«Дартэз» лыдӟо Санкт-Петербургын

Удмурт Дунне
By Удмурт Дунне Ноябрь 1, 2017 10:06

Максим Кузнецов, гужем «Удмурт дунне редакцие пыракуз.

Мон вордӥськи но улӥсько Санкт-Петербургын. Тунсыкъяськисько фин-угор кылъёсын: тодӥсько удмурт но вепс кылъёсты. Питерысь одӥгаз школаын, практикаме ортчытыкум, фин-угор кылъёслы сӥзем ӝыт радъяй.

Али дышетскисько Санкт-Петербургысь кун университетын филологияя факультетын 4-тӥ курсын — ӟуч кылъя но литературая тодон-валанме паськытатӥсько.

Гожтӥськисько Удмуртиысь егитъёслэн «Дарт» но Петрозаводскысь Kodima газетъёслы. «Дарт» мыным конвертын вуэ.

Туэ 4-тӥ курсын дышетскисьёслы педагогической практика ортчоно вал. Бырйи Петербургысь одӥгзэ адӟем карымон 642 номеро гимназиез. Тодӥ: со бордын ужась академической классысь пиналъёс олимпиадаосын вормисьёс радын ӵемысь луыло. Татын дышетон туж ӟеч радъямын. Нылпиос 5-тӥ-7-тӥ классъёсысен ик кылтодон, каллиграфия, орфоэпия предметъёсъя тодон-валанзэс паськытато ни, та сяна, 4 кунгожсьӧр кылъёсты — латинской, английской, немецкой но французской — дышето. Литературая урокъёсазы, классикаен сяна, ӟуч фольклорен, кылбур гожтонэн, вашкала даурысь литератураен тодматско. Татысь дышетӥсьёс, школаын сяна, университетъёсысь студентъёсын ужало на.

Мыным кулэ вал быдэн 3 урок ӟуч кылъя но литературая нуыны, эшшо ужрад дасяны.

Фин-угор ӝытэ мон доры лыктӥзы трос пиналъёс. Соослы удмурт но вепс кылъёслэн аспӧртэмлыкъёссы сярысь мадьыны малпай. Нылпиос мыным уно юанъёс сётъязы. Соос удмуртъёс сярысь уг ик тодо вылэм. Соин юазы, вань-а та кылын вераськисьёс. Мон валэктӥ Удмурт шаерлэсь кытын интыяськемзэ, тодматӥ удмурт культураен. Верай, кызьы тодматски удмурт кылэн. Мынам ӵужанае ошмесо шаерын улэ, зэм, со выжыезъя бигер, удмуртсэ уг тоды. Но мыным тунсыко потӥз удмурт кыллэн чузъяськемез. Сое ас кожам, дышетон книгаосъя, дышетӥ, удмурт гуръёсты, радиоез, передачаосты кылзылӥ. Арлы быдэ Ижын радъяськылӥсь «Гужем школае» вуылыны тыршисько, отын удмурт кылме волятӥсько, пӧртэм удмурт ужрадъёсы, шулдыръяськонъёсы вуылӥсько.

Нылпиосылы туж тунсыко потӥз удмурт кыллэн грамматической аспӧртэмлыкъёсыз. Кылсярысь, ӟуч «не» кылэз удмурт сямен 10 пӧртэм вераны луэ вылэм шуыса — уг, уд, уз, ум, ӧй, ӧд, ӧз, ӧм, эн но ӧвӧл. Эшшо соослы туж кельшиз удмурт кылын ньӧмлык (притворность) категория сярысь тодыны но со амалъя выль кылъёс кылдытъяны. Туж кузь но тунсыко кылӥське, пусйизы нылпиос. Озьы пӧрмытӥмы изисько кылысь — иземъяськисько, валасько — валамъяськисько, ужасько — ужамъяськисько.

Озьы ик дышетскисьёслы «Дарт» газетэз возьматӥ. Куд-огез отын гожтэм материалъёсыз лыдӟыны но выриз.

Вепс кыл пумысен но вераськи. Алфавитсы латинской букваослэсь пӧрмемын, шуи. Тодматӥ, кытын вепс кылын вераськисьёс вань на.

Валамон, Петербургысь пиналъёслы удмурт кылэз тодэм, оло, ноку кулэ но уз луы, но, малпасько, та ӝыт пичи ке но соослэсь тодон-валанзэс паськытатӥз.

«Дартэз» лыдӟисьёслы сӥземе потэ: егитъёс, эн возьдаське ас кылыныды вераськыны, соин тросгес адямиосты тодматыны! Соку удмурт кыллэн аспӧртэмлыкъёсыз сярысь, шаерамы улӥсьёс сяна, мукетъёсыз но тодозы. Оло, соку кинлэн ке сое аслыз мургес усьтэмез, дышетэмез потоз.

Максим Кузнецов

Удмурт Дунне
By Удмурт Дунне Ноябрь 1, 2017 10:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<