Нылпиос кивалтӥсьёслы кузьым дасязы

Ангелина Снигирева
By Ангелина Снигирева 14 декабря, 2017 16:48

Шаерысьтымы нылпи юртъёсысь, реабилитацияя центръёсысь пиналъёс 600 кузьым но 300 открытка дасязы.

Соос Выль ар азьын вуозы министерствоосысь, ведомствоосысь, бадӟым предприятиосысь, калык огазеяськонъёсысь кивалтӥсьёс доры. Таӵе кузьымъёс дасяны кичӧлтонэн вазиськиз Удмуртилэн Тӧроез Александр Бречалов. Озьы «Ас киыныд кузьым» проект быдэсъяське.

Ӟеч уж борды итӥськизы 26 учреждениос — 15 нылпи юртъёс, 11 реабилитационной центръёс. Нылпиос киужъёссэс пӧртэм амалъёсъя дасязы. Ваньмыз кибашлы нылпиос нимысьтыз пусъемын луозы.

Та ужрад огквакытэ кӧня ке кечез кутыны юрттэ. Огласянь, киужен вырон сямен пиналъёслэн Выль ар мылкыдзы бугырске, шараясько та удысын быгатонлыкъёссы. Мукет ласянь, проект чакламын шуг югдуре шедем нылпиослы юрттӥськыны. Угось котькуд киуж бордын пусъемын луоз, кытын, кин та ужез быдэстӥз, кузьымез басьтӥсь мед быгатоз соин герӟаськыны но тау карыны, озьы ик азьланяз быгатэмезъя юрттӥськыны но.

— Оскисько, нылпиосын лэсьтэм Выль ар кузьымъёс соосты басьтэм котькуд муртлэн коркаяз шудбур ваёзы. Нош нылпи юртъёсысь, реабилитацияя центръёсысь пиналъёс выль эшъёс шедьтозы, — пусйиз А. Бречалов.

«Ас киыныд кузьым» проект Россиын быдэсъяськын кутскиз 2014-тӥ арысен. 3 ар ӵоже сое радъяз Россиысь Общественной палата, кылем арын ортчытӥз «Гражданская инициатива» огазеяськон.

Ангелина Снигирёва

Туспуктэмъёс басьтэмын http://www.udmurt.ru сайтысь

Ангелина Снигирева
By Ангелина Снигирева 14 декабря, 2017 16:48