пыриськем адями огез но вунэтэмын уз луы, соос Россилэн ӵуказе нуналыз понна кыл кутыны дась ини, шуиз со. Нош Удмуртиысь тужгес кужмоосыз луизы БИТ «Мастер» IT компаниысь продуктъёсъя ёзэн кивалтӥсь Максим Галимов но «Кобрейн» огазеяськонлэн кивалтӥсез, бизнес-тренер Алексей Моров. Соос егитэсь, арлыдзы шоры учкытэк, кивалтӥсёзь будэмын, котыразы ӟеч команда кылдытэмын ни. Озьы ик соос общественной ужен, наукаен выро, вотэсын блогъёссэс нуо.

«Россиысь азьветлӥсьёс» вожвылъяськонлэн финалаз потэмъёс — вормисьёс ини. Котькудзы быдэн 1 миллион манет басьтозы, та коньдонэн соос вылӥ дышетсконниын тодон-валанзэс будэтыны быгатозы. Озьы ик вормисьёс, визь-кенеш курыса, ар ӵоже вазиськыны быгатозы Россиысь тодмо кивалтӥсьёслы, Россиысь Президентлэн администрациеныз кивалтӥсьлы Антон Вайнолы, солэн нырысетӥ воштӥсезлы Сергей Кириенколы, Россиысь кунсьӧр ужъёсъя министрлы Сергей Лавровлы, обороная министрлы Сергей Шойгулы но мукет нимо-дано адямиослы.

Нош кин конкурсэ пыриськыса ӧз вуы, гырпумдэс эн куртчылэ. Кызьы вераз Сергей Кириенко, вожвылъяськон арлы быдэ ортчылоз. Со сяна, Александр Бречалов пусъемъя, таӵе конкурсъёс нимысьтыз элькунамы но ортчылозы. Озьы шаермы ӟеч кадръёсын узырмоз.

Мария Векшина

 

Удмурт Дунне
By Удмурт Дунне Январь 22, 2018 10:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<