Глазовысь Калинин нимо бульвар 11 миллион манет тыр выльдӥськиз

Удмурт Дунне
By Удмурт Дунне 29 декабря, 2017 12:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Глазовысь Калинин нимо бульвар туэ тодмантэм воштӥськиз. Азбаръёсты тупатъянъя проект улсын сое выльдыны оглом 11 миллион манет висъяськиз. 

Бульвар бордаз кыскись интылы пӧрмиз. Городын улӥсьёс солы Арбат ним сётӥзы.

Выльдон ужъёсты, калыкен кенешыса, лэсьтӥзы, чаклазы, мар кулэ адямиослы, татын гань-гань шутэтскон инты мед пӧрмоз шуыса. Угось вуж плиткаос борды канжаськытэк ортчыны уг луы ни вал. Нош табере татын сюрес вольыт, котыр югыт, писпуос будо, гужем сяськаос пушъё, жуг-жаг куян мульдаос сыло. Бульвар бордаз кыскись интылы пӧрмиз. Городын улӥсьёс солы Арбат ним сётӥзы.

Туннэ глазовъёслэн озьы ик выль шокчон сётэмзы потэ Чупчи шур кузя 1898-тӥ арын мерттэм садлы. Аръёс  ортчемъя, город паськытамъя Глазов шоры интыяськем аллея аналмыны кутскиз. Нош татӥ ветлӥсез уен-нуналэн уг бырылы. Садын семьяен юмшаны мед луоз шуыса, сюлмаськыны кутскизы егитъёс. Мыло-кыдо адямиосты котыраз огазеяз Валентин Наговицын. Дэмен «Горсад» проект гожтӥзы. Соин матэгес тодматскыны Глазовен апрель толэзе вуылӥз соку ай Удмуртилэн Тӧроезлэсь ужзэ быдэсъясь Александр Бречалов. Егитъёслэсь мылкыдъёссэс умоен лыдъяз.

Та нуналъёсы Александр Бречалов нош ик вуылӥз Глазове. Кивалтӥсьёс калыкен  кенешизы садэз выльдон сярысь. Туннэ проектлы смета лэсьтӥське. Выльдӥськон вуоно арын кутскоз.

Нялтас вераса, Удмуртия азбаръёсты тупатъян проект борды итӥськиз туэ апреле.  Проектэз быдэстон вылысь 2017-тӥ арын шаермылы федерал бюджетысь висъямын 273 миллион манет. Республикалэн казнаысьтыз софинансирование амалэн висъямын эшшо ог 122 миллион манет. Та уже пыриськиз калык но, интыосысь администрациос но — озьы эшшо 19 миллион манет люкаськиз. Вуоно арын проектэз азинтыны тамында ик коньдон вуыны кулэ. Республикаын ватсаса уксё висъяны луонлык кылдӥз ке, лыдпус йылыны быгатоз на. Котькуд проектэз, котыр ласянь чакласа, лэсьтыны кулэ, соку Удмуртия огез адӟем карымонэз улос луыны быгатоз, шуиз А. Бречалов.

Сергей Захаров

Туспуктэм: udmurt.ru

 

 

Удмурт Дунне
By Удмурт Дунне 29 декабря, 2017 12:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<