Пичи Пурга ёросысь Миндэр гурт: Ёрос центрлы матын улыны каньыл

Удмурт Дунне
By Удмурт Дунне 12 января, 2018 16:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

 Музъемзы мамык кадь небыт

Миндэр гурт Пичи Пурга райцентрлэн урдэсаз гинэ сылэ — ог 2-3 иськемын. Со Ижысен Москвае нуись сюрес вылын шеде.

Л. Тихонова

Бадӟым гурт.

Кылдӥз 18-тӥ дауре

Миндэрын улӥсьёс, улэм-вылэмзы сярысь газетэ мед гожтом шуыса, кемалась вазиськизы ни вал. Пичи гуртъёс сярысь трос гожъяськоды, пе, ми сярысь но гожтэлэ. Ма бен, гуртоослэсь куронзэс быдэстӥм, одӥг нуналэ вуылӥм Миндэрын улӥсьёс доры.

Миндэрысь библиотекаын Регина Логинова ужа. Сюмси нылаш, Ижысь гурт хозяйствоя академиез йылпумъяса, книгаос бордын ужаны кутскем. Егит муртэ нылпиос но, арлыдоос но ярато, котыраз кыстӥсько. Регина Сергеевнаен кенешыса пукон сяменымы библиотекае быдэс ӟыгыр удмурт книгаосын но «Удмурт дунне» газетъёсын нылкышно пыриз. Ассэ Екатерина Иванова шуиз.

Л. Тихонова

Миндэрлэн пусэз — бадӟым сюрес вамен выж.

— Лыдӟиськыса асме ачим буйгатӥсько, — вера нылкышно. — Мыным та ӟыгыр книгаос но газетъёс арнялы сяна уг тырмо, пыдъёс асьсэос библиотекае кыстӥсько. Азьло «Удмурт дуннеез» почта пыр басьтӥсько вал, табере дуногес потэ ини, библиотекаысь лыдӟыны октӥсько. Сьӧрам нуныкайме но нуллӥсько, мед дышоз лыдӟиськыны. Милемлы, уж пӧлы выем адямиослы, егит дыръямы ноку вал лыдӟиськыны.

— 40 ар татын улӥсько ини, — вера Татьяна Михайловна Девятова. — Миндэр арысь аре син азьын воштӥське. Бызён арам  коркаос но туж ик трос ӧй вал на, табере соос зор бере губиос сямен бычыр гинэ будо. Улон воштӥськемъя адями но воштӥське, табере Миндэрын олокинэз но улэ ини. Кык-куинь гинэ ульчаос вал, соосты Шурсьӧр но Уллапал шуылӥзы. Табере ваньмызлы ӟуч нимъёс сётъямын. Одӥгез ульчамы данъяськымон луэ — со Быдӟым оже бырем Коростелёв агай-вынъёслэсь нимтулзэс нуллэ. 10 нылпи пӧлысь 5 пиос тушмон ки улэ бырыны шедизы.

Л. Тихонова

Библиотекарь Р. Логинова котыраз пиналъёсты биня.

— Миндэрмылэн историез туж тунсыко, — вера гуртлэн старостаез Яков Игнатьевич Девятов. — Кемалась дырысен, 1730-тӥ аръёсы, татчы Логин пересь вуэм, солэн пиез Матвей вылэм. Тӥни со пушъетъёс али ке но Миндэр гуртлы бырыны уг сёто. Гурт шортӥмы Анӟесь шур бызе. Нырысь-валысь пересьёс палэнэгес, Оӵ шур дуре, улыны интыяськиллям вылэм. Гуртсэс Пӧсьтол-Анӟесь нималлям. Соку котырак сьӧд нюлэс вылэм ай. Гондыръёс но кионъёс алямен, со интыязы улыны быгатӥллямтэ ни, вылӥегес, та интые, тубиллям. Нош малы гуртсэс мукет нимын нималлям, сое тодӥсь ӧвӧл ни. Куд-огез пересьёс верало вал, музъемзы мамык миндэр кадь небыт луэмысь, пе, гуртсэс Миндэр шуиллям. Мукет веран но вань. Толалтэ, корказы кезьыт медаз пыры шуыса, пияла басьтыны быгатымтэысьтызы, укноосазы миндэръёс тыро вылэм. Миндэр кушем нимо воргорон но вань вылэм, шуо. Татын Граждан ож дыръя тќдьыос гордъёсын ожмаськиллям. Солэн бервылыз али но шӧдӥське на — снарядъёсты шедьтыло. Вазен бадӟым сюрес мукет азетӥ кошке вал, табере со вӧзамы ик. Паськыт сюрес вамен потанъязы адямиос бырыны шедё вал, соин ик маке быдӟа выж лэсьтоно луизы.

