Максим Галимов — Россиысь огез азьветлӥсь

Удмурт Дунне
By Удмурт Дунне 24 января, 2018 15:30

Максим Галимов БИТ «Мастер» компаниысь продуктъёсъя ёзэн кивалтэ. Шуэ: 21-тӥ даурысь кивалтӥсь ас котыраз ӟеч но сэрыт ужась адямиосты биняны кулэ. Оген тыршыса, азинскыны уд пӧрмыты.

Берло 3 арзэ Максим Галимов ужа БИТ «Мастер» компаниын, кивалтэ продуктъёсты лэсьтонъя ёзэн.

БИТ «Мастер» компаниын лэсьто таксиослы программной обеспечение.

— Вожвылъяськон сярысь шуак тодӥ, эше мерлыко бамаз ивор поттэм. Но кема малпаськи, анкетаме берпуметӥ часъёсы ыстӥ, — вера Максим Галимов. — Нырысетӥ этапъёсаз трос пӧртэм тестъёс, йыртӥянъёс лэсьтоно луиз. Озьы ачим сярысь трос выльзэ тодӥ, сямылэсь зол палъёссэ адӟи, валай, кыӵе мон кивалтӥсь. Конкурсэ зэмзэ но туж кужмо адямиос пыриськизы, макем соос умой верасько, кыӵе уж берыкто.

Максим Галимов IT удысэ школаысен ик вамыштӥз ни, ӵапак со дышетскон вакытэ, 1990-тӥ аръёсы, вӧлмизы компьютеръёс, кылдӥз Интернет. Ижысь 41-тӥ лицейын, кытын тодон-валан басьтӥз Максим, кутскизы дышетыны информатикаез, программированиез. Максимлы та туж кельшылӥз. Соин ик 11-тӥ классын нокыӵе юанъёсыз ӧз кылдылэ: документъёссэ сётӥз Ижысь механикая кун университетэ, информационной но вычислительной техникая факультетэ.

Вормонъёс инмысь уг усё. Максимлэн нуналысь нуналэ ужамезлэн емышез али шӧдӥське. Университет бере со «Компьютер» НПО огазеяськонэ программист луыса лыктӥз, пумен эскеронъёсты ортчытъянъя ёзлэн кивалтӥсез луиз. Со сяна, дышетсконзэ ӧз уреты, аспирантураез йылпумъяса, технической наукаосъя кандидатлэсь нимзэ басьтӥз. Берло 3 арзэ воргорон ужа БИТ «Мастер» компаниын, кивалтэ продуктъёсты лэсьтонъя ёзэн.

Кыӵе луыны кулэ 21-тӥ даурысь азьветлӥсь, кивалтӥсь? Кызьы вера Максим, быгатоно котькуд ужаседлэсь малпанзэ кылзыны, котырад ӟеч но сэрыт ужась адямиосты люканы. Оген адями бадӟым ужез берыктыны уз вормы.

Мария Векшина

Удмурт Дунне
By Удмурт Дунне 24 января, 2018 15:30