Гурт адями-2017: Нырысетӥ удмурт

Удмурт Дунне
By Удмурт Дунне Январь 11, 2018 11:30

Сюмси ёросысь Туканысь Евдокия Михайловна Ильиных.

Сюмси ёросысь Туканысь Евдокия Михайловна Ильиных — ёрослэн дано муртэз, Удмуртиысь дано ветеран, нимыз «Удмурт Кенешлэн» Данъян книгаяз пыртэмын, ёросамы удмурт культураез нырысетӥ утись-азинтӥсь.

Евдокия Ильиных Сюмсиын «Удмурт Кенешлэсь» ёззэ кылдытӥсьёс пӧлын вал, кема аръёс ӵоже соин кивалтӥз. Али но «кенешчиослы» гань-гань улыны уг сёты: удмурт ужрадъёслы сценарийёс дасялля, адямиосты пӧртэм ужрадъёсы пыриськыны ӝутка. Паймиськомы, со сомында вашкала сям-йылолъёсты тодэ шуыса.

Евдокия Михайловна пӧртэм удысъёсын — колхозын, школаын — ужалляз ке но, ӧз кыльылы удмурт ужрадъёсы пыриськытэк. Пенсие потытозяз, со лулчеберетъя юртэн кивалтӥз, трос аръёс ӵоже Туканысь ветеранъёслэсь огазеяськонзэс валтӥз. Со ас вакытаз кылдытӥз но валтӥз та гуртысь ик «Кенакъёс» ансамблез. Коллектив Евдокия Михайловналэн сюлмаськемезъя удмурт-сям йылолъёсты улӟытъяз, соосты ёрос но элькун сцена вылысен возьматъяз. Али ансамбль ёрос культурая юрт борды юнматэмын, азьланьтэ Евдокия Михайловналэсь кутскем ужзэ.   Сюлмысьтыз удмуртлыкез утемез но азинтэмез понна со трос данъетъёсын пусъемын. Ми, Сюмсиысь удмурт движение пыриськисьёс, сое куспамы ёросысь нырысетӥ удмурт шуиськомы.

Евдокия Ильиныхлэн, ма борды гинэ уг басьтӥськы, котькытын шӧдӥське вашкалазэ гажамез. Али со выжыоссэ утчан сярысь сюлмаське. Выжыяз Анна нимо 30 кышномуртъёс вылӥллям, пе. Та сяна, Тукан гуртлэсь, Маркел школалэсь — татын дышетскиз но ужаз — историзэс гожъя, трос лыдӟиське.

Евдокия Михайловналэн вашкала арбериосын узыр сандыкез но вань: отын трос пумо дэра дэремъёс, уксё тӥрлыкъёс, 150-лэсь уно кышетъёс, нош одӥгез ӝӧккышетэзлы 100 ар пала ни. Сое туж чакласа возе Е. Ильиных.

Удмуртлыкез калыкмы пӧлын вӧлмытэмез, вань сюлмысьтыз вашкалаез утемез понна Евдокия Михайловна Ильиныхез ӵектӥськомы «Удмурт дуннелэн» «Гурт адями» конкурсаз «Выжыоссэ утись» номинацие.

Раиса ВОЛКОВА,

Сюмси ёрос

 

 

Удмурт Дунне
By Удмурт Дунне Январь 11, 2018 11:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<