Клубзы но школазы асьсэлэн

— Гуртын корка нимъёс возисько на: Козаос, Овераос, Тутимаос, Аманъёс, Абрамъёс, Васьконъёс, Прокоръёс, Васёкъёс, Пушкаръёс, Мукшиос, Байсаръёс, — вера Миндэр муниципал кылдытэтлэн йырыз Надежда Логинова. — Та нуналъёсы гуртын тужгес арлыдоосыз луо Феодосия Тимофеевна Матвеева но Анисья Алексеевна Яковлева — 90 но 93 арессэс пусйизы. Миндэр гуртын вордскемын тодосчи Антонида Комарова.

Л. Тихонова

Быдӟым оже ветлэмъёслы синпелет.

Миндэрын улӥсьёслэн сюлэмшугзэс верамзы по-тӥз: пиналъёссы пумен ӟучомо, пе. Угось анай-атайёс удмурт кылэз кулэ уг каро, нылпиоссы ӟучезлы дышытэк кылёзы кожало, лэся, доразы анай кылын уг верасько.

— Райцентрлы но Огырчи городлы матын улӥсь-ком бере, адямиослэн Миндэре лыктэмзы потэ: быгатӥсез корка пуктэ, тросэз дасьсэ басьтэ, — верало Миндэр муниципал кылдытэтысь специалистъёс Людмила Дмитриева но Екатерина Титова. — Ваньмыз умой кадь, но сюлэмшугъяськытӥсь палыз но вань. Райцентрлы матынэн ваньзэ отчы карыны туртто. Ярам, пичи ке но асьмелэн  клубмы вань на. 4-тћ классозь нылпиос татын ик тодон-валан люканы быгато, собере Пичи Пурга черкогуртэ кошко. Гуртын ноку но школамы ӧй вал. Покчиослы школа усьтон сярысь сюлмаськиз азьвыл сельсоветэн кивалтэм Михаил Павлович Ильин. Милям озьы ик ӧвӧл медпунктмы. Арняяз одӥг пол, покчиарняе, калыкез эмъяны Пичи Бӧдьяысь фельдшер Светлана Геннадьевна Викулова ветлэ.

Л. Тихонова

Миндэр муниципал кылдытэтэн кивалтӥсь Н. Логинова, специалистъёс Л. Дмитриева но Е. Титова.

Шайтанэз улляло дэмен

Гуртын возиськись сям-йылолъёс сярысь маде Татьяна Девятова:

— Миндэрын пересьёслэн туж тунсыко сям-йылолзы возиське на. Паска азьын вторник нуналэ ми быдэс гуртэнымы шайтанэз улляськом. Нылпиос нуназезэ гурт кузя, кеньыр бичаса, ветло. Ӝытазе сопал но тапал ульчаосы силёлэсь тылскем ӝуатӥськом. Шальтраосын (вашкалаослэсь адӟем карыса лэсьтэм шальтыртӥсь шудон), исьнеръёсын, ӝуась тылъёсын ваньмы шур дуре вуиськом но гуртысьтымы шайтанъёсты кесяськыса келяськом. Собере, трос нылпиё семьяе пырыса, вӧсям ӝукез ваньмы ӵош сииськом. Озьы гуртмес вашкала амалъя чылкытатӥськом.

Миндэр гуртысь шумпотыса кошки: Миндэр муниципал кылдытэтэн кивалтӥсь Надежда Логинова эшъёсыз понна «Удмурт дунне» газетлы гожтӥське, солы, пе, муниципал кылдытэтын уксё уг висъяськы. Туэ газетэз лыдӟом ни шуыса, Девятов кузпалъёс но шумпотӥзы.

Любовь Тихонова

 

 

 

Удмурт Дунне
By Удмурт Дунне 12 января, 2018 16:30