Гурт адями-2017: Сьӧлталась «Калмез гуръёс» ансамбльын кырӟась Галина Веселкова

Удмурт Дунне
By Удмурт Дунне Январь 9, 2018 10:36

Кемаласьгес ини Галина Ивановна басьтӥськиз семьязылэсь выжызэ утчан борды.

Паймиськомы Сьӧлталась ёрос лулчеберетъя юртысь «Калмез гуръёс» ансамбльын кырӟась кышномуртлы Галина Веселковалы.

Галина Ивановна утялтыса возе 1985-тӥ арын 27-тӥ мартэ потэм «Советской Удмуртия» газетлэсь номерзэ. Со вакытэ Ленин нимо колхозын Галина Веселкова бригадир луыса ужа вал. Газетысь журналист Геннадий Романов мыло-кыдо кышномурт сярысь 2 газет бам тыр гожтэм, нош Леонид Прозоров патретсэ но суредам.

— Мон Квашурын вордӥськи, быдэс улонме татын улӥ, — вера Галина Ивановна. — Гуртэлэсь люкиськеме ӧз поты.

Галина Веселкова нырысь гуртысьтызы Ленин нимо колхозын парсь сюдӥз. Тыршись, оскымон адями луэмзэ адӟыса, райпо сое ӧте вал магазинэ вуз карисе лыктыны. Ӵектонъёс вал Узиысь покчиослы школае директоре басьтӥськыны, Халдыысь школалэн директорез ӧтьылӥз нылпиосын продлённой группаын ужаны. Но одӥг пол Ленин нимо колхозлэн кивалтӥсез Николай Соловьёв егит муртлы бригадир луыны ӵектӥз. Таиз уж нылмуртлы сюлэмызъя луиз. Бригадирын ужаны кутскемез бере со нялтас Сарапулысь совхоз-техникумын заочно амалъя дышетскиз, агроном луиз. Лэчыт визьмыз понна сое трос пол бырйылӥзы  Депутатъёслэн ёрос Кенешазы. Сокугес ик нылкышно пыриз Екатеринбургысь Высшой партийной школае дышетскыны. Но со вакытэ Совето Союз куашканы ӧдъяз, кивалтон удысъёсын ужаны ӧз кылды ни. Ужзэ азинтӥз колхозын ик. Пенсие потытозяз, агроном вал.

Егит дырысеныз Галина Ивановна мӧйыгес нылкышноос пӧлын ужаз, ваньмон дырзэ но соос пӧлынгес ортчытъяны кылдӥз.

— Кышноосмы сьӧры сӥзьыл пӧртмаськонэ трос пол ветлылӥ, — тодаз вае Г. Веселкова. — Та сям-йылол дыръя быдэсъяськись кырӟанъёсты гожтыса кельтӥ. Табере ёросысь пиналъёсты «Удмурт Кенешлэн» куремезъя та аспӧртэм йылолэн тодматӥсько.

Озьы ик Галина Ивановна огвакытэ кутскиз гуртэзлэсь историзэ люканы. Коркась корка пыраса, юалляськиз Квашурын азьвыл улэмъёс, Быдӟым оже ветлэмъёс сярысь. Табере гуртоос котькуд Вормон нуналэ гуртысьтызы синпелет дорын тодазы ваё асьсэлэсь геройёссэс.

Кемаласьгес ини Галина Ивановна басьтӥськиз семьязылэсь выжызэ утчан борды. Шедьтӥз ини 7 поколенизэ. Атаезлэн песятаез Пётр Суслов узыр улэм, коркаез кильтро наличникъёсын вылэм. Сое кулаке поттӥлям но ваньбурзэ талаллям, семьяез мунчое улыны кылем. Анаезлэн ӵужмуртэз Фёдор Агапович Столбов  Быдӟым ожмаськонэ пыриськем, 7 ар службаын вылэм. Дораз берытскемез бере Меньгашур колхозын председатель луыса ужам. Анаезлэн агаез Николай Иванович Столбов сельсоветын кивалтӥсь вылэм.

Галина Ивановналэн 2 нылпиез. Гурт удысын ужамез понна трос данъетъёсын пусъемын, ёрослэн Данъян пул вылаз пыртылэмын, ужысь ветеран луэ. Ветеран огазеяськонлэн ёзчиез мыло-кыдо пыриське «Калмез гуръёс» ансамбле. 30 арлэсь кема ини со «Удмурт дуннелэн» лыдӟисез луэ. Мыло-кыдо кышномуртэз дэмласькомы «Гурт адями» конкурслэн «Выжыоссэ утись» номинацияз.

Елена Чувашова,
Сьӧлта черкогурт

Удмурт Дунне
By Удмурт Дунне Январь 9, 2018 10:36
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<