Ляминъёсты утчаськом!

Удмурт Дунне
By Удмурт Дунне 18 декабря, 2017 16:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Ува ёросысь Поршур гуртын туннэ ке но йыг-йыг сылэ 19-тӥ дауре пуктэм 2 этажъем корка. Туннэ ке но отын улӥсез вань. Зэм, коркаез история ласянь гажась но уг сюры ни, кузёзэ но тодӥсь ӧвӧл.

Ува ёросысь Поршур гуртысь та юртэз И. Лямин вузчилэн, шуо.

Вуж мултанъёслы дурбасьтӥсь

Вашкала горд кирпичъёссэ юромо ватыса кадь тӧдь-тӧдь буям улыно-вылыно корка тӧдьы лымы пӧлын син шоры сокем уг йӧты. Мон но вӧзтӥз, оло, учкытэк ик кошкысал ни. Но сюрес татчы вуттӥз Кизнер ёросысь Короленко нимо музее вуылэме бере. Музеен кивалтӥсь Ольга Соколова пумиськылыкумы вераз: вуж мултанъёсты тюрьмаысь поттыны, адвокатъёсты шаерамы ӧтьыны, сюдыны-утялтыны юрттӥз Ува ёросысь Выль Мултан палась удмурт купец Лямин. Только нимзэ-тулзэ но, кытысь луэмзэ но рос-прос ум тодӥське, со сярысь гожъямез но ӧм лыдӟылэ, арлыдоослэсь верамзэс гинэ кылылӥмы, пе.

125 ар талэсь азьло Вятской губерниысь Малмыж уездысь Вуж Мултан гуртын луэм учыр маза ӧз сёты ни. Адямиез курбон сётӥллям шуыса янгыше уськытэм удмуртъёслы кыӵе удмурт купец дурбасьтэм меда? Утчаськыса, юалляськыса шарае потӥз Иван Иванович Лямин — Михаил Андреевич Лямин писательлэн («Четыре года в шинелях») ӵужмуртэз. Выжыезъя со Вятской губерниысь Комак черкогуртысь (али та палъёс Ува ёросэ пыро, но гурт кемалась быремын ни).

1897-тӥ арын ортчытэм калыкез лыдъян-чотан дыръя Удмуртиысь пусъем купецъёс пӧлын 1 сюрс 47-ез — ӟуч, 32-ез — бигер, 31-ез — еврей, 5-ез — немец но 2-ез — удмурт. Но Маргарита Гришкина но мукет тодосчиос эскеремъя, удмуртъёс таос пӧлын уногес вал. Ӟуч кариськыса вузчи луыны уго капчигес вал. Выль Мултанлэсь историзэ эскерон бордын ужась историк М. Садаков пусъемъя, удмурт вузчилэн Иван Ляминлэн семьяяз «Вятские губернские новости» газет басьязы, удмурт семьяосын та шер пумиськылӥз.

Ас вакытаз Иван Лямин туж тодмо вузчи вылэм. Комак черкогуртэ аслаз уксёеныз школа пуктэм. Со сяна, вузаськон корка ӝутэм Выль Мултан гуртэ но. Бератаз ачиз но тапалагес кариськем. Нылыз Евдокия Лямина, Казаньысь учительской семинариез быдтыса, 1903-тӥ арын Выль Мултанэ берытске уго, татысь церковно-приходской школаын дышетыны кутске. Со борды Чибирь-Зюмья, Кейлуд-Зюнья, Эшмедьгурт, Выль Мӧнья выселок гуртъёсты юнмато. Евдокия Лямина семьяосын, нылпиосын пумиськылэ, улон-вылонэнызы тодматске. Валамон ни: вань сюлэмшугъяськонъёссэ со атаезлы вералля.

