Вуоно арлы бюджет юнматэмын

Удмурт Дунне
By Удмурт Дунне Декабрь 18, 2017 10:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

13-тӥ декабре ужзэ азинтӥз Кун Кенешлэн 2-тӥ сессиез. Эскерем ужпумъёс пӧлын валтӥсез луиз элькунмылэсь 2018-тӥ но матэктӥсь 2019-тӥ-2020-тӥ аръёслы бюджетсэ юнматон.

Депутатъёс дурбасьтӥзы социальной удыслы.

Бюджетлэн проектэз сӥс пыр кадь поттэмын ни калык лыдӟонъёсын, депутатъёслэн фракциосазы, ялан ужась комиссиосын. Огпол гинэ сое выльысь но выльысь ӧз эскере Удмуртилэн Тӧроез, Правительство. Азьло ик шуэмын вал: матысь дыре ум пунэмаське ни, уломы кисымыя — огкылын вераса, кӧня ужалом, сомында ик сиём.  Озьы, бюджетлэсь проектсэ нырысетӥ лыдӟемен юнматыку, лыдпусъёс туж ик ӧз шумпоттэ вал — доход люкетэз ог 59 миллиард 600 миллион манет, расход люкетэз 58 миллиард 400 миллион манет пала. Но Кун Кенешлэн Тӧроез Алексей Прасолов соку туж оскемзэ вераз, та лыдпусъёсты йылэтыны луоз шуыса.

Кыкетӥ лыдӟемен юнматыку, зэмзэ но, лыдпусъёс шӧдскымон будӥзы. Коньдон ужпумъёсъя министр Станислав Евдокимов ва-лэктӥз:

— Россилэн бюджетэз 3-тӥ лыдӟемен юнматэмын 24-тӥ ноябре гинэ, соин ик элькун бюджетмес 1-тӥ лыдӟемен эскерыку, умой-умой тодмо ӧй вал на, кӧня юрттэт возьманы быгатӥськом  федерацилэсь. Чаклам вал ог 10 миллиард манет. Табере тодмо ни: вуоз 14 миллиард манет пала.

Тае лыдэ басьтыса, 2018-тӥ арлы бюджетлэн доход люкетаз 4 миллиард 825 миллион манет ватсаны луонлык кылдӥз. Коньдон ужпумъёсъя министр верамъя, со  вань удысъёслы сямен пичиен-пичиен люкылэмын луоз. Кылсярысь, 254 миллион манет — тазалыкез утёнлы, 246 миллион манет — дышетонлы, 291 миллион манет — калыкез улон-вылонын утёнлы, 480 миллион манет — Сюрес фондлы, 33,6 миллион манет — ивор вӧлмытон ёзъёслы но мукет. Тросэзлэн удысъёслэн кулэяськонъёссы 100 процентлы пытсамын луозы.

— Бюджетлэн проектаз чакламын бюджетникъёслы уждун тыронлы тырмыт уксё, уждунзы йылоз Россилэн Президентэзлэн май указъёсаз шедьымтэ бюджетникъёслэн но — 4 процентлы, — ватсаз Станислав Евдокимов. — Озьы ик лыдэ басьтэмын тужгес пичиез уждунлэн йылонэз. Со сяна, 2020-тӥ арозь вань элькун тыриськонъёсты пытсаны чакламын, соос люкаськемын, кылсярысь, муниципалитетъёс азьын, лэсьтӥськон но мукет удысъёс азьын.

— Милям фракцимы бюджетэз 2-тӥзэ юнматон азьын 25 ӵектонъёс пыртӥз на, ваньзы соос лыдэ басьтэмын, — вераз «Огъя Россия» партилэн фракциеныз кивалтӥсь Анатолий Наумов. — Соос ваньзы сямен герӟаськемын калыклэсь улон-вылонзэ ӟечомытонэн. Вань пенсиос, стипендиос, компенсациос тыриськозы, 3-тӥ пиналлы 3 аресозь ватсаса пособие луоз, культурая юртъёсты тупатъян азинтӥськоз…

Бюджетлэсь проектсэ умоен лыдъяз «Справедливая Россия» фракциен кивалтӥсь Фарид Юнусов но:

— Проектэ ватсанъёс пыртыны курыса кӧня ке ӵектонъёсмы вал. Со пӧ-лысь оглюкетэз лыдэ басьтэмын ни. Оскисько, кылемъёсыз но быдэсмозы, угось элькун кивалтэт, луонлыкъёс кылдӥзы ке, уксё висъяськоз шуыса оскытэ. Кылсярысь, лек пыктосъёсын висисьёслы эмъюмъёс басьтонлы араз 170 миллион манет кулэ — ог 35 сюрс адями онкодиспансерын учётын сылэ.

КПРФ-лэн ёзчиез Павел Чушъялов сюлмаське гуртоос сярысь:

— Гуртын корка пуктыны мылкыд карисьёслы музъем висъянэн шугъяськонъёс кылдо планировкалы проектъёс ӧвӧлысь,  — шуиз со. — Вуоно арын ке но та уж интыысьтыз вырӟоз-а?

— Кадастръя ужъёсты ортчытонлы коньдон учкемын, но кыӵе муниципалитетъёсы кӧня коньдон висъяськоз — тодмо луоз берлогес, — валэктӥз коньдон ужпумъёсъя министр.

2-тӥ лыдӟемен юнматэм бере бюджетлэн доход люкетэз 64,4 миллиард манет пала, расход люкетэз ог 63,2 миллиард манет луиз. Профицитэз ӧз воштӥськы — 1,2 миллиард манет пала кылиз. Та понна куаразэ сётӥз 45 депутат, пумит кариськиз 6-ез — КПРФ но ЛДПР фракциосы пырись депутатъёс. Валэктӥзы: куд-ог дэмланъёссы лыдэ ӧз басьтӥське, кылсярысь, лэсьтӥськон удыслы туж ӧжыт уксё чакламын.

Сессилы йылпумъянъёс лэсьтыса, Правительстволэн Тӧроез Ярослав Семёнов но, Кун Кенешлэн Тӧроез Алексей Прасолов но эшшо одӥг пол пусйизы: бюджет — «улэп», отчы ар куспын трос пол воштонъёс пыртэмын луозы на, оскон вань, бюджетэ эшшо но ватсаса коньдон вуоз шуыса. Со нырысь ик висъяськоз лэсьтӥськон удыслы, муниципал кылдытэтъёслы юрттэт сётонлы.

— Зэм но, бюджет капчи ӧвӧл, но быдэстыны вормымон, — вераз Алексей Прасолов. — Угось отысь котькуд лыдпус лусйыса кадь поттэмын, таин валче 2019-тӥ-2020-тӥ аръёсы доходъёсмы шӧдскымон йылыны кулэ ни.

Элина Кумачёва

Туспуктэм: udmgossovet.ru

 

 

Удмурт Дунне
By Удмурт Дунне Декабрь 18, 2017 10:15 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<