Юрий Тюрин: Туннэ нуналэн гинэ улыны уг яра

Удмурт Дунне
By Удмурт Дунне Декабрь 30, 2017 13:47

Выль ар азьын котькудӥз оске выжыкыллы — пиналъёс возьмало Тол бабаез, арлыдоос  малпало,  вуоноез ар одно ӟечгес луоз шуыса. Выжыкыл вань, сое ачид лэсьтӥськод ке, шуэ туннэ героймы — Кун Кенешысь бюджетъя,  вытъёсъя но коньдон ужпумъёсъя ялан ужась комиссиен кивалтӥсь Юрий ТЮРИН.

Юрий Тюрин.

— Юрий Алексеевич, туэ тӧр шорамы потаз ни одӥгеныз Юрий Тюринэн — Ижкарлэн йырыныз — интервью. Тодмо адямиос, кивалтӥсьёс пќлын паньтэмъёслы умойгес-а, яке со люкетылэ?

— Бен, ми тодмо Юрий Александровичен. Атай нимъёсмы гинэ пӧртэм. Луылэ, огшоры калык суралля милемды. Ӧй шуысал, со люкетэ, но котькуд адямилэн потэ, дыр, аслаз гинэ нимыз мед луоз шуыса.

— Тӥ Кун Кенешлэн 3-тӥ ӧтчамаз депутат ни. Но азьло тӥ огшоры депутат вал, нош табере ялан ужась комиссиен кивалтӥськоды. Пӧртэмлыксэ шӧдӥсько-ды-а?

— Веранэз ик ӧвӧл. Уж ватсаськиз олокӧня полэс. Азьвыл, сессиос азьын вань документъёсты но учкыса уд вуттӥськы ке, комиссилэн председателезлы оскиськод — со ваньзэ тодэ ук! Нош табере ваньзэ аслым пыр-поч эскероно, мукет депутатъёслы валэктоно, сессия азе ӵектонъёсын потоно. Тросэзлы выльысь дышетскисько.

Пичи дыръяз гуртын кунояськыкуз.

— Тӥ кыл кутӥськоды бюджетэз чаклан-радъян понна. Со котьку но шуген кутӥське. Котькуд ар шымырскиськом, нош пунэмъёсысь ум потӥське, куке вуоз-а сайкыт вакыт? Ку асьмеос кредитъёстэк улыны пӧрмытом?

— Бен, али ваньмы валаськом: ӟечгес улэммы потыса, кредитъёс пӧлы выйим. Уксёез пунэманы капчи, берыктыны секыт. Экономика ӟеч азинскысал ке, со сокем ӧй шуккысал, но озьы луиз… Табере отысь потон понна асьмелы амалтэк шымырсконо луэ. Мон дурбасьтӥсько выль Правительствомылы: расход люкетъёсты кулэстытэк, пунэмысь ноку ум потэ. Но со ӧжыт, кулэ на доход люкетэз но ватсаны, шаерамы палэнысь коньдон кыскыны. Оскон вань — ӝыны ар ӵоже но тани маке-маке пӧрмиз ни — долгъёсты пытсанъя ужаммес адӟыса, Россилэн Правительствоез юрттӥське коммерческой кредитъёсты пытсанэн. Но бюджетэз шыръян уз шӧдӥськы уждун тырон, дышетон но тазалыкез утён удысъёс вылын. Со шонер, быгатоно тужгес кулэзэ но кулэтэмзэ висъяны. Бюджет — коть элькунлэн со, коть нимаз семьялэн — огвыллем, быдӟалаез гинэ пӧртэм. Семьяын мар нырысь интыын луыны кулэ: сиён-юон, квартира понна тыриськон, пиналъёсты дышетон, эмъяськон, нош, шуом, зарезь дурын шутэтскон, дуно арбери басьтон возьманы но быгатоз. Ӧз пӧрмы кредиттэк улыны? Басьты, но луонлыктэ чакласа, тыриськон вормонтэм медаз луы. Чылкак кредитъёстэк улыны элькунлэн но уз пӧрмы, малпасько, но кулэ ӧвӧл кураськыны коммерческой банкъёслэсь, отын укыр бадӟымесь процентъёс. Со дыре ик одно люкано профицит (запас), туннэ нуналэн гинэ улыны уг яра.

Но шыръян гинэ ӧжыт. Сюлмаськоно ватсаса уксё поттыны. Али трос лэсь-тӥське палэнысь инвестициос кыскон понна — выль Тӧромы тырше элькунмес палэнын возьматыны, татчы куноос ӧтчаны, но со туж ӧжыт ай. Бадӟым инвесторъёс туж чакласькисесь, соослы кулэ бадӟым площадкаос. Соин ик выль кужымен басьтӥськоно промышленностьмес золгес ужатон борды.

— Кивалтэт туж дурбасьтэ кадь ужбергатӥсьёслы, пайдаез шӧдӥське-а?

