Гурт адями-2017: Алнаш ёросысь «Прогресс» возёсэн кивалтӥсез Виктор Лебедев

Удмурт Дунне
By Удмурт Дунне Январь 8, 2018 09:44

Алнаш ёросысь «Прогресс» возёсэн кивалтӥсез Виктор Лебедев.

Алнаш ёросысь «Прогресс» хозяйствое пырись гуртъёсын улӥсьёс, ваньзы одӥгтэм, ӟеч, шуныт кылъёс вералозы хозяйствомылэн кивалтӥсез Виктор Николаевич Лебедев сярысь. Мултэс мактатэк (ушъятэк), шуиськомы: со вань сюлмысьтыз висе гурт улонэз, колхозын тыршисьёслэсь ужзэс капчиятон, ӟечомытон понна.

Алнаш ёросысь Кузьымгуртын вордӥськем Виктор Николаевич алнаш музъем борды сюлмыныз биниськемын. Школа бере огшоры ужась луиз асьсэлэн ик гуртысьтызы Азин нимо колхозын. Армие ветлыса, тодон-валан люказ Ижысь гурт удысъя институтын. Туж тыршись, сэзь, шаплы вал. Соин но ас курсаз старостае бырйизы. Ӟеч дышетскемзэ но общественной уже пыриськемзэ санэ басьтыса, келязы дуннеысь  егитъёслэн Москваын ортчем фестивалязы. Институтэз горд дипломен йылпумъяз, агроном луиз.

Дышетскем муртэз соку ик «Прогресс» хозяйствое валтӥсь агрономе пуктӥзы. Валаса ужамезлэн емышез шӧдӥськиз: колхозын ю-нянь удалтылӥз, урожайность йылӥз.

14 ар колхозын ужамез бере, 2002-тӥ арын, калыкмы солы оскиз хозяйствоез валтыны. 15 ар ӵоже та ныпъетэз нуэ ини. Солы луыса колхозмы шаерамы одӥгез азинскисез но устоез лыдъяське. «Прогрессын» али 250 мурт ужа. Шоро-куспо уждунмы ог 16 сюрс — ёросысь мукет хозяйствоосысь шоро-куспо уждунэн ӵошатыса, бадӟымгес. Виктор Николаевичлэн сюлмаськеменыз, 80 процентэз техникамы выльдэмын. Арлы быдэ выль трактор, комбайн яке мукет техника басьтыны быгатӥськомы. Адӟиськомы, тӧромы зол сюлмаське гурт калыклэсь улонзэ капчиятон понна. Вазенгес ини скал гидъёсамы йӧл гумыос кыскемын — нылкышноосмы ведраосын далайгес уг йыринто ни. Озьы ик арлы быдэ выль объектъёс, гидъёс ӝутыны быгатӥськомы. Виктор Николаевичлэн малпаназ компьютерен ужась ферма пуктыны. Проектмы но дась ини, уксё ласянь гинэ могӟет кылдэмын.

Туэ гинэ гуртъёсысьтымы 3 егит специалистъёс доразы берыктӥськизы. Эштос корка ӝутыны юрттэ, куашкам юртъёсты тупатъяса, улон сэрег висъя. Егитъёсты гурт удысэ гочатон понна толэзьлы быдэ уждунзы борды ватсаса быдэн 1 сюрс манет тыриське. Колхозын тыршыны мылкыдзэс, выль техника сётыса но, бурдъяны тырше Виктор Николаевич.

