Гурт адями- 2017: Можга ёросысь Учаысь  лулчеберетъя юртэн кивалтӥсь Сергей Крутихин

Удмурт Дунне
By Удмурт Дунне Январь 10, 2018 15:40

Кин уг тоды меда та шумприч адямиез? Сергей Иванович Крутихин Можга ёросысь Уча гуртысь  лулчеберетъя юртэн кивалтэ, «5 яратӥсь сюлэмъёс» ансамльын кырӟа.

Можга ёросысь Учаысь С. Крутихин.

Уча калык узыр ке но быгатӥсь адямиосын, таиз «зарни» сюриз милемлы сьӧлтаослэсь. Сергей Крутихин ми доры лыктэм дырысен гуртамы арган куара чузъяськыны ӧдъяз. Олокызьы гинэ вакчи дыр куспын кырӟасьёсты люканы но ансамбль кылдытыны быгатӥз. «Чибори» ансамбльлы табере 21 ар ини. Удмуртиез вератэк, кырӟазы-эктӥзы Набережные Челныын, Екатеринбургын, Чебоксарыын но мукет интыосын. Туэ гужем Москваын православной культурая «София» 3-тӥ фестивальын  лауреатъёс луизы. Эсьмаса, ас вакытаз кырӟасьёсмес ӟырдыт пумитазы Кипрын улӥсьёс но.

Нош Учаысь «Раздолье» хоре ветлӥсь арлыдо кырӟасьёсын кыӵе быгатыса кивалтэ Сергей Иванович! Валаськомы, 18 нылкышноосын огкыл шедьтыны секыт — ваньмылэн пќртэм сямъёсмы, мылкыдъёсмы, куронъёсмы, но Сергей Ивановичмы капчиен, шудыса сямен, милемыз огинэ бичалля. Со милемлы, арлыдоослы, пыкмыны уг сёты шуод-а, мар-а: серекъятоз но, мылкыдмес но ӝутоз, чурыт ужпумъёс но пуктоз. 17 ар куспын со милемлы атай но, дышетӥсь но, эш но, пимы но кадь потэ ни. Соин валче арлыдмес вунэтӥськом, сюлэммы егит мылкыдын пачылме кадь. Кивалтӥсьмы ӝуась гур выллем — шунытэз котькинлы тырме.

Сергей Иванович школаысь пиналъёсын но ужа, нылпиос быдэс классэн дораз кырӟаны-эктыны ветло, озьы удмурт культураез калыке вӧлмыто. Нылпи садын ужасен Ольга Гоголеваен пичиос понна пӧртэм ужрадъёс дасяло. Со доры куаразэс волятыны нимаз адямиос но ветлыло: воспитательёс Раиса Шерстобитова, Валерий Романов, Косов кузпалъёс но мукетъёсыз. Ваньмызлы дыр но шуныт кыл шедьтыны быгатэ адӟем карымон воргорон.

Учаысь ансамбльёс арлы быдэ ас кужыменызы бадӟым концерт сёто Можга городысь «Дубитель» культурая юртын. «Чибори» но «Раздолье» коллективъёсмес  ӟырдыт кичабонъёсын пумитало можгаос.

9 ар талэсь азьло кылдытэмын вал «5 яратӥсь сюлэмъёс» ансамбль, отын одӥгез кырӟась — милям усточимы Сергей Крутихин.

Сергей Иванович проектъёсын но ужаны вуттӥське. 5-тӥ арзэ гуртамы туристъёслы «Кудыкино гурезьёсын пумиськонъёс» маршрут  усьтэмын. Куноос лыктыку, Уча урамъёс шулдырско арган куараен, кырӟанъёсын, чингыли ваземен. Туристъёсын пумиськонын Сергей Ивановичлэн быгатонлыкез котыр ласянь усьтӥське: утялтоз но, серекъятоз но, кырӟалоз но.

9 ар талэсь азьло кылдытэмын вал «5 яратӥсь сюлэмъёс» ансамбль, отын одӥгез кырӟась — милям усточимы Сергей Крутихин. Табере 5 Сергейёсты тодӥсьтэмез ӧвӧл ни, дыр. Ансамбль быдэс Можга ёрослэн тусэз выллем луиз ни.

Сергей Ивановичлэн киосыз но зарни: со ачиз корка пуктӥз, пушсэ чеберъяз, азбарез нош кыӵе паймымон — каксяос лэсьтэмын, куйы пуктэмын. Сад-бакчаез емышен узыр, нош пыжиськемезлэсь кылдэ ньылод.

Сергей Иванович Удмурт Правительстволэн «Данъян» («Признание») премиеныз, Кун Кенешлэн, Удмуртиысь Культурая но туризмъя министерстволэн таукаронъёсынызы пусъемын. Культура удысысь дано ужась луэ, Чернобыльысь пуштонэз чылкытатонэ пыриськемез понна «Мужество» орденэн пусъемын, Удмуртиысь Данъян пул вылэ пыртылэмын.

Зарни адямимес дэмламмы потэ «Удмурт дуннелэн» «Гурт адями» конкурсаз «Ӟеч сюлэм» номинацие.

Нина Санникова

 

 

Удмурт Дунне
By Удмурт Дунне Январь 10, 2018 15:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<