Дэбес ёросысь Данёгурт: Асьсэды асьсэос шулдырто. Ӝожтӥськыса улыны маза ӧвӧл

Удмурт Дунне
By Удмурт Дунне 26 января, 2018 16:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дэбес ёросысь Данёгурт интыяськемын Дэбес — Шаркан сюрес вылэ. Гурт улонзы пӧзе, колхоз ужъёссы азинско, но мон тужгес но синмаськи гурт калыклэн шулдыръяськыны быгатэмезлы.

Данёгурт ульча.

Тулыс нӧд, гужем тузон

Документъёсъя учконо ке, пичизэ но бадӟымзэ лыдъяса, Данёгуртын 81 коркан 192 улӥсез. Гуртын вань клубзы, библиотеказы, ФАП-сы, нылпи садзы. Дано адямиоссы лачак. Кылсярысь, Национальной библиотекаын тыршись, культура удысысь дано ужась Надежда Лимонова, техника наукаосъя доктор Владимир Первушин, Свердловск улосысь Верхняя Пышма городысь удмуртъёслэн азьветлӥсьсы Зоя Лощилова но мукетъёсыз.

— Улонмы шулдыр, ушъяськымон кадь, но милям но котькыӵе дыръёсмы луыло, — шуэ муниципал кылдытэтэн кивалтӥсь Нэля Коробова. — Нылпи садэ ветлӥсьёслэн лыдзы арысь аре ичиёме, та вие 10 тэшкылиос кылемын. Бадӟым пиналъёсты автобусэн Тыловай школае — 10 иськеме — нулло. ФАП-лэн пу юртэз вуж, гурен эстӥське, ярам коть, отын ужасьмы вань — егит фельдшер Татьяна Куртеева, 2-тӥ арзэ умой ужа, данъяськиськомы соин.

Гуртоослэн шумпотонзы но данъяськонзы — газ. Табере пу дасяса уг уло, юртъёсты шунтэ чагыр эстӥськон. Гуртэ выль ФАП пуктон сярысь вераськонъёс кемалась, пе, ветло. Лэсьтӥськон ужъёс туэлы чакламын вылэм, но малы ке солэсь дырзэ вуоно арлы выжтӥллям. Озьы ке но гуртоос ӟечезлы осконзэс уг ышто, Чапаев нимо хозяйствоез ӝутыны юртто. Соин быгатыса кивалтэ Татьяна Мефодьевна Хохрякова. Кылем арын июль толэзе сюро таза 200 йыр пудолы выль гид пуктӥзы. Ужъёссы синмаськымон мыно.

Кылем гужем усьтӥськиз выль скал гид.

— Ужасьёсмы чисто пенсие кошкыны дасясько, туннэ нуналлы кунян сюдӥсьёсмы но, скал кыскисьёсмы но, механизаторъёсмы но уг тырмо, — шуэ гурт хозяйствоен кивалтӥсь Татьяна Хохрякова. — Техникамы вань — ужась киос ӧвӧл. Дэбесысь ветлыса ужасьёсмы но вань ни. Дӥнямы лыктыны мылкыд карись специалистъёс понна улон корка дасяськомы, туннэ нуналлы газ кыскон гинэ кылемын на.

Мукетыз сюлмаськонзы — сюресъёс. Ёрос центрлэсь Данёгурт 16 иськеме интыяськемын, сюрессы — грунтовка. Гужемзэ тузонэн шокамзы уг луы, сӥзьыл-тулыссэ нӧдэ выё. Толалтэзэ Тол бабай сюрессэс волятыса уг вуы ке, со быдэс тол мисьтаськон вӧш выллем луэ. Машинаос дынгыр-р солань-талань ветло. Кемалась ик ӧвӧл та ёросэ шаерысьтымы вылӥ кивалтӥсьёс вуылӥзы, соос оскытэмъя, 2019-тӥ арын сюрес лэсьтон борды басьтӥськозы. Соку Дэбесысь Данёгуртозь сюреслэсь оглюкетсэ асфальтэн шобыртыны кулэ.

