Мар сярысь сюлмасько анай кылъя дышетӥсьёс?

Удмурт Дунне
By Удмурт Дунне Ноябрь 28, 2017 14:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

2009-тӥ арысен шаерамы радъяське «Анай кылъя устоез дышетӥсь» вожвылъяськон. Таяз радэ со ортчиз Ижысь К. Герд нимо гимназиын.

Анай кыллы дышетӥсь — ас сьӧраз кыскыны быгатӥсь мурт. Со бордысь но уго потэ, макем зол нылпиос яратозы вордскем кылзэс. «Анай кылъя устоез дышетӥсь» вожвылъяськонын та шӧдӥськытэк ӧз кыльы.

Анай кылъя дышетӥсьёслэн конкурсазы пыриськем визьнодасьёс.

Финалэ потэм визьнодасьёс ялан калыклэн син шораз. Соос школалэн директорез, я ёрос Кенешысь депутат, я ёросысь кылэз дышетонъя центрен, музеен кивалтӥсь луо. Калыкен ужатэк нокызьы но уг луы, шуо соос. Пичи гуртъёсын анай кылэз азинтыны капчигес, лэся. Вуж Шудьяысь дышетӥсь, школалэн директорез Ирина Евдокимова верамъя, школаысьтызы 60 пинал пӧлысь ваньзы кылэз дышето. Пӧлазы ветлӥсь ӟуч пинал но соосъя кариське. Анай-атайёс но берло дыре кыллэсь кулэлыксэ валаны кутскизы, шуэ.

Бадӟымгес гуртъёсын югдур арысь аре секытоме.

Шаркан ёросысь Быгы школаысь Надежда Голубина.

— Али школамес удмурт шуыны ӧй дӥсьтысал ни, — вера Шаркан ёросысь Мувыр школаысь дышетӥсь Надежда Широбокова. — Азьвыл нылпи садэ тёп-тёп удмурт кылын вераськись нылпиос ветло вал. Таин сэрен «Пичи чеберай но батыр» ёрос конкурсын котьку нырысетӥ интыын вал. Но азьланяз кинэ конкурсэ дасяны паймоно ни. Удмурт анай-атайёс нылпиосынызы ӟуч кылын верасько. Школае но тэшкылиос ӟучомыса вуо. Зэм, 5-тӥ классэ выжемзы бере, удмурт дышетӥсь кие сюрыса, ог-огзылэсь адӟем карыса, уноез выльысь удмурт кылын вераськыны кутско. Нош кыӵе потэ бадӟым группаосын ужам. Тужгес но — литературной произведениосты эскерыку. Трос кузя дыръязы нылпиос асьсэ малпанъёссэс, ог-огзэс ортчыны турттыса кадь, верало. Кылзэс волятыны мед быгатозы шуыса, газет но поттыны кутскимы. Огъёсызлэсь материалъёссэс печатласькомы ке, мукетъёсыз но кыстӥсько. Озьы ӟуч пиналъёс но удмуртомо.

Шаркан ёросысь Быгы школаысь Надежда Голубина удмурт кылэз ляб тодӥсь нылпиосты юнъёсыныз артэ пуктэ, таос ог-огзылы мед юрттӥськозы шуыса.

Югдур пӧртэм ӧвӧл бигер кылэз дышетонын но. Уката ик юн шӧдӥське со Юкаменск ёросысь пичи Починка гуртын. Татын Интернетсы но мырдэм кутэ бере, туала нылпиослы матэгес кариськон понна мар но малпано уг луы Марьям Араслановалы.

— Гуртамы бигеръёс, удмуртъёс но бесерманъёс уло. Куспазы ӟучгес верасько бере, ӟучомыса вуо ни. Но ваньзы одӥгтэм дышето бигер кылэз. Кыӵе ке кылбур яке кыл йыразы мед кылёз шуыса, сое нылпиосын ӵош суредаськом, — шуэ дышетӥсь. — Бигер юртъя музеен кивалтӥсько бере, урокъёсты ӵемысь отын ортчытыны тыршисько, нылпиос адӟемзыя сочинение гожъяло.

Тужгес лэчыт ужпум город но со котырысь гуртъёсын.

