Воштӥськонъёс — умойлы. Александр Бречалов арлы йылпумъянъёс лэсьтӥз

Удмурт Дунне
By Удмурт Дунне 29 декабря, 2017 14:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

25-тӥ декабре Кун Кенешлэн азьвыл ялымтэ сессиез ортчиз. Депутатъёс азьын арлы йылпумъянъёс лэсьтӥз но матысь дыре быдэстоно ужпумъёс сярысь вераз Удмуртилэн Тӧроез Александр Бречалов.

udmurt.ru

Удмуртилэн Тќроез А. Бречалов: 2018-тӥ ар элькунамы луоз сюресъёслэн арзы.

Уждунъёс йылозы

Сессиос ортчытон залэ депутатъёсын ӵош люкаськизы министерствоослэн но ведомствоослэн кивалтӥсьёссы, муниципал кылдытэтъёслэн, город Думаослэн йыръёссы. Угось Удмуртилэн Тӧроез вераськиз элькунмы азьын сылӥсь тужгес бадӟым ужпумъёс сярысь. Докладэз 50 минут пала кыстӥськиз. Нырысь ик кутскиз политика бордысен, шуиз:

— 10-тӥ сентябре Кун Кенеше быръёнъёс радъяськизы, соослэсь ортчемзэс чакласа возизы «Россия быръе» движениысь 200 пала наблюдательёс но дуннеысь экспертъёс. Удмуртия пыриз быръёнъёсты тужгес ӟеч, зэмлыко радъяны быгатэм 5 улосъёс пӧлы!  2018-тӥ арын мартэ быръём Россилэсь Президентсэ. Оскисько, куара сётонэз озьы ик адӟем карымон ортчытыны быгатом.

2017-тӥ арын нимысьтыз саклык висъяськиз В. Путинлэсь май указъёссэ быдэсъянлы. Озьы 7 процентлы йылӥз уждунзы социальной ужасьёслэн но дышетӥсьёслэн, 26 процентлы — культура  но 11 процентлы эмъян удысъёсын тыршисьёслэн. Май указъёсы шедьымтэ бюджетникъёслэн уждунзы йылыны кулэ 2018-тӥ арын — 4 процентлы. Шоро-куспо уждун 28 сюрс 280 манет луиз — 2016-тӥ арынлэсь 7 процентлы тросгес. Элькунамы дыраз тырисько ог 40 пумо пӧртэм пособиос но пенсиос — талы ар ӵоже ог 5,3 миллиард манет висъяське.

Демографиез верано ке, 2009-тӥ арысен кутскыса, вордскись нуныослэн лыдзы йылэ вал. Но туэ 11 толэзь куспын соос 24-лы ӧжытгес луизы. Зэм, талы дасесь вал — анай-атай луон вакытсы вуиз секыт 1990-тӥ аръёсы вордскемъёслэн. Югдур огвыллем быдэс Россиын.

udmurt.ru

Кун Кенешлэн Тӧроез Алексей Прасолов та докладлы ӟеч дунъет сётӥз.

Удмуртилэн Тӧроез нимысьтыз вазиськиз муниципал кылдытэтъёслэн йыръёссылы. Куриз: калыклы тыро-пыдо валэктоно, кинлы но кыӵе пособиос ватсаса тыриськозы 2018-тӥ  арын 1-тӥ январьысен.

—  3-тӥ но солэсь тросгес нуны вордэм понна толэзьлы быдэ тыриськоз улыны чаклам минимум мында коньдон — семьяысь котькудћзлэн доходэз республикаысьтымы шоро-куспо доходлэсь уг ортчы ке. (2016-тӥ арын со 23 сюрс 578 манет вал.) Со сяна, 1-тӥ пинал понна толэзьлы быдэ висъяськоз улыны чаклам минимум мында уксё, семьялэн шоро-куспо доходэз  чаклам минимумлэсь 1,5 поллы тросгес уг луы ке.

Тыршисьёсызлы — пельпум

— Азямы пуктэм ужпумъёсты быдэстыны быгатом зол командаен гинэ,  — вераз А. Бречалов. — Воштӥськизы тросэз кивалтӥсьёс. Выльёссэ бырйим удысъёсазы зэмос профессионал луэмзыя. Та сяна, Правительстволэн структураез выльдӥськоз: 36 ёзъёс интые 2018-тӥ арын 1-тӥ январьысен кылёзы на 28-эз гинэ. Воштӥськонъёс луозы 15 министерствоосын но ведомствоосын, оглюкетэз огазеяськозы.

А. Бречалов верамъя, ужаны уг яра, кылсярысь, «Аптеки Удмуртии» но «Фармация» предприятиос музэн. Соос ӧжыт гинэ пытсаськон калэ ӧз вуэ: пунэмаськонъёссы 300 миллион манет люкаськизы, кун казнае 10 миллион манет штраф тыроно луизы. Пӧртэм ӧй вал югдур «Удмуртлес» учреждениын. Арлы быдэ со ог 50 миллион манет ыштонъёсын ужаз, 115 миллион манет пала тыриськонъёсыз люкаськизы. Озьы отын но, татын но кылдытэмын вал кризисысь потон план, воштэмын кивалтӥсьёссы. Мар пӧрмиз? Аптекаослэсь ужзэс валаса радъямен,  питранъёс вылын эмъян центр басьтыны коньдон кылиз на! Умой тодӥськом, макем со кулэ пыдлось гуртъёсысь калыклэсь тазалыксэ эскерон понна. Нош «Удмуртлес» тыриськонъёссэ вакчи дыр куспын 52 миллион манетлы кулэстӥз ни, 4 миллион манет барыш поттыны быгатӥз. Со сяна, Россиысь Промышленностья но вуз каронъя министерство юрттэмен, отын пыӵатӥськыны кутске нюлэс поттонын кутӥськись техникаез тупатъянъя проект.

udmurt.ru

Элькунмы азе пуктэм троссэ ужпумъёсты быдэстон понна, туж иназ луоз депутатъёслэн тодэм-валамзы, опытсы.

