Перепись: Гурт удысысь кошкиз 28 сюрс 800 мурт

Удмурт Дунне
By Удмурт Дунне Декабрь 25, 2017 14:10

Кылем гужем быдэс Россиын гурт удысын перепись ортчиз. Удмуртстат асьме элькунмыя куд-ог йылпумъянъёсты вераз. Кылсярысь, колхозъёс, гурт удысын ужасьёс, пудо-живот вордӥсьёс ичигес луизы.

Гурт удысъя перепись возьматӥз, кӧня мурт музъем вылын тырше, кӧня бусыосы ю-нянь, турын киземын, кӧня пудо вордо хозяйствоосын, кыӵе техника но амалъёс кутӥсько гурт удысын. Таӵе ик лыдъян-чотан ортчытэмын вал 2006-тӥ арын. Кыӵе воштӥськонъёс луизы 10 ар куспын, тодматӥз Удмуртстатлэн кивалтӥсез Евгений Данилов.

2006-тӥ арын гурт удысын предприятиос 1 сюрс 1 лыдъясько ке вал, али 406 кылиз. Зэм, лыдзы ичигес луиз ке но, со вакытэ ик предприятиос паськытазы. Азьвыл  шоро-куспо предприятилэн 1,8 сюрс гектар музъемез вал, али — 2,7 сюрс гектар. Хозяйствоос тросгес кизьыны кутскизы пудо сюдыны мынӥсь турынъёсты, ӧжытгес луизы ю-нянен но кӧжыен лудъёс. 37,7 поллы ӧжытгес луизы фермер хозяйствоос: 2006-тӥ арын 2 сюрс 446 вал ке, али 65 гинэ кылиз. Со вакытэ ик гурт удысын тыршись ужбергатӥсьёс 578-лы йылӥзы но луизы 864 мурт. 3 поллы уноязы соослэн бусыоссы. Шоро-куспо лыдпусъёс возьмато: ужбергатӥсьёс ог 150,5 гектар музъемез гыро-кизё.

Ӧжытгес вордыны кутскимы сюро таза пудоез — 24 процентлы, ыжъёсты, кечъёсты — 30 процентлы,  парсьёсты — 12 процентлы.

Кызьы пусйиз Е. Данилов, 10 ар куспын 28 сюрс 800 мурт гурт удысысь кошкиз. Али музъем вылын тырше ог 32 сюрс 600 адями. Ӝожомытӥсь суред борды ватсаське на  пудо лыдлэн синэмез но. Ӧжытгес вордыны кутскимы сюро таза пудоез — 24 процентлы, ыжъёсты, кечъёсты — 30 процентлы,  парсьёсты — 12 процентлы, со вакытэ ик 40 процентлы тросгес луизы курег будэтӥсьёс, 6,2 поллы тросгес адямиос басьтӥськизы курка вордыны.

Перепись дыръя тодмо луизы куд-ог тунсыко учыръёс. Кылсярысь, адямиос будэтыны басьтӥськизы шаермылы тупасьтэм емышъёс — алыча, абрикос, персик, кизил, черешня. Озьы Красногорск ёросын чай паро иммунитетэз ӝутӥсь амарант будосэн, Балезино ёросын но Ижын будэто актинидиез, Вотка ёросын — годжи емышез, Алнаш ёросын — цитрусъёсты, грецкой, фундук, миндаль мульыосты.

Россиын ортчем переписьлэн Удмурт Республикая куд-ог йылпумъянъёсыныз тодматскыны луэ Удмуртстатлэн www.udmstat.gks.ru сайтаз. Росстатлэн www.gks.ru сайтаз улосъёсъя но кунъя нимаз 2 том поттэмын ни, вуоно ар куспын отчы пыртэмын луоз на  ватсаса эшшо 6 том.

Ангелина Снигирёва

Туспуктӥз А. Горбунов

 

3 ыж, 2 парсь, 1 скал…

Удмурт Дунне
By Удмурт Дунне Декабрь 25, 2017 14:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<