— Нылпиосты гочатон понна Ижын зол пӧсяно луэ, — шуэ Ижысь 97 номеро школаысь Вероника Иванова. — Кылэз гажан, выжыдэ, историдэ тодытэк нокызьы уз лыкты шуыса, нырысь ик со бордысен ужме нуыны кутскисько. Одно ик дышетӥськомы кырӟанъёс, эктонъёс, удмурт сиён пӧраськомы. Туннэ 350 пинал удмурт кылэз дышетэ. Азьланяз уж умойгес мед пӧзёз шуыса, урокъёсты удмурт коркан ортчытъям потэ. Нылпиос, парта сьӧрын пукем интые, ӝӧк сьӧры мед выжозы, ӟусъёс вылэ мед пуксёзы, гур котырын мед пӧраськозы, доска интые, басма вылэ мед гожъяськозы. Озьы кылэн тунсыкъяськонзы эшшо но йылоз. Сэрег утчаськомы ни. Со сяна, вуоно арысен малпасько нылпиосын гуртъёсы потаны. Отысь семьяосын кӧня ке нунал улӥзы ке, кылэн, сям-йылолъёсын мургес тодматскозы, соку удмуртлыклэсь шӧмзэ рос-прос веръялозы.

Ӵошатскон дыръя.

Дэри ёросысь Лудорвай школае 235 пинал ветлэ. Куд-ог классъёсын ӝыныезлэсь тросэз нылпиос ӟучъёс ни. 60 процентэз уго — Ижысь пиналъёс. Озьы ке но Надежда Мерзлякова сюлмаськемен, садысен кутскыса, 11-тӥ классозь удмурт кылэз утьыны выро. Со уго ачиз ик директор луэ на, анай-атайёсын нимысьтыз вераськыны, косыны капчигес. Но косыса гинэ уд вормы ук. Соин ик урокъёсаз трос дырзэ висъя проектъёсын выронлы. Котькуд темаысь кыӵе ке проект потыны быгатоз, со бордын дэмен ужад ке. Нылпиос, дышетӥсез гинэ кылзыса, парта сьӧрын медаз пуке, асьсэос но мед ужалозы, тросгес материал мед люкалозы, шуэ. Озьы нылпиос асьсэос кыллюкам лэсьто.

Вань та устоосыз дыше-тӥсьёс быгатонлыкъёссэс люкаськемъёслы возь-матӥзы, мастер-классъёс ортчытӥзы, калыкен шу-дӥзы, асьсэ сярысь веразы. Кызьы меда жюри дунъялоз, кинэ быръёз шуыса малпан ӝытозь ӧз лэзьы. Сокема кыстӥськиз конкурс. Нош устозэ бырйыны зэмен ик секыт вал. Котькудӥз уго бадӟым ныпъетэз нуэ. Дышетонъя но наукая министерстволэн дипломъёсыныз пусйыкузы, дышетӥсьёслэн синвуоссы ик потӥзы. Надежда Мерзлякова нырысь-валысь мар вераны ик ӧз шедьты: сое «Анай кылъя устоез дышетӥсь-2017» нимын пусйизы.

Туэ анай кылъя устоез дышетӥсь луиз Дэри ёросысь Лудорвай школаысь Н. Мерзлякова.

— Туннэ мон асме студентэн шӧдӥ, — шуиз со сцена вылысен. — Экзаменын кадь куалекъяй.

Та конкурслэн дуныз ми понна туж бадӟым, со азьланяз но мед луоз, пусйизы дышетӥсьёс. Надежда Мерзляковаез та вормонэз эшшо но бурдъяз. «Лудорвай» музей-заповедникен эшшо но золгес, валче ужаны малпа. Али школаын дышетскись нылъёс музей пыр удмурт дэрем вурыны дышетско, солэн историеныз тодматско, нош пиос пулэсь арбериос лэсьто. Азьланяз луысал, пе, экскурсоводъёслы дышетонэз радъяны. Надежда Николаевна верамъя, музее лыктэм туристъёсты Лудорвай гуртэ но ӧтемзы потэ — вань мае возьматыны, шуэ. Гурт палэнэ медаз кыльы шуыса, гуртлэн историезъя билбордъёс лэсьтоно. Со сяна, Надежда Мерзлякова Дэри ёрос Кенешысь депутат но луэ на. Гуртоос со азе трос ужпумъёс пукто, кылсярысь, нылпи садзэс паськытатыны куро. Али отчы 3 аресысен 80 пинал ветлэ. 2010-тӥ арысен гуртын пиналъёслэн лыдзы 3 поллы будӥз, егит семьяос но ялан йыло. Котькытчы вуттӥськись нылкышнолэн дораз пукыны дырыз ӧвол. Нош солэн 2 пиналъёсыз. Но надежда Николаевна уг ӝожомы. Адямиос сьӧраз кыстӥськемлы шумпотэ, мынам юрттӥсьёсы трос, шуэ.

Елена Сараматова

Туспуктӥз Владимир Беломорских

Удмурт Дунне
By Удмурт Дунне Ноябрь 28, 2017 14:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<