Нева дурысь италмасъёс

Удмурт Дунне
By Удмурт Дунне Ноябрь 15, 2017 08:32
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт Кенешлэн» Санкт-Петербургысь ёзэз «Удмуртилэн фестивалез Невалэн ярдуръёсаз» ужрад ортчытӥз.

Санкт-Петербургын — удмурт эктонъя мастер-класс.

Уйпал шоркарын удмуртъёс котькыӵе вакытъёсы улӥзы, дыр, но огазеяськонзы 2 но ӝыны ар талэсь азьло гинэ кылдӥз ай. Кичӧлтӥсез луиз Дэбесын вордскем но будэм, но кема аръёс ӵоже ини Санкт-Петербургын улӥсь Татьяна Серебренникова.

— Котырам туж усто команда люканы быгатӥ, — шумпотэмзэ вера Татьяна. — Огез удмурт сиён-юонъёсыз ӟеч тодэ но пӧраны быгатэ, мукетыз историез яратэ, куинетӥез печать ужен выре, ньылетӥез ужрадъёс ортчытъя — ваньзы ик туж ужасесь, быгатӥсесь… Ми азьвыл но пичи пумиськонъёс, ужрадъёс радъяллямы ни, нош таяз радэ дӥсьтӥмы бадӟым фестиваль борды басьтӥськыны. Кылем арын «Рыбацкий» культурая юртын асьсэлэсь фестивальзэс ортчытӥзы сетуос. Ми малпам: озьы ик ум быгатэ шат?

Киужен выризы.

Удмуртъёслэсь кичӧлтон-зэс Санкт-Петербургысь Калыкъёслэн юртазы умоен лыдъязы, озьы ик шумпотӥзы «Рыбацкий» культурая юртысь ужасьёс но, уго соос кӧня ке ар ӵоже ини улонэ пыӵато «Бадӟым Родиналэн пичи калыкъёсыз» проектсэс.

— Ми дӥсьтӥмы фестивальмес 2 нуналъем карыны, — азьланьтэ Татьяна Серебренникова. — Нырысетӥ нуналэз фольклорлы но вашкала улонлы сӥзьыны чакламы, нош кыкетӥ нуналаз туала удмурт культураез возьматыны малпамы. Со понна Удмуртиысь 2 коллективъёсты но Богдан Анфиногеновез ӧтимы.

Ужрадэз чус улон минутысен кутсконо луиз, малы ке шуоно со нуналъёсы, Ижысь корка куашкаса, адямиос быризы. Вавожысь «Гербер» коллективлэн ватон сям-йылолэз интыяз луиз.

Кыкетӥ нуналаз быгатонлыкъёссэ возьматӥз Дэбесысь «Шудбур» ансамбль, дэбесъёс дасяллям пӧйшуран йылолэз, озьы ик быдэстӥзы туала удмурт кырӟанъёсты. Та нуналэ ик вань мылкыд карисьёс быгатӥзы вуылыны пӧртэм мастер-классъёсы: мунёос лэсьтонъя, перепеч пӧранъя, сумкаос вылэ пужыятӥськонъя, тыпыртонъя. Радъясьёс соосты тросгес нылпиосты кыскон понна ортчытыны малпаллям, но дышетскыны мылкыд кариллям бадӟымъёс но.

Удмурт дэремен тодматскон.

Та вакытэ ик «Рыбацкий» культурая юртын эшшо кӧня ке площадкаос ужазы на. Усьтӥськиз туспуктэмъёсын адӟытон. Отын возьматэмын Удмурт шаерлэн синмаськымон интыосыз, калык культура, данъяськымон муртъёсыз, соос пӧлын вал Брангуртысь песянайёс, спортсменъёс Г. Кулакова, Т. Тихонова, В. Лекомцев, И. Черезов, конструктор М. Калашников но трос мукетъёсыз. Адӟытонэ вань поттэм ужъёслэн авторъёссы — Удмуртиысь туспуктӥсьёс. Та площадкаын ик возьматъязы удмурт мультфильмъёсты но Брангуртысь песяйёслэсь кырњамзэс. Нялтас вераса, адӟытон толсуре гинэ ворсаськиз ай, отчы вуылыны мылкыд каризы Санкт-Петербургысь кӧня ке школаосысь но нылпи садъёсысь пиналъёс. Фестивальлэн кыкетӥ нуналаз «Ошмесо шаер — Удмуртия» конференция ортчиз.

— Отын ми асьмелэн ужъёсмы, проектъёсмы сярысь мадимы, — шуэ Татьяна Серебренникова. — Туж тунсыко программа — «Удмурт шаерлэн историез» — дасяз Этнографической музейын ужась удмурт нылаш Екатерина Коротаева. Со вераз калыкмылэн сям-йылолъёсыз, дӥськутэз, лулчеберетэз сярысь.

Ужрадэз йылпумъяз «Удмурт гуръёс Невалэн ярдуръёсаз» концерт.

Ужрадэз йылпумъяз «Удмурт гуръёс Невалэн ярдуръёсаз» концерт. Удмуртиысь коллективъёс сяна, отын кырӟаз Санкт-Петербургысь «Василиса» ӟуч ансамбль (ансамбль ӟуч, нош кивалтӥсез удмурт), озьы ик «Невский италмас» удмурт ансамбль.

— Та ансамбльмы ар талэсь азьло гинэ кылдӥз ай, — вера Татьяна Серебренникова. — Озьы ке но уно концертъёсы, фестивальёсы пыриськыны вуттӥмы ини, калыкез удмурт культураен тодматӥськом.

Учкисьёслы тужгес но яраз Богдан Анфиногенов. Т. Серебренникова верамъя, уноез ӵапак сое учкыны лыктӥллям:

— Ужрадмы азьын уно афишаос лэсьтӥмы, дунтэк вӧлмись газетъёсы фестивальмы сярысь гожъямы, вотэсын бадӟым уж нуимы, соин тросэз адямиос тодыса лыктӥзы ни, кинэ ужрадамы адӟозы но кыӵе площадкаосы пыриськозы. Шумпотымон, уно егитъёс вуизы. Фестиваль бере огазеяськонамы выль адямиос но лыктӥзы. Со вал валтӥсь ужпуммы.

Та арня пумын ини Калыкъёслэн юртазы удмурт, пор но чуваш нылпиос понна Выль ар радъяны малпаськомы, вуоно гужем Гербер ортчытэммы потэ. Нош «Удмуртилэн фестивалез Невалэн ярдуръёсаз» арлы быдэ мед луысалыз. Вуоно арын ми сое тыршомы Удмуртилэн кунлык басьтон нуналэзлы сӥзьыны. Туж оскем потэ, Удмурт Элькунлэн Правительствоез адӟытон радъяны юрттоз шуыса, озьы ик итӥськозы ёросъёс. Нош туэ туж юрттӥзы Удмуртиысь Эшъяськон юрт, Вавож но Дэбес ёросъёслэн кивалтӥсьёссы, — шуэ Т. Серебренникова.

Елена Рябина

Туспуктэмъёс: vk.com 

Удмурт Дунне
By Удмурт Дунне Ноябрь 15, 2017 08:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<