— Бен, мон лыдъясько, Удмуртиын ужбергатӥсьёслы ӟеч луонлыкъёс кылдытэмын. Йыло компаниос, ИП усьтыку, сётӥське налог тыронъя каникул. Покчи бизнес ужан интыос кылдытэ, калыклэсь кулэяськонъёссэ быдэстэ… Но огъя экономикаын солэн интыез укыр пичи ай. Бизнесэн вырыны, зэмзэ ке, туж секыт.

Кроссын вормись. 15 арес.

— Нош кызьы тӥ асьтэлэсь бизнестэс мытӥды? Атайды узыр?

— Ӧвӧл! Мон вордӥськи огшоры железнодорожникъёслэн семьяязы, Чувашиысь пичи гинэ Алатырь ӟуч городын. Собере семьямы кошке Иркутске, отысен, мыным 3 арес дыръя, семьямы выже Ижевске, ужало озьы ик чугун сюрес вылын. Мон дышетски 10 номеро огшоры школаын. Директорез Равиль Губаев вань пиналъёсты спортэ кыскылӥз, котькудӥныз атай музэн вераськылӥз. Со туж юрттылӥз сямез кыдатыны. Мон выри капчи атлетикаен. Шоро-куспо но кузь дистанциосы бызьылонын кӧня ке пол Удмуртилэн чемпионэз луылӥ. Али кивалтӥсько шаерысьтымы Капчи атлетикая федерациен. Но спорт кылиз хобби выллем, улонам валтӥсь инты басьтӥз мукет удыс.

Школа бере мынӥ вал Казаньысь авиационной институтэ, 1-тӥ курс бере армие басьтӥзы. Берытскисько но — ваньмыз мукет ни: группаысь пиос кин армиын на, кин дышетсконзэ куштэмын. Город но воштӥськем кадь, мон малы ке ӧй дышы бигер шӧмлы. Берытски доре. Атай шуиз: соку ужаны мын! Юрттӥз локомотивъёсты тупатъянъя цехе слесаре интыяськыны. Озьы рабочий луыса мытӥ мон аслэсьтым ужан стажме. Одӥг толзэ  тепловозъёсты тупатъяй, но маке туж ик ӧз яра, соин выльысь дышескыны пыри Ижысь механикая институтэ. Таяз ваньмыз монъя вал. Туж кельшиз дышетскон но, эшъёс но. Но вузэз быдтон азьын шуг вакытъёс кутскизы, ми, выпускникъёс, ӧм валаллялэ, кытчы ми мыном, мар ужалом. Со вакытэ пичи ужбергатӥсьёс кылдылыны кутскизы, ми но эшеным кенешыса малпамы маин но соин вуз карыны. Уксёмы ӧвӧл, конешно, кинлэсь быгатӥм — пичиен-пичиен пунэмаським. Пичияк барыш поттӥськом но берыктӥськом. Пумен пайдаез но потыны кутскиз, но куспамы кенешим: сое, мукетъёс сямен, кожаной курткалы ум быдтэ, выль вуз басьтыны кутом. Угось тросэз, уксё поттыны быгатэмзылы шумпотыса, сое соку ик тур-пар карылӥзы, ми малпаським азинскон сярысь. Озьы пумен басьтӥським бадӟымгес вузъёс борды — холодильникъёс вузаны кутским. Шедьтӥм подвал, офис. Али верад ке, мар офис вал со, серем карозы: пичи гинэ вуж кабинет, сурыкмем ӝӧк, пукон, вашкала телефон аппарат. Нокыӵе компьютеръёс, сотовой телефонъёс ӧй вал ай. Но пумен ужмы ӧръяськиз. Арысь аре паськытаз, «Ваш дом» огазеяськонозь будӥз. Зэмзэ ке, мынам зэмос бизнесменлэн кадь сямы ӧвӧл, ачим но пайми, ваньмыз пӧрмиз но.

Ужбергатонзэ мытыкуз. 1995-тӥ ар.

— Кызьы шуо, кулэ дыръяз кулэ интые сюриды? Удалтӥз?

— Шонер. Но удалтон вылын гинэ кема уд ворттылы, ужатэк номыр уз пӧрмы. Бадӟым талантэд ӧвӧл ке, иське, тыныд мукетъёслэсь 2 поллы золгес тыршоно, тыршоно янгышатэк, осконзэс пӧятэк. Со сяна, кулэ оскымон эшъёс, юрттӥсьёс. Тау кышноелы, со мыным оскиз шуыса, огвакыт ми быдэсак со чотын гинэ улӥм, мон вань барышме уже понылӥ. Одӥг пол но ӧз пыкылы. Люкиськыкумы но. Со монэ керетонъёстэк лэзиз. Со понна ми соин эшъёс гинэ ӧвӧл, ӵыжы-выжыос кадь кылим, 2-тӥзэ быземез бере пинал вайиз но монэ… киросатай кариз. Вот озьы но луылэ.

