Кин басьтоз Удмуртиысь Правительстволэсь «Данъян» премизэ

Удмурт Дунне
By Удмурт Дунне 29 января, 2018 16:30

Кылем арын «Данъян» премия басьтӥзы Г. Бускин, Л. Королева, И. Кирилюк.

Тодмо луиз, кин туэ пусъемын Удмуртиысь Правительстволэн «Данъян» премиеныз. Сое арлы быдэ сёто лулчеберет удысын ужасьёслы калык культураез азинтэмзы понна.

«Данъян» («Признание») премия сётъяське 2007-тӥ арысен. Арлы быдэ сое басьтэ 5 адями, котькудӥз калык культураез — кырӟанэз, крезьгурез, эктонэз, киужез — гажа, уте, азинтэ. Вожвылъяськон туж ӟырдыт ортче, туэ но, кылсярысь, 17 мурт аслэсьтыз портфолиозэ ыстӥз. Но вормизы устоосыз пӧлысь устоосыз!

Озьыен, «Калык эктон» номинациын пусъемын Ижысь «Шудон» ансамбльлэн кивалтӥсез Юлия Павлова. Искусствоосъя элькун школаысь коллектив ялан поталля фестивальёсы, отысь вормонъёсын бертылэ. Шыкысазы — пӧртэм калык кырӟанъёс, эктонъёс, сям-йылолъёс. Ансамбльлэн та узырлыкез арысь аре будэ, уго Юлия этнографической экспедициосы поталля.

— «Шудон» ансамбльысь 3-ез нылпиосы «Наследники» премия басьтӥзы ни, черод мон дорозь но вуиз, та мынам нырысетӥ таӵе бадӟым данъетэ, — шумпотэмзэ ватытэк, вера Юлия Витальевна. — Сямы сыӵе: ас азям ужпум пуктӥсько ке, одно ик сое ӟеч быдэстыны тыршисько. Иське, малы кутсконэз?

«Калык кырӟан» номинациын устоез луиз Дэриысь «Центральный» лулчеберетъя комплексысь хормейстер Ольга Гук. Солэн кивалтэмез улсын ветеранъёслэн «Поющие сердца» хорзы калык пӧлы вӧлмытэ ӟуч культураез.

Калык крезьгурез азинтэмез понна премия сётӥське Эграысь Эшъяськон юртысь аккомпаниатор-концертмейстерлы Дмитрий Лекомцевлы. Дмитрий ачиз дышиз кубызэн, шуланэн но варганэн шудыны, калык инструментъёсын нылпиосты но мыло-кыдо тодматэ.

Алнаш ёросысь Ӧрка-гуртысь Анна Александрова пусъемын оглом калык культураез утемез понна. Со кивалтэ «Выль ӟардон» фольклорной ансамблен. Кышноос калык кырӟанъёсты быдэсто озьы, кызьы кырӟазы сое песянайёсмы но песятайёсмы, вашкала сямен.

Киужъёсъя элькун центрысь Надежда Мансурова устоез кибашлы луиз. Надежда Геннадьевна куиське, гобелен амалэн куэм ужъёсыз утисько центрлэн шыкысъёсаз, озьы ик — Россиысь но кунгож сьӧрысь адямиос киын.

Вормисьёсты сӥлы карозы южтолэзе — лулчеберет удысын ужасьёслэсь нуналзэс пусъён ужрадын.

Мария Векшина

 

 

Удмурт Дунне
By Удмурт Дунне 29 января, 2018 16:30