Удмурт азьветлӥсьёс люкаськизы Пичи кенеше

Та вакытэ «Удмурт Кенеш» ассоциацилэн Пичи кенешезлэн пумиськонэз ортче. Ижкаре вуэмын быдэс элькунысьтымы но палэнысь азьветлӥсь удмуртъёс.

Ужрад сӥземын Удмуртилэн кунлык басьтэм нуналэзлы, соин со кутскиз кунлык понна нюръяськем Трокай Борисовлэн но Кузебай Гердлэн синпелетъёссы доры сяська понон бордысен. Собере вань люкаськемъёс вамыштӥзы Кун Кенеше. Татын соосын ӟечбуръяськизы но пайдаё уж сӥзизы Кун Кенешлэн Тӧроез Алексей Прасолов но Тӧролэн но Правительстволэн администрациенызы кивалтӥсь Сергей Смирнов.

— Ми тӥледын валче ужаны чакласькомы, сое валаны луэ быръёнъёс бере Тӧролэн Александр Бречаловлэн тӥледын пумиськон ортчытэмезъя но, — шуиз Сергей Смирнов. — Тӥлесьтыд возьмаськом ас малпанъёстэс шараямдэс но улонэ пыӵатыны тыршемдэс.

Ужрад азьланьтӥське. Ӝоген ужамзы сярысь вералозы ёросъёсысь «кенешчиос», нош пумаз кузьымъёсын но свидетельствоосын пусъемын луозы Данъян книгае пыртэмъёс.

Елена Рябина