— Тодӥськом, тӥ трос нылпиё атай шуыса. Соослы, тӥледлы сямен, пычкиськонэз ӧвӧл ни, узыр атай вӧзын ёрмыса уг будо, дыр, ваньмыз вань… Кызьы пиналъёстэс будэтӥськоды?

— Ӵапак соин ик мон соос азе чурыт куронъёс пуктӥсько. Уг яра дасез вылын гинэ улыны, кинлы ке оскиськыны, котькуд адями шудзэ но, ваньбурзэ но ачиз дурыны кулэ. Угось тынад ваньмыз пӧрмиз ке, со уг вера на, пиналыд но сыӵе ик азинлыко луоз шуыса. Мон тодӥсько сыӵе семьяосты, кытын узыр атайзы улонысь кошкем бере пиналъёссы ыштӥськылӥзы, шугадӟонэ вуизы. Пинал, анай-атаезлэсь ужамзэ адӟыса, будыны кулэ, мед валалоз со, кытысь уксё потэ. Та ласянь гуртоослы лякытгес — отын ваньмыз син азьын, нош городын будӥсь куд-ог пиналъёслэн ноку но адӟылэмзы ӧвӧл, кытын-кызьы ужало соослэн анай-атайёссы. Соин ик кулэ, дыр, кыӵе ке огъя уж, сюлмысь вераськонъёс. Пиналлы, уксё мычытозь, визь-нод сёт, соку со ачиз дышоз улыны-вылыны.

Мынам 2 кышнолэсь 5 пиналъёсы. Кыкез, ӟеч образование басьтыса, асьсэос ужало ни. Мукетъёсыз дышетско на, покчиосызлы кыктоосмылы 14 арес ай.

Сьӧлта тэльын. 2017-тӥ ар.

— Зэм-а, тӥ соосты гуртын но ужатӥськоды шуыса?

— Мон отысь номыр уродзэ уг адӟиськы. Пичи дыръям мон быдэс гужемзэ гуртын песянае дорын улылӥ, тодэ ваёнъёсам али ке но кылемын сяськаясь улмопу сад, ульча кузя чингылиен жингыртыса пастухе мынӥсь пудо… Кышное Сьӧлта ёросысь, отын юртъер возиськом, пудо но вордӥськом. Нялтас вераса, сьӧлтаос монэ асьсэлэн каро, алигес тани землячествоязы но кутӥзы.

Варманай кулӥз ни, соин али отын я кузпалы, я ӵыжы-выжыосыз уло. Пиналъёс ялан отчы ветло, каникулазы но гуртын уло, вань ужез, гуртысь пиналъёс сямен ик, лэсьто. Ваньмы ӵош бакча утялтӥськом, мерттӥськиськом, пудо калтӥськом. Бен, сӥль но, бакча сиён но басьтыны мон быгатӥсько, но мон уг валаськы, кызьы юртъер вань вылысь аналскыса улод.

Мыным кельше гуртын улыны-шутэтскыны.

Семьяяз со — Тол бабай.

— Тӥ ӟеч-а Тол бабай?

— Ӟеч, малпасько. Праздник ук, ваньмыз кыӵе ке кузьым возьмало. Ми пичи дыръя конфет-мандарин сёто вал но — туж усто ни, нош табере сямъёс но, куронъёс но воштӥсько. Луонлык вань ке, конешно, шумпоттэм потэ. Но лыдъясько: кузьым пайдаё мед луоз. Нялтас вераса, мон студент дырысеным ик Тол бабай луи! Институтысь Выль аре малы ке монэ дӥсяськыто вал. Собере аслам пиналъёсы вордскизы, амалтэк Тол бабай кулэ луиз. Озьы — та дырозь.

— Бырйисьёс но депутатэз Тол бабай чотын ик адӟо…

— Малы ке но озьы луэ, бен. Тросэз депутатлэсь зэмос ужзэ уг валало. Пичи кузьым сётӥськод ке — тон умой депутат, нош мукетыз кӧня визьзэ-кужымзэ понэ ӟеч закон кутон, собере солэсь быдэсъяськемзэ чаклан понна — бырйись уг адӟы…

— Мар сӥзьысалды шаерамы улӥсьёслы, Выль арен ӟечкыласа?

— Одӥг семьяе но кайгу медаз пыры! Со тужгес кышкытэз, нош вань мукетыз: яратон кусыпъёс, ваньбур, тунсыко уж — потэ асьме бордысь. Тросгес пиналъёс мед вордскозы, улонын соос мында шумпотон нокин уг кузьма, соос понна ик тросгес лэсьтэм, соос понна адӟем карымон луэм потэ.

Зинаида Рябинина

 

 

Удмурт Дунне
By Удмурт Дунне Декабрь 30, 2017 13:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<