— Асьмелэн 300-лэсь ятыр кунлэн но муниципалитетлэн луись предприятиосмы, — пусйиз Тӧро. — Юрттӥськоно соослы! Соосты азинтом, азинскоз элькунмы! Мон туннэ одӥгзэ гинэ пайдаё ужась предприятиез верало — «Пихтовка» рыбхоз. Валамон, таӵе предприятиосты ми акционеръёслы ум сётэ, ум вузалэ. Кулэ луыкуз, котьку пуктом пельпуммес — юрттӥськом.

Уртче ужаны быгатӥсь командаен ик кутэмын 2018-тӥ арлы но 2019-тӥ-2020-тӥ аръёслы элькун бюджет. Республикалэн доходъёсыз отын юнме будэтымтэ — ар пумын дефицитэз пытсаны турттыса, шуге-леке вуонтэм вылысь. 2017-тӥ арын кун долгмес ӧм будэтэ ни — 48,9 миллиард манет кылиз, чакламъя со 52 миллиард манетозь йылыны быгатэ вал. Вуоно арын пунэмаськонъёсмы 47 миллиард манетозь усьыны кулэ ни. Тае адӟыса, Россилэн бюджетысьтыз но дотациос мыло-кыдогес вуо — 2018-тӥ арын возьмаськом ни 8,2 миллиард манет, сомында ноку ӧз луылы на.

Сюресъёслэн арзы

Быдэстоно ужпумъёс сярысь веракуз, А. Бречалов одӥг удысэз но ӧз вунэты. Мар бордын ужаны вань дышетонын но, тазалыкез утёнын но, калыклэн улонэныз герӟаськем мукет удысъёсын но. Таосын герӟаськем проектъёсыз вань «Огъя Россия» партилэн — элькунмы огаз но пыриськытэк уз кыльы.

Но тужгес бадӟым саклык висъяськоз сюресъёсты выльдонлы: 2018-тӥ ар элькунамы ялэмын сюресъёслэн аренызы.

— Уката секыт югдур гуртъёсын,  — пусйиз А. Бречалов. — 11 сюрс иськем сюресъёс пӧлысь ог 30 процентэз гинэ тупало туала куронъёслы. Но ӵапак со сюресъёслы ик тужгес кулэясько адямиос — шаерысьтымы котькуд 3-тӥез адями улэ гуртын. Тулыс но сӥзьыл зор-котъёс дыръя 87-аз гуртъёсын сюресъёс ярантэм луо вал, отын улӥсьёс доры сюрыны ӧз быгатылэ ӝог юрттэт сётӥсьёс гинэ но. Ярано, гужем вылтӥ оглюкетсэ тупатъям, но 62-ез кылиз на.

Вуоно арын кыльыны кулэ ӧвӧл ни, пе, пырыны-потыны ярантэм луись сюресъёс. Но талы элькун бюджетын уксё чакламтэ. Иське, утчано. Кулэ луоз ог 2 миллиард манет. Мар кароно?

— Сюрес лэсьтӥсь 2 бадӟым предприятиосмы вань — «Ижевское» но «Удмуртавтодор», — шуиз А. Бречалов. — «Ижевское» предприятилэсь  оглюкетсэ яке ваньзэ акциоссэс вузаны поттоно. Мукет амал ӧвӧл.

Со сяна, гуртъёсысь куд-ог сюресъёсты тупатъяны луоз, пе, «Гуртъёсты азинтон» кун программая. Солы луыса 2017-тӥ арын 40,6 иськем сюресъёс выльдӥськизы — 14 гуртъёсы соос вутто. Вуоно арын чакламын 18 гуртозь сюресъёсты выльдыны.

Городъёс котырысь сюресъёсты тупатъяны туж иназ луэ «Кышкыт луисьтэм сюресъёс» федерал программа. Со чотын туэ 68 сюрес выльдэмын ни, со пӧлысь 56-ез — Ижевск котырысь. Оглом 1,9 миллиард манет уже кутэмын.

2018-тӥ арын Россилэн казнаысьтыз 1 миллиард 460 миллион манет вуыны кулэ вал, но туннэ тодмо ни, Москва эшшо 700 миллиард ватсаны дась. Эшшо 700 миллиард манет шедёз элькун бюджетысь — оглом ог 3 миллиард манет пала люкаськоз. Ижысь сяна, Воткаысь, Сарапулысь, Можгалась сюресъёсты тупатъяны луоз.

* * *

Кун Кенешлэн Тӧроез Алексей Прасолов та докладлы ӟеч дунъет сётӥз. Шуиз, элькунмы азе пуктэм троссэ ужпумъёсты быдэстон понна, туж иназ луоз депутатъёслэн тодэм-валамзы, опытсы. Угось ӵапак соос умойгес тодо интыосысь югдурез — адӟо, кыӵе юрттэт кулэ предприятиослы но огазеяськонъёслы. Кызьы вераз Тӧро, ӧжыт ӧвӧл кузётэк кылем ваньбур но, со экономикамылы ыштонъёс вае.  Ваньзэ тае радъян бордын ужась командае Кун Кенешысь депутатъёс пырыны дась луо.

Элина Кумачёва

Туспуктэм: udmurt.ru

Удмурт Дунне
By Удмурт Дунне 29 декабря, 2017 14:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<