Туннэ тодмо ӧвӧл, макем тупало вал нылызлэн но атаезлэн улон шоры учконъёссы. Но 1906-тӥ арын Выль Мӧнья пала, ассэ Иван Иванов карыса, эсер Давид Рапопорт вуэ но дышетӥсьёсты но крестьян калыкез властьлы, выт тыронлы пумит ӝутъяны кутске. Евдокия Ивановна бугыръяськисьёс пӧлысь огез яркытэз вал. Сое 1906-тӥ арын октябре та понна пытсэт сьӧры келязы. Атаезлэн калык пӧлын гажамон луэмез гинэ юрттӥз Евдокия Ляминалы декабрь толэзе тюрьмаысь мозмытскыны. Зэм, нырысь-валысь солы школаын ужаны алэмын вал. Но атаез Малмыж уездысь земской управаын ужась Бобровлы бызьытӥз. Гуртоос верамъя, Бобров Выль Тукля (али Удмурт-Тукля) гуртын школа ӝутӥз. Татчы Иван Иванович но пыриськытэк ӧз кыльы. Со школаын ик Лямина-Боброва дышетыны кутскиз. Калыкен ужаны быгатэмез, огкыл шедьтэмез кивалтӥсьёслэн син шоразы котьку йӧтылӥз. Соин ик сое Выль Мултанысь вотской семинарие (педтехникуме) ужаны ӧтчаллязы.

— Иван Ивановичлэн бератаз улонэз ӧз пӧрмы ни, — вера Ляминъёслэн выжыысьтызы потэм нылкышно, Ува ёросысь Мушковайысь библиотекарь Маргарита Шубина. — Революция бере Иван Ляминэз кулак радэ пыртӥзы, ваньбурзэ тус-тас каризы. Комакысь мукет узыр ӵыжы-выжыосызлэсь но 2-3 коркаоссэс Увае нуизы. Мултан ёроскомлэн 1930-тӥ арын 3-тӥ мае кутэм решениезъя Иван Ивановичез колхозникъёс радэ кутыны ӧз лэзе. Вуоно писатель Михаил Лямин но вордскем палъёсаз берытскыны ӧз дӥсьты. 1930-тӥ арын Ленинградысь А. Герцен нимо пединститутэз йылпумъяса, Михаил Лямин Ижысь совпартшколае дышетӥсе кутске. Со аслаз биографияз нокытын но уг пусйы кытысь потэмзэ, выжыоссэ.

Эчешонъёс

Туннэ рос-прос вераны нокин уг тоды ни Иван Ляминлэсь кулон арзэ но нуналзэ. Ватэмын со Мултанысь вуж шайын. Туннэ шай куштӥськем кадь луэмын, соин ик Иван Ивановичлэсь гузэ уд но шедьты ни. Архивъёсын утчаськыны кутскимы вал Лямин выжыос сярысь, но документъёсысь уноез страницаос кесямын, шуэ Маргарита Шубина. Ляминлэсь нимзэ быдэс гуртэн сямен вунэтыны косэмын вал, шӧдске. Комак черкогуртысь Ляминэн пуктэм школалэсь юртсэ 1960-тӥ аръёсы Поршуре выжтӥзы. Татын соку асьсэлэн школазы ӧй вал.

— Поршурын со школа ог 10 ар сылӥз на, — вера Поршур-Тукля гурт поселениен кивалтӥсь Надежда Конышева. — Кирпичлэсь выль школа пуктэмзы бӧрсьы вуж школаын интернат возьылӥзы. Отӥяз воксё кесязы, зӧк коръёсты пулы вандӥзы.

