«Удмурт дунне» усьтӥз «Берекет» нимо пукон корка

Удмурт Дунне
By Удмурт Дунне Декабрь 15, 2017 15:54

12-тӥ декабре усьтӥськиз «Берекет» нимо пукон корка. Мылкыдъёсмылы дурбасьтӥз Флор Васильев нимо библиотекаен кивалтӥсь Елена Беспалова. Озьы люкаськон инты кылдӥз.

Флор Васильев нимо библиотекае трос калык люкаськиз.

Огез гинэ нырысь-валысь сюлмаськытӥз: макем кулэ таӵе пумиськонъёс Ижысь удмуртъёслы, мар возьмало соос ӵош пуконъёслэсь? Ижысь удмурт нылкышно, «Задор мылкыд» ансамблен кивалтӥсь Юлия Елдынева ӝот-ӝот шуиз:

— Ми кадьёсты коркась поттӥсь, визь-кенеш сётӥсь, мылкыдъёсты огазеясь мурт туж кулэ. Ярам, ми ансамблен кырӟаськомы но, вераськомы но. Озьы ке но ӵош пукон милемлы но уг тырмы. Эшшо ке мугорез зуркатӥсь сюрысал на ке, туж шумпотысалмы! Милемыз уго тазалык сярысь юанъёс шугъяськыто, врачъёслэсь дэмланъёссэс кылэм потэ.

 

 

Юлия Елдынева кадь мукет адямиос но вераськизы. Соин ик клубмес усьтон нуналэ калыкен пумиськыны ӧтимы Ижысь аллерголог-иммунологез, медицина наукаосъя кандидатэз Надежда Гузнищеваез. Библиотека тыр люкаськем калык быдэс час ӵоже Надежда Геннадьевналэсь визь-кенешсэ куриз. Удмурт нылкышно котькуд юанлы лад-лад валэктон сётъяз.

Отӥяз чай юон куспын адямиослэсь визьзэс асьмеос сынано кариськимы, макем соос умой тодо «Удмурт дунне» газетлэсь историзэ, удмурт калыклэсь сям-йылолъёссэ. Валтӥсь редактор Зинаида Рябинина со пумысен викторина радъяз. Шонер валэктон сётэм муртъёс пусъемын вал «Удмурт дунне» газетлэн 2018-тӥ арлы календареныз. Нимысьтыз дунъяно кариськимы устозэ пӧраськисез. Котькудӥз уго пумиськонэ лыктэм мурт сьӧраз удмурт сиён пӧраса ваем. Тужгес ӝог бушаз перепечен тэркы, таиз тужгес ческыт вал, шуизы. Озьы кузёезлы — Раиса Корепановалы — 2 килограмм пызь сётӥмы, азьланяз но пыжиськыны мылкыдыз мед луоз шуыса.

Ангелина Снигирёва журналистмы кибашлы бере, люкаськем калыклы огшоры ӵыжинлэсь шудон лэсьтонъя мастер-класс ортчытӥз. Выжыкыл дуннее, пичи дыре вуэм кадь, киямы ваньмы кутӥмы клей, качы. Ӵыжинэз пичи банкалэн ӵоксэт пыдэсаз лякыса, вылаз пызь пызьнаса, сое ваньзэ банка пушкы тэрытӥмы. Палэнысен учкыса, банка пушкын кыз будэм кадь адӟиське, ява. Ӵыжин куасьмемъяз усьтӥськиз ке, эшшо но чебергес луоз.

«Удмурт дунне» газетлэн валтӥсь редакторез Зинаида Рябинина: Азьланяз пӧртэм специалистъёсын пумиськон радъялляломы.

«Чильтэр» но Задор мылкыд» ансамбльёс кырӟаса вераса сюлэмез ик бугыртӥзы. Нокинлэн люкиськемез уг пот ни вал.

— Азьланяз пӧртэм специалистъёсын пумиськон радъялляломы. Кибашлыосты ӧтчалляломы, асьтэос но ужъёстэс возьматыны быгатоды. Нуналмысь нуналэ ог-огмылы матэгес луомы. Котькудаз сямен пумиськонэ ӧтьыны тыршомы шаерысьтымы дано адямиосты но, соосын матэгес тодматскомы, — шуиз валтӥсь редактор Зинаида Рябинина.

Чакламын пукон коркаез толэзяз огпол ортчытъяны. Матысез 18-тӥ январе Ижысь Флор Васильев нимо библиотекаын ик луоз. Соку тунаськон вакыт тупа бере, асьмеос но со ӧре зымомы.

Елена Сараматова

Туспуктӥз Валентина Емельянова

Удмурт Дунне
By Удмурт Дунне Декабрь 15, 2017 15:54
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<