«Паймымон чебер удмурт дэрем» фестиваль ортчиз Алнаш ёросын

Удмурт Дунне
By Удмурт Дунне Ноябрь 8, 2017 10:53

Ужрад удмурт дэремен герӟаськемын бере, «Удмурт Кенеш» огазеяськонлэн Алнаш ёзэтэныз кивалтӥсь Галина Павлова куное ӧтиз удмурт дэремъёс сярысь трос тодӥсь адямиез, калык дӥськутэз выльдӥсез но вуриськисез Татьяна Москвинаез. Та нылкышно аслаз коллекциосыныз тодмо луиз ни быдэс шаермылы но, солэн палэназ но. Нош Алнаше со вуылӥз нырысьсэ. Котькуд дэремезлэн аслаз тусыз. Но ваньзы соос вуремын, вашкалаосмылэсь вурон амалъёссэс, куронъёссэс чакласа-эскерыса. Ужрадэ лыктэм калык мылысь-кыдысь кылзӥз солэсь верамъёссэ, тросэз выль сямен учкыны кутскизы удмурт дэрем шоры. Нош коллекциоссэ адӟемзы бере воксё но паймизы. Алнаше ваем со 2 пумозэ. Нырысь калык азе поттэмын вал шаермылэн пӧртэм сэрегъёсысьтыз дӥськутлэсь аспӧртэмлыкъёссэ лыдэ басьтыса вурем сатин дэремъёс. Нош бӧрысь возьматӥзы туала басмалэсь вашкала амалъёсты чакласа вуремъёссэ.

Туймыйыл школаысь пиналъёслэн дӥськут коллекцизы.

Паймытӥзы школаосын, нылпи юртэн но нылпи садъёсын дасям ужъёс но. Ӵапак соосты возьматонлы сӥземын вал ужрадлэн 2-тӥ люкетэз. Та адӟытонэ пыриськизы ёросысь 9 школаос, нылпи юрт но Писэйгурт нылпи садлэн коллективез. Вань дэремъёслы вуриськисьёс пыӵатӥллям удмурт шӧм. Тросэз соос нуналлы быдэ ветлыны тупало, малы ке шуоно туала улонлэн куронъёсызъя вуремын. Алнаш школаын дышетскись Анастасия Красильникова аслаз «Эктоника» синмаськымон коллекциеныз тодматӥз. Мукетъёсыз дэремъёс школаосын технологиен дышетӥсьёсын малпамын ке но, ваньзэ соосты возьматыны дасязы нылпиосын ӵош. Пиналъёс но дышетӥсьёс сцена вылын зэмос модельёс кадь ветлӥзы. Туж мусо адӟиськизы Писэйгурт нылпи садысь пичиос но.

Возьматонъёсты шуныт кичабонъёсын пумиталлязы. Котькудӥз учкись аслыз трос выльзэ басьтӥз. Со сярысь вераз Железнодорожной школаысь технологиен дышетӥсь, модая «Юг-юг» театрлэн кивалтӥсез Галина Фёдорова.

— Ми пиналъёсын пӧртэм адӟытонъёсы вуылӥськом, вормонъёсмы но вань, — вера Галина Анатольевна. — Олокыӵе дӥсьёсыз но адӟиськомы. Нош туннэ мон туж трос выльзэ но тунсыкозэ аслым усьтӥ на. Ми «Чебер нылъёс» коллекциенымы тодматӥмы. Нылпиослы кельше таӵе ужрадъёслы дасяськыны, соос уката но эшъясько, ог-огзылы юрттӥсько.

Та ужрадэз азьланьтыны малпамын. Но мукет дыръя со адӟытон гинэ уз луы ни, отын ужъёслы дунъет сётӥськоз. Удмурт дэремлы сӥзем нырысетӥез фестивальмы, мон сямен, туж ӟеч пӧрмиз.

Людмила Сурчакова

Туспуктэм: Людмила Сурчакова

Удмурт Дунне
By Удмурт Дунне Ноябрь 8, 2017 10:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<