Зэм, Поршур школа борды миым мемориал пул шуккизы, тапалан Михаил Лямин писатель дышетскиз шуыса. Писатель вордскем дырысен 110 ар тырмонлы сӥзем ужрад вал со. Мукет Ляминъёсты ноку нокин поттась ӧй вал ни. Нош калык верамъя, Антон Лямин купец — Иван Ляминлэн выжыысьтыз — гуртсылы ас вакытаз туж юрттӥськем. Гуртоос собрание дыръя сое кулакъёс радэ пыртыны ик лэзиллямтэ, ваньбурзэ тус-тас каронлэсь утиллям, ми со вылэ ноку ӧм ужаллялэ, со милемыз сюдӥз-утялтӥз, шуиллям. «Книга памятиын» 9 Лялинъёс пусъемын. Маргарита Шубина верамъя, ваньмыз со Комакысь Ляминъёс — атай нимъёссы ваньзылэн тупало. Война вакытэ документъёссы чернилаен гинэ гожъямын вал, куддыр валантэм гожтэмын. Соку ик Ляминъёсты Лялин каризы, вылды.

Оло нош Поршурысь купец корка но Иван Ляминлэн ӝутэм юртэз? Совето вакытэ отын контора, библиотека, телефонэн вераськонъя станция ужалляз. Кыкетӥ этажзэ ялан ёрмись колхозникъёслы сётъяллязы. Ог 10 ар талэсь азьло гинэ ай солэн туала кузёосыз кылдӥзы. Коркалэн нырысетӥ этажаз улӥсьёсыз ялан вошъясько — сое кузёосыз арендае сётъяло. Нош кыкетӥяз Иванов кузпалъёс уло. Таос ас вакытаз коркаез быдэсак басьтыны малпало вал, ӧз быгатэ.

— Милемлы пересьёс вералляло вал, та корка быдэсак курегпуз ӵужлэсь гинэ пуктэмын шуыса. Со курегпузэс быдэс гуртэн оброк кадь бичаллязы, пе. Пичи дыръямы борддоръёссэ копыштыса но утчаллямы — уг пыргы. Туннэ ке но юн, — вера Надежда Конышева.

Сыӵе юртэз утён, оло, отчы музей усьтон сярысь но сюлмаськыны кулэ вал, дыр. Сыӵе узыр историзэс нылпиоссылы кельтон, турмаршрут усьтон вылысь. Жаль, Поршур школалэн директорез Елена Ветошкина верамъя, нылпиослэн купец коркалы тунсыксы но ӧвӧл. Адямиос дышемын ни со вань шуыса, номыр нокыӵе уг йӧты. Собере, гуртлэн мукет палаз, калык ветлонтэмгес интыын, пе, сылэ. Умой луысал, бордаз мемориал пул шуккысалзы ке. Но туннэ гуртоос но, шаерчиос но кыклы люкисько коркалэн зэмос кузёезъя. Кыӵе ке Годяевъёс сое дасо ар талэсь азьло асьсэ вылэ гожтӥзы, милям та коркамы, шуо. Нош гуртоос пумитъясько: кызьы меда соос кузё луизы, татын воксё мукет адямиос улэмын ке? Маргарита Шубина но, Надежда Конышева но шуо: татысь одӥг комнатаын совето вакытэ Годяевъёс улӥзы ик, соослы улон интызы ӧвӧлысь сое сётъязы. Со Годяевъёс али Ижын уло, шуо гуртоос. Озьы учконо ке, ас вакытаз со коркан Сапаровъёс но улӥзы. Воксё арлыдоосыз гуртоос Малюка Иванлэн со коркаез шуо. Фамилизэ уг тодо ни. Малюка — пичи выжыысь потэмез возьматэ, пе. Нош ёросысь шаерчиос со коркаез Иван Ляминлэн шуо. Аслыз улон вылысь татчы корка ӝутӥз, пе, вал. Рос-прос улыса ӧз вутты. Евдокия нылыз революция бере со коркаез ас вылаз гожтыны турттэ вылэм — быгатымтэ, берло аръёссэ улэм Уваысь Чкалов ульчаын. Оло нош лыдӟисьёсмы пӧлын вань та корка сярысь тодӥсьёс?

Елена Сараматова

Удмурт Дунне
By Удмурт Дунне 18 декабря, 2017 16:44 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<