Гуртын но, колхозын но сое гажасьтэмез ӧвӧл, дыр. Вань калыкмы огымысь кадь шуэ: вань гуртъёсын Виктор Николаевич кадь кивалтӥсьёс луысалзы ке, котькытын калык умой улысал. Со ваньмынымы огкыл шедьтыны быгатэ, соин валче ужаны капчи: кулэ дыръяз чурыт вералоз, мукетъят макталоз но. Виктор Николаевич ӟеч сюлмо, котьма борды мыло-кыдо басьтӥськись, ужзэ йылаз-пумозяз вуттыны быгатӥсь адями. Кивалтӥсьлэн ужъёсыз лачак ке но, котьку дыр шедьтэ гуртэз азинтонлы сӥзем проектъёс борды итӥськыны, тросэзлы ачиз кичӧлтӥсь луэ. Тани Туймыйыл гуртысь сюрес кузя солы луыса кызьпу аллея мерттэмын, нош колхоз гидъёс, амбаръёс, гаражъёс котырын кӧня писпуосмы, сяськаосмы пушъё. Виктор Петрович котькытын чылкытэз, ӝикытэз яратэ. Колхоз контораямы пырисьёс чылкак паймо, быдэс укно янакъёсмы сяськаосын тырмемын. Солэн куремезъя ик ферма гидъёс котырамы но сяськаос будо.

Виктор Николаевич дыр шедьтэ ёрос ужрадъёсы но пыриськыны. Озьы 2007-тӥ арын солэн юрттэмезъя югыт дуннеез адӟиз Михаил Соловьёвлэн «Туймыйыл. У истоков Тоймы-реки» книгаез. 2015-тӥ арын тупатэмын вал колхозлэн музеез. Отчы тӥрлык но пукон-ӝӧкъёс басьтэмын. Музее люкамын Туймыйыл котырысь гуртъёслэн историзы, адямиос сярысь материалъёс, туспуктэмъёс. Озьы ик Виктор Николаевич Туймыйылын али ӝутӥськись черкез пуктон борды итӥськиз. Али со липет улэ пыртэмын ни.

В. Лебедевлэн кичӧл-тэмезъя Туймыйылын ог 10 ар ӵоже ортчылӥз гуртысь крезьгурчиос куспын ёрос вожвылъяськон. Та сяна, Виктор Николаевич гуртысь школалэн ялан спонсорез луэ. Берпуметӥ гырлы жингыртыку но, 1-тӥ сентябре но Виктор Николаевич сӥё-дано куноос пӧлын. Нылпиос доры со буш киын ноку уг лыкты — кузьымъёсын. Ӟеч дышетскисьёслы, гужем куспын колхозын тыршем нылпиослы коньдон кузьымъёс сётъя. Пиналъёсты гурт удысъя дышетсконзэс азинтыны но выльысь гуртазы ик берыктӥськыны ӝутка.

Виктор Николаевич вазенгес кырӟаны ветлылӥз Туймыйылысь воргоронъёслэн хоразы. Куспамы волейболэн шудонъёс ортчыло, ачиз но отчы мыло-кыдо пыриське. Оло, солы луыса ик ужасьёсмы пӧлын аракыен эшъяськисьёс ӧжыт.

Колхоз кивалтӥсьмылэсь лулысь-сюлмысь тыршемзэ гурт калык гинэ уг, вылӥ кивалтӥсьёс но дунъяло, визь-кенешлы вазиськыло, верамезлэсь кылзћсько. Виктор Николаевич Удмуртиысь гурт удысысь дано ужась луэ, данъямын Кун Кенешлэн, Россиысь Гурт удысъя министерстволэн таукаронъёсынызы. Туэ пусъемын        Т. Борисов нимо ёрос премиен. Туэ солы, гурт удысын ужасьёслэсь нуналзэс пусйыку, сётэмын «Ёросысь устоез кивалтӥсь» ним. Дэмласькомы адӟем карымон гуртомес «Удмурт дуннелэн» «Гурт адями» конкурсэзлэн «Устоез кивалтӥсь» номинацияз.

Алнаш ёросысь «Прогресс» хозяйствоын ужасьёс,
Туймыйыл, Удмурт Вишур, Шубино гуртъёсын улӥсьёс

 

 

Удмурт Дунне
By Удмурт Дунне Январь 8, 2018 09:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<