Таня но Маня — Т. Лопатина но О. Максимова.

Гын сапеген хоккей

Альбина Хохрякова скал кыскись луыса тырше, хоккеез яратэ. Солэн кичӧлтэмезъя Выль ар каникулъёс дыръя хоккеен шудон ортчиз.

— Шулдыр тол нуналъёсы коркан пукем уг поты, — шуэ Альбина Юрьевна. — Корка вӧзысьтымы тыметэз сузяны малпай, юрттӥсьёс но шедизы. Озьы гуртамы каток кылдӥз.

Хоккеен шудыны мылкыд карисьёс трос люкаськизы. Пиналъёс но, мӧйыос но йӧ вылэ кыстӥськизы. Гын сапегъёсын шудо, клюшкаоссы ке — зэмос хоккеистъёслэн выллем. Шайбазы огшоры ӧвӧл: вылӥ хоккей лигалэн пусэныз. Тазэ кузьмаллям «Ижсталь» командаысь хоккеистъёс.

Хоккеез яратӥсь, скал кыскись А. Хохрякова.

— Ижысь санаторийын шутэтскыкум, хоккей учкыны ветлӥ, отысь ик кузьымен бертӥ, — валэктэ Альбина Хохрякова.

Данёгуртын улӥсьёс кылем арын но хоккеен шудӥзы. Ӵошатсконъёсы соку пыриськизы вал Вылӥ Четкерысь но Шудзялудысь нылкышно командаос. Туэ но вожвылъяськон учкымон вал. Судьялэсь но комментаторлэсь ужзэ быгатыса нуиз гуртысьтызы ик воргорон Сергей Кельдибеков. Нылкышноослэсь шудэмзэс учкыны сюрес кузя ортчись машинаос ик дугдылӥзы.

Таня но Маня

Гуртазы вань Таня но Маня маскарчиоссы. Татьяна Лопатина но Ольга Максимова пӧраськись луыса ужало: огез нылпи садын, мукетыз колхоз столовойын. 2016-тӥ арын Данёгуртысь культура юртэн кивалтӥсь Людмила Хохрякова нылкышноослы дуэт кылдытыны ӵектӥз.

Маскарчиос Дэбес ёросысь Бадӟым Ӟӧтым, Удмурт Льӧм, Четкер, Тыловай гуртъёсы вуылӥзы ни. Соосты Дэбес черкогуртын но тодмасьёс вань ни.

— Нош кылем сӥзьыл Эгра ёросысь Сэп гуртын «Удмурт дунне» «Шӧкыч кар» маскаръяськон фестиваль ортчытӥз, ми но отчы пыриським. Отысь бурдъяськыса вуим. Асьмеды возьматӥм, калыкез адӟим, — верало Т. Лопатина но О. Максимова. — Фестивальын «Шӧкычлэн песьтэрез» книгаен тодматон ортчиз. Та бичетэ «Удмурт дунне» газетын печатлам юморескаос, серемес учыръёс, такмакъёс пыртэмын. Со книгалы туж шумпотӥмы. Угось серемес веросъёс кулэлэсь но кулэ.

Данёгурт ульча.

«Поле чудес»

Данёгуртысь арлыдоос Вуж выль арез туж тунсыко пумитазы. Библиотекарь Антонида Хохрякова но культура юртэн кивалтӥсь Людмила Хохрякова соослы «Поле чудес» шудон дасяллям. Ваньмыз телепередачаын кадь вал: шудӥсьёс барабан бергатӥзы, букваосты, кылъёсты тодылӥзы, призъёс утӥзы.

Шудон сӥземын вал Выль ар но Ымусьтон праздникъёслы. Кылъёсты тодон вискын кырӟанъёс но кылбуръёс чузъяськизы, маскара сценкаос вал.

«Поле чудес» шудон арлыдоослы сокем тунсыко потӥз, соос дырлэсь ортчемзэ ик ӧз шӧдэ. Вормисе потӥз но валтӥсь призэз утӥз Раиса Хохрякова.

Руфима Ложкина

Удмурт Дунне
By Удмурт Дунне 26 